مادة الانجليزي تعالو نساعد بعض..

[i.Ae]

السلام عليكم
بحاول أكتب الشيء المُفيد اللي ذكره الدكتور بالمحاضرة.

"المحاضرة الأولى-مادة اللغة الإنجليزية-مستوى أول"
بالبداية ذكر بإن الجملة باللغة الإنجليزية تحتوي على Subject (فاعل) و Verb (فعل) تباعاً.
وذكر Verb Be اللي هو يتكون من (am, is, are).
والـSubject يا يكون Noun "اسم" أو pronouns "ضمير"
والضمائر هي: I, he, she, it, we, they, this, these

طيب خلونا نكّون جملة عشان نستفيد ونشوف
هل تكونت من اللي ذكره الدكتور.
I am a student
بفصّل شوي:
I هو الفاعل Subject وجاء هنا كضمير.
am هو الفعل Be يعني Verb Be
a هو Article "بتكلم عنه شويّات"
student هو Noun

اتمنى وضحت فكره تكوين الجملة، وما ابغاكم تحفظون شيء
بس كونوا جمل على هذا السياق.
هذي جملة ثانيه للي يبي يفصّلها:
He is a Doctor

شوفوا ترتيب هالجملة كيف
Ahmed is a student
Noun + Be + Noun < ببدأ بـ Singular "يعني الجمل المفردة"
يعني
Ahmed هو Noun
is هو Be < فعل Verb Be اللي ذكرناه فوق.
a <بنرجع لها.
student هو Noun

كذا الوضع، أعزّائي...
بتكلم عن الـArticle
اللي هي (a, an)
هذي تجي فقط مع Singular "يعني المفرد".
توضيح أكثر.
Ahmed is a teacher
أحمد مُعلِم.
المُعلِم هنا مفرد، لذلك استخدمنا معها Article
بس ليش أستخدمت (a)، بدلاً من (an)؟!.
أنا أقولكم.
ببدأ بالـ(an) عشانها محصورة بعدة حروف.
نحط (an) قبل الكلمة اللي تبدأ بأي حرف من هذي الحروف
a, e, i, o, u
وأي حرف غير هذه الحروف نضع (a)

مثال آخر:
It is an apple
(قولي لي ليش استخدمت، an بدلاً من a؟؟)


الآن مع الجمل اللي فيها جمع "Plural"
نستخدم فيها are بدل is
نذكر جمله عشان نوضح اكثر.
We are students
We هي subject وجت هنا على هيئه ضمير.
are هو "ايش هو يا جماعه، جاوبوا؟!"
students هو Noun بس جاء هنا جمع، زي ما تلاحظ بوجود حرف s بنهاية الكلمة.

وزي ما تلاحظ لا وجود لـArticle هنا.
كيف فهمتوا ؟؟

مثال آخر ووضحوه بنفسكم:
They are teachers


نجي لإختصار الـVerb Be مع الـPronoun
واللي اسمه بالإنجليزي
Contractions
ويرمز له بهذا الشكل
'
مثال
I'm a student
وهي بالأساس بدون إختصار
I am a student
مثال آخر:
They're students

بس كذا القضيّة.


نجي للنفي Negative
يعني عندك جملة وبتنفيها، هنا نستخدم not
مثلاً هذي جملة عادية:
We are students.
لو أبغى أنفيها بضيف not بعد Verb be
We are not students
ولو بأختصرها بتصير
We aren't students

وهذي جمله للتدريب:
He is a doctor.


نجي للصفة Adjective
وتذكروا بإن الصفة لا تُجمع نهائياً .

مثال:
Ahmed is smart
وخلنا نجرب هل تجمع لو جبنا طالبين ونبي نقول لهم انهم اذكياء
Ahmed and Khaled are smart

وتجي ايضاً مع الضمائر
I'm not stupid
يعني انا موش غبي يبني .

نجي للأماكن
Be + A Place

مثلاً جاء واحد وسألك عن اخوك، تجي تقوله
He is not here
يعني انه مش موجود هنا <اوم النصب، واخوه بالغرفه، التسذب والم .
أو تصرفه وتقوله في المكتبه
He is at the library
وهو لازال عندك بالغرفة .
وآخر شيء يجي ابوك يسألك وين اخوك ذا اللي تصرف الناس عنه.
He is here, dad



جاء وقت حروف الجر Prepositions
بسيطة ومافيها منها.
خل نأخذ الحروف مع معناها بالعربي
On يعني على "بس هالشيء لازم يكون ملامس للسطح اللي نسأل عنه أو نقصده"
above يعني فوق "هالشيء المقصود ما يكون ملامس للسطح اللي نسأل عنه أو نقصده"
in يعني في.
at يعني في "ولا تسألوا وش فرقها عن اللي قبلها، خخ مدري ".
next to يعني بجوار "زي ما تقول، ياخي عندك الريموت، عند المركى ".
between يعني بين.
Behind يعني خلف.
under يعني تحت.
from يعني من.

نجي للأمثله:
تجي تسأل أخو ابو تصريفات ذاك، عن مفتاح سيارتك يقولك
It's on the table " تحصله على الطاولة".
وتروح تدوره هناك وما تلقاه، وترجع له وتسأله مره ثانيه ويعطيك صاروخ ثاني يقولك:
It's in the kitchen " ياخي تحصله في المطبخ".
وتدوره بالمطبخ وما تحصله، وتشتعل غضباً ، وترجع تسأله ويقولك.
It's above the table "تحصله بأعلى الطاولة يا درج مهو عليها "
وتروح تدوره وتحصله صدق على الطاولة، بس كان على التلفزيون اللي هو اساساً على الطاولة.
وتروح تمشيء بالسيارة لدوامك وتحصل موقف والموقف بين سيارتين،
عاد انت صفطت سيارتك بين هالسيارتين. ويتصل عليك اخوك يبي يجي يأخذ سيارتك ويسأل وين مصفطها وتقوله
It's between the red and blue cars
يعني السيارة حقتي بين السيارتين الحمراء والزرقاء .
وخلصت قصة الحروف .

نجي لـYes/No Questions
يعني سؤال جوابه يا Yes أو No
نعم أم لا..؟!
بسيطة وما فيه اسهل منها.
مثلاً هذي الجملة ابغاك تكونها كسؤال.
Ahmed is a student
تجي تسحب is اللي هو Verb Be وتحطه اول الجملة بس تذكر إنه يبدأ بحرف كابتل

Is Ahmed a student?

ولا تنسى علامة الإستفهام بآخر السؤال.
وهذي جمله ثانيه:
Fatima and Nada are not nurses
صيغة السؤال هي:

Are Fatima and Nada nurses?

طيب نجي نجاوب على السؤالين اللي قبل شوي:

Is Ahmed a student?

Yes, Ahmed is a student
والجواب القصير زي كذا ينكتب
Yes, he is.
يعني شلنا كلمة Ahmed وبدلناها بضمير
وهنا عاد ما يحتاج نكتب student

Are Fatima and Nada nurses?

No, Fatima and Nada aren't nurses
والجواب القصير كالتالي:
No, they aren't

وبالنسبة لـWh Questions هم بسيطة
بس تعرف المقصود من السؤال وتجاوب على اساسه
What ماذا "تنكتب لما تبي تسأل عن شيء، وشهوا ذا؟"
Where "تنكتب لما تبي تسأل عن مكان، وينه فيه ذا المكان"؟
When "تنكتب لما تبي تسأل عن الوقت، بالله كم الساعه آلحين؟"
Why "تنكتب لما تبي تسأل عن السبب، ليش متأخر للحين؟"
Who "تنكتب لما تبي تسأل عن شخص، منهو خويك اللي قبل شوي جاء؟"
How "تنكتب لما تبي تسأل عن الكمية، كم الكمية اللي تبيها الحين، اخلص عليّ!؟!

أمثله سريعة:
الحين انت مضيّع اخوك بالغربه، واخوك مو داري وين الله حاطه
يجي يتصل عليك وهو معطي جواله لواحد من اهل الديرة.
تسأله أنت وين مكانك الحين، قولي!

Where are your place, tell me?

يجاوبك عاد بالمكان المتواجد فيه، وتركب مع تاكسي وتسأله كم الساعة آلحين

What is the time now?

ويجاوبك، ولما توصل المكان المطلوب، تسأل صاحب التاكسي كم تبي؟

How much money you need?

وتعطيه، وتجي تشوف أخوك، وتسأله ليش تطلع بدون ما تقولي؟

Why you go without tell me, why?

<معصّب عاد انت .
ويجاوبك عاد.
وتسأله متى طلعت بالضبط؟

When you go outside?

ويجاوبك عاد.
وانت سبق وشفته مع شخص ما تعرفه، وتسأله عنه،
منهو ذاك الشخص اللي كنت معه؟

Who is that person?

ويجاوبك.


نجي للشعور Feeling
يوم تشتري سيارة تكون سعيد وبتوصف هالشيء تقول:
I feel happy now يعني مبسوط الحين.
بس يجي واحد يصدمك من وراء، وتوصف الشعور خخ:
I feel not happy أو تقول I' feel sad
وتنزل من سيارتك، وانت بقمة الغضب وشعورك الحين زي كذا "بوصف اللي صدمك"
He feels an angry "عز الله رحت وطي ".
ويصفق فيه صاحب السيارة المصدومة، ويوصف شعورة اللي تصفق:
I feel hurt
وعاد كملوا القصة لحالكم .

استخدام Have و Has
ببساطه Has تجي مع He, She, it
والباقي مع Have اللي هن I, You, we, they
مثال:
I have pen
He has pen

They have cars
She has no car

بكذا خلص الدرس الأول.
اتمنوا استفدتوا من اللي كتبته
واللي يشوف إن فيه أخطاء يعطيني خبر
عشان نصححه، ونتلافى هالأخطاء .

دعواتكم .

[حسين عبدالعظيم]

يعطيك العافية Mr Ae

بس عندك كذا حاجة بالأسئلة لا مؤاخذة ^^

Where are your place, tell me?

تصير
Where is you place?

لأنك تسأل عن المكان والمكان مفرد ^^

أو تسأله Where are you ?

What is the time now?

صيغة السؤال عن الوقت كذا

What time is it ?

How much money you need?

تصير كذا How much money do you need

Why you go without tell me, why?

تصير كذا Why did you go without telling me

When you go outside?

تصير كذا When did you go outside

He feels an angry

بشرحي أنا نسيت ـآحط a بس انت حطيتها زيادة =P

a او an معناتها one يعني واحد وتجي قبل الأسماء بس

مثلا ً a cat

يعني تصير الجملة He feels angry

ؤ بس يعطيك العآفية ^^

[{ Smile Love •»]

وااااااااااااااااااااااااو
بصراحه شرحك خطير ومفهوم وربي فهمت ع طول
وعرفت الحين وش كانت تتكلم عنه المحاضره
يعطيك الف عافيه
سلمت يداك ع هالشرح الحلووووو
بصراحه مدري شقول بس من جد الله يسعدك
ويوفقك ويحقق كل امنيااااتك <<طالعه من قلب
ودي
{ Smile Love •».

[ام ثامرر]

طيب وش حل المناااقشه الاولي ؟؟؟؟

[أم زيد القمر]

مشكووووووووووور على التوضيح

[أم زيد القمر]

جزاك الله خيرة

[أم زيد القمر]

:106:

[i.Ae]

المشاركة الأصلية كتبت بواسطة حسين عبدالعظيم

يعطيك العافية Mr Ae

بس عندك كذا حاجة بالأسئلة لا مؤاخذة ^^



تصير
Where is you place?

لأنك تسأل عن المكان والمكان مفرد ^^

أو تسأله Where are you ?




صيغة السؤال عن الوقت كذا

What time is it ?



تصير كذا How much money do you need



تصير كذا Why did you go without telling me



تصير كذا When did you go outside




بشرحي أنا نسيت ـآحط a بس انت حطيتها زيادة =P

a او an معناتها one يعني واحد وتجي قبل الأسماء بس

مثلا ً a cat

يعني تصير الجملة He feels angry

ؤ بس يعطيك العآفية ^^

الله يعافيك.
وشاكر لك تصحيحك.
القواعد سيء فيها ، وبحاول اطور نفسي فيها.
ابدعت بالتصحيح.


He Feels angry
اللي أنا كتبتها كنت شاك فيها، وزين إنك صححتها، ووضحت الأمر.

{ Smile Love •»

الله يعافيكِ.
زين إن الشرح طلع بفائدة ولو لشيء بسيط للطلبة.
الشرح العامي مرات يثبت ولو كان فيه قصص يثبت أكثر .

لذلك أنا أحاول أطور نفسي بالقواعد من هالناحية
بقراءة قصص قصيرة ومنها أعرف للقواعد ولو بشيء بسيط.

[تآج القلوب]

والله ان المحاضره الاولى حقت الانجليزي
مجرد مراجعه عن مااخذناه في الثانوي
والمتوسط
ماشفت شي جديد

بس اقولكم
متى تنزل المحاضرات الثانيه ؟؟

[Sugerofeyes]

مشكوووورر الله يعطيك العافيه