[ اسئلة اختبارات ] : نصيحة للكل ..

[مريم البقيلي]

السلام عليكم ورحمة الله

عندي ملاحظة بسيطة و اتمنى الكل يتقبلها بصدر رحب لانها في مصلحتنا قبل اي شي


لاحظت ان بعد كل اختبار تنفتح مواضيع سلبيه و محبطه و تحرض الطلاب و الطالبات هنا على شي يضرهم فعلا

حكاية ان كل ماده نرفع فيها تظلم او ننزل موضوع يعطي انطباع ان الاختبار مره صعب و الدكتور ظالم و حسبي الله عليه ومن هالكلام الي كثير من الاحيان يكون ماله اساس

صدقوني بيرجع ضدنا ..

اولاً كثرت التظلمات بتخلي ادارة الجامعة تتجاهلنا نهائي و اذا كان معنا حق بيوم ما مارح تتجاوب معنا لان الواضح لها اننا دفعه غير مسؤوله و نبي الدرجات على البارد
اما اشاعة ان كثرت التظلم تجبر الجامعة على الترفيع بالدرجات او ما شابهه ترا هالكلام مو منطقي
الا اذا كان في سبب حقيقي يثبت ظلم الدكتور للطلبه
و بالعموم اغلب الدكاتره متعاونين و من نفسهم يتواصلون مع الادارة و يضيفون درجات لكل الطلاب
و نتايجنا في المستوى السابق تشهد بكذا


اما فيما يخص الاختبار صعب و ليش كذا وشكلي بحمل الماده

والله ياجماعه الاقدار بيد الله و الله مايسر لنا فرصة هالتعلم الا و هو رايد لنا الخير فيها بأذن الله
فليش نتسخط على نعمه ربي علينا و نوتر الطلاب كلهم حتى الي طالع مرتاح شوي من الكلام الي يقراه هنا
بيشيل هم ليوم النتيجة و رح يأثر على اداءه في باقي الاختبارات ..
هذا غير الي لسا ما اخذوا الماده ..
كلامنا السلبي عنها بيخوفهم .. وممكن يأجلونها مستويات كثير كله بسبب الخوف
مع ان لو اخذوا الماده ممكن يندمون انهم ما نزلوها من اول وكان ممكن ترفع لهم معدلاتهم


ياجماعة خطة هذا المتسوى ٧٠٪ واكثر مواد عامه و واضحه جدا و فرصه الواحد يرفع فيها معدله
هذا ما يعني انها لازم تكون مثل مادة ( الخط) ايام الابتدائي و غير كذا ما تتقبلون

اي شي بالحياه محتاج تعب و التعب ذا هو ضريبة الشي الي انت تتمناه
مافي شي فالدنيا ببلاش .. كل شي له ثمن و محتاج جهد ..

فالله يرضى عليكم لا تصعبونها على بعض ولا تضرون انفسكم
خليكم موضوعين و التظلم او الشكاوي لا ترفع الا فيما يستحق فعلا
عشان الجامعة تتجاوب .. و نعطيهم انطباع اننا فعلا انظلمنا بهذا الشي
مو نلعب و بس ..

انا مقدره صعوبة بعض المواد على البعض و اقدر الفروق الفردية و الظروف
بس اتمنى من الي عارف نفسه ماذاكر الماده لا يعلق انها صعبه و يحبط غيره
و الي حاس ان هالماده مو ميوله ولا يقدر عليها لا يعلق بعد

مو حجر على رايكم لاسمح الله لكن عشان الي يمر علي المواضيع يبي كلمه تدعمه و تفيده بشي مو تعليقات بدون مبرر توتره اكثر

موادنا ورى بعض ولو تحطمنا من ماده رح نزهد بباقي المواد و ما نذاكرها زين

وهنا بنخسر كثير

و انا اكتب لكم الان و والله مو ضامنه درجات ممتازه بكل المواد ولا انا من الناس الي تاكل الكتب اكل
لكن املي بالله كبير واعرف كويس ان على قد ما اتعب ربي بيعطيني .. وهذا لوحده كفيل يخليني ارتاح مهما كانت نتيجتي فياريت الكل يكون عنده هذي القناعه

اعتذر على الاطالة بس كلام بقلبي و قلته

المنتدى هذا باب فائدة لكل الطلاب .. فتمنيت ان الفائدة هذي تشمل كل النواحي

[hamad_4g]

سلمت يداك
ليت قومي يعلمون

[ابوإلياس]

صدقتي.....

[7ala ali]

كلامك سليم 100% ربي يجزاك كل خير.. و أنا وحدة من الناس اللي من كثر الاحباطات اللي أشوفها و الله حتى الحلم صرت أحلم في الاختبار و كيف أنه كان صعب و ممكن أحمل المادة :(

[mohamed!]

كلام عين العقل
فعلا البعض يحط التقصير على الدكتور او الجامعه هو اصلن ماراجع و اختصر بمراجعه اختبارات الاعوام السابقه
قبل ماترفع تضلم شف هل انت فعلا كنت مراجع بصدق ام لا

[شوقه2]

كلام سليم

[فيصل الطامي]

الي آششوفه آنه آدآرة الجآمعه شكلت لجآن خآصه في متآبعة تظلمآت الطلاب ...

والي عليهم آنهم يتآبعو تظلم آالطالب والاخذ بحقه آذآ له حق في هذآ ... طالب طالب

آمآ كلام آنه اذا كثرت التظلمات ماراح احد يلتفتلها فهذا تقصير من ادارة الجامعه وشي محااسبين عليه في الاخره اذا لم يتحاسبو عليه في الدنيا...ومعناه انه فيه مشكله بالكادر الوظيفي عجز ولاكسل ولا مالي خلق لهم


آمآ سالفة انه الطالب ينجرف ورا كلام الناس هذا صعب ولا سهل بدون مايطلع بنفسه على الماده ويششوف اختبارات الماده من قبل فهذا انسان مايعرف يقدر الامور بصراحه ...


آوآفقك على بعض ماجا في كلامك ..ويعطيك الف عآفيه

[يوسف العضيله1]

يعطيك العافيه كلامك سليم ١٠٠٪

[ع.ف.ل.ج.ج]

مايذاكرون عدل وبعدين يتهمون الدكتور بالظلم

انا ماقول اني حليت زين بس اشوف ان الدكتور له حق يحط اي سؤال يبيه مو ملزوم يحط لنا اسئله مكرره وقديمه
وشكرا

[خطوة بخطوة]

اذا كان شرح الدكتور وافي وكافي اللوم ع انفسنا
اما اذا كان دكتور المادهـ يبربر ع قل سنع وكلامه انشائي هذا مانبيه لانه مو في مكانه الطببيعي واولهم المحارفي والدكتور محمد فتحي هالمادتين تابعتهم على اليوتيوب المحاسبة خالد عطية والانجليزي د عمار اعتقد
قارنوا بين الدكاتره راح تشوفون الفرق الشاسع بينهم
المحارفي محمد فتحي مو في المكان الطبيعي
غير كذا الوقت ضيق جدا ونشوف الترم الجاي متى يحدثون الانظمة اعتقد بعد الدراسة الفعليه بشهرين
وغير كذا جدولة الاختبارات فما ندري نعاتب الجامعة او الدكاتره او انفسنا
الدفعات السابقة شوفو من دكاترهم ونتم تعرفون ليه متفوقين