[ المناقشات ] : طريقه خنفشارييه للي حفظهم ضعيف .. ادخلو حياكم

[جودي_93]

السلام عليكم
اخباركم ..
ودراسه سعيده وترم مليئ بالانجازات والتقدم للجميع
اليوم عندي لكم موضوع بيفيدنا
تعرفونا اكثر موادنا هذا الترم تتطلب الحفظ
والبعض مثلي عندهم ضعف في الحفظ
لقيت وانا اتصفح المنتدى الجميل هذا مشاركه لاخوي ابو خالد جزاه ربي خير
حبيت نستفيد منها
طبعا مااضمن مفعولها بس نجرب
اليكم الطريقه:

المشاركة الأصلية كتبت بواسطة ( ابو خالد )

عندي لكم نصيحة مجربة
اكتشفتها للأسف من ثاني ترم ... يعني اول ترم كنت في العصر الحجري
هي تخص الناس اللي حفظهم بطئ لأي سبب
ممكن قصر الوقت ,, أو كثرة المعلومات أو تشابهها ,, أو كثرة المشاغل ,, أو لأي سبب ثاني
يعني لايجيني واحد دافور طول الترم وهو يطحن طحن بالمواد ويفرم الملخصات ويقول انه جربها ولا نفعت معه
أكيد ماهي نافعتن لك أنت ومخك الأصفر
ما تنفع الا للي مخهم الأصفر كشخة عليه إطار أحمر
تعالوا اشرح لكم الأمخاخ بالألوان



هذا الله يسلمكم مخ آدمي من اللي اتكلم عنهم ماخذها من "ناشيونال جيوقرافيك"
اللي بالأصفر هو الذاكرة اللي تنحفظ فيها الأشياء وقت السعة وقبل الإختبارات وحنا نتقهوى ومريحين
ترى مخ الدوافير كله كذا وعععع ســاده ماهو مزبرق وحركات

الأحمر هذا حق شغل سريع سريع .. جلدي جلدي
اي معلومة متأخرة تكون مثل الصلصال تلصقها فيها خصوصاً اذا لقيت شئ وحسيت انه مهم ولا امداك تحفظه مرره
او اسئلة المراجعة اللي ماتدري هي بتجي والا ماتجي وتقراها تبي تريح ضميرك ومخك يقوم ويلصقها في الأحمر
أسئلة الإختبارات السابقة تقراها وانت شاك انها بتجي او لا .. يقوم مخك ويلصقها في الأحمر
ومشكلته ان عمره الإفتراضي محدود .. وأي عملية تفكير عميقة أو محاولة لعصر المخ بتسيح أم أمه فـ إنتبه

الطريقة :
أول ما تجيك ورقة الأسئلة اترك عنك ورقة الإجابة والتظليل
امسكها سؤال سؤال واحد ورى الثاني ,, بس قراءة
الاول .. همممممممممم همممم همممممممم هم هممممم
اذا تتذكره على طول حط علامة على الحل
واذا تحس انك قاريه بس وش الجواب بالضبط وشوو وشوو !! تراه بيكون في الأصفر انحش عنه
وامسك الثاني .. ونفس الشئ ... والثالث ... والرابع ..... والخمسين
انت كذا فرغت كل الأحمر اللي عندك وحليت لك كم سؤال لا بأس فيه
( العملية كلها ماتاخذ 5 دقايق )
ولا تحاول تحل الأسئلة اللي فيها مسائل وحساب و .. و ... لأنها تعتبر ( عصر مخّ ) وبتقضي على مفعول الأحمر

بعد ماتخلص ارجع حل وظلل عادي بالطريقة التقليدية واستخدم مخك الصدقي الأصفر اذا عندك أساساً

صدقوني بتمرون على بعض الأسئلة وتقول انا ليش اخترت ( ب ) ما اذكر انه مر علي هالتعريف
او تحس انه موب راكب الحل .. او تحس انه غلط وأنت ماتعرف الحل
كل هذي لأن الأحمر تفركش وانتهى مفعولة ولا تقعد توسوس ولا تتفلسف لأنه هو الجواب الصحيح

ختاماً
إن أصبت فمن الله ... وإن أخطأت فمنكم انتم عويض الله من شركم



المصادر : كتاب ( الحفظ السريع .. بالمخ الفضيع ) لأبو الزعفران الأقحواني الطبعة الثالثة

وهذا رابط المشاركه
http://www.ckfu.org/vb/10294159-post168.html

في النهايه اتمنى نستفيد منها ولا تنسوني من دعائكم

[ام وجدان]

يعطيك العافيه يارب

[أنا صاحي لهم]

الله يعطيك الف عافيه

[جنون الحياه]

يعطيك العآآفيه مجوووووودي ,,

الله يعين وييسر مع هالذاكره ><


كل التووفيق يارب ,,

[Memo bnt nasser]

يعطيك العافيه منجد الحفظ بالنسبه لي شي صعب

[طالب كويس]

انا عندي مشكلة..





احفظ اي شي اقراه :)

اذكروا الله

[Memo bnt nasser]

المشاركة الأصلية كتبت بواسطة طالب كويس

انا عندي مشكلة..





احفظ اي شي اقراه :)

اذكروا الله

ماشالله وش سرك

ههههه

[اداري طموح]

يعطيك العافية.

[طالب كويس]

ماعندي سر بس بدت الموهبة بارقام لوحات السيارات احفظها وانا مغمض وفجأة طلعت مصطفى ههههه

[كنت نايم]

قريت الطريقة اكثر من مره عجزت استوعبها ههههه مخي وشلونه في هالحاله!

عموماً اشك في صحة هالكلام ..

واذا بنتكلم على اساس علمي الذاكرة انواع :
١- ذاكرة حسية ( مدى حفظها قصير وتعتبر ذاكرة تشغيلية)

٢- الذاكرة قصيرة المدى ( يومين الي ٢٠ يوم ) وهي اللي في الغالب نستخدمها لاننا نحفظ الشيء وبعد مدة نقراء وكأننا اول مره نشوف هالكلام!

٣- الذاكرة طويلة المدى ( فترات طويلة جداً ) هالنوع من الذاكره هو سر التفوق والنجاح وحفظ المعلومات مدة طويلة وقدرة سريعة على الاسترجاع وفي اي وقت ومانقدر نخزن المعلومات فيها الا عن طريق - الحفظ وبعد ايام (٥-٧) نكرر عملية الحفظ، نكرر هالشيء لا يقل عن ثلاثة مرات للترسيخ المعلومة ونقلها للذاكرة طويلة المدى، وفي حال دخول المعلومات لهالنوع من الذاكرة في الاختبار ماراح تتعدى ولا سؤال لان استرجاع المعلومه سهل وسريع الدماغ تعود على استرجاعها مع الترسيخ والتكرار.


هالكلام من كتاب الذاكرة أسرارها وآلياتها للكاتب لورون بوتي