اتمنى شرح بسيط للتخصصات التقنية في كلية الجبيل

[MOHAMMED.S.S]

بسم الله الرحمن الرحيم

أخواني طلاب الكلية
انا أفكر اختار تخصص الميكانيكا
لكن محتار بترتيب باقي التخصات لأني لا أعرف طبيعتها ابدا
اتمنى الي عنده معرفة بالتخصصات يشرحها لي جزاه الله خير
(مميزات + عيوب + نصائح + فرص وظيفية + طبيعة العمل في المستقبل + التخصصات الي بها إمكانية اكمال البكلوريوس)
>> ياليت الي عنده اي معلومة يقدر يفيدني بها ما يقصر <<

تقنية المعلومات و الحاسب الآلي
تقنية هندسة الفحوصات الاإتلافية و تقييمها
تقنية الهندسة الكيميائية
تقنية هندسة القوى الكهربائية
تقنية هندسة الآلات الدقيقة والتحكم
تقنية هندسة التصنيع
تقنية هندسة البوليمرات
تقنية الكيمياء الصناعية
تقنية هندسة الصيانة الميكانيكية

في انتضاركم

[Deva]

التخصصات اللي تقدر تكمل عليها بكالوريوس في الكلية موجودة بالرابط
http://www.jic.edu.sa/ar/admission/P...chRegSoon.aspx

رح لموقع الكلية وشوف كل تخصص واش المواد اللي يدرسونها وهل تناسب رغبتك وميولك او لا
http://www.jic.edu.sa/ar/academics/a...s/default.aspx

وهنا وصف لجميع المواد في جميع التخصصات ما عليك الا تشوف رمز المادة
http://www.jic.edu.sa/en/academics/D...g_19062014.pdf

[silver NEO]

السلام عليكم ورحمة الله وبركاته

ما اقدر افيدك الا بتخصص الآلات الدقيقة .. التخصصات الثانية ما عندي معلومات موثوقة عنها
..

لكن بالنسبة للميكانيكا حسب ما سمعت من اخوياي التخصص ممتع وداومه يكون خفيف بطبيعة الدراسة كل شيء تطبيق وكل شيء تراه بالعين .. مو مثل الكهرب مثلا ..

لكن خذها قاعدة المواد العامة هي اللي تكسر الظهر في اول سمستر في الكلية مثل الكالكولس والفيزياء والكيمياء .. + المواد اللي لازم تدرسها من التخصصات الاخرى مثل طلاب الميكنيكا لازم يمرون بـ مادة المشين حقت طلاب الانسترومنت والكهرب .. والانستروت لازم ياخذون مادة من تخصص الكيمياء وهكذا


بالنسبة للتخصص الآلات الدقيقة ..
Instrumentation and Control Engineering Technology
تقنية هندسة الآلات الدقيقة والتحكم

( من وجهة نظري وتجربتي الشخصية يعني يمكن يكون في أخطاء في معلوماتي فلا تعتمد كل اللي تقراه وتتفاجاء بعدين بشيء ثاني وتدعي علي )



بصفة عامة التخصص يعتمد على الفهم بنسبة كبيرة جدا عن الحفظ ( الحفظ للقوانين والتعاريف والتحويل بين الوحدات مثلا (كيف تحول من feet الى in )

المميزات

-تخصص نادر جدا تحصل كلية او جامعة تدرسه في الخليج وهذا يخلي الشركات تاخذ طلاب من الكلية ..


- التخصص فيه مواد تعلمك أشياء كثير حلوة ومفيدة .. مثلا كيف الأجهزة الإلكترونية اللي حولنا كيف تشتغل .. وكيف يتم برمجتها وكيف يتم اصلاحهها .. راح تكتسب معلومات كثيرة جدا يجهلها نسبة كبيرة من اللي حولك وحتى العالم كله ..!

- المختبرات الخاصة بمواد التخصص جدا ممتاز وبشهادة من منظمة ابت العالمية ومحاكية لما يتواجد في المصانع ..
في اجهز في مختبر واحد قيمتها فوق 7 مليون ريال !!

في ميزة حلوة ^^ ان المبنى حق التخصص ( مبنى الكهرب ) صغير بس يضيع شوي .. ما فيه الا تخصص الآلات دقيقة وتخصص باور والمواقف قريبة مرة منه وكثيرة ^^ ما تتعب تدور موفق من الغرفة للمبنى على طول ..

في ميزات ثانية ما تحضرني الحين ^^" اتمنى احد يفيدك غيري


العيوب

- تخصص يعتمد على الخيال اكثر من الشيء الملموس بعكس تخصص الميكانيكا .. وهذا يخليه اصعب للفهم .

- ما في شيء اسمه خلصت المادة ونجحت فيها انساها .. بالعكس تحتاج كل شيء تعلمته تقريبا في جميع مراحل الدراسة !! وحتى بعض المواد العامة مثل الكالكولست ( التكامل تحتاجه بعدين ) والفيزياء ( كيف تلعب بالمعادلة .. الخ ) .

- للأسف مشهور بين الطلاب ان مدرسين مبنى الكهرب من أسوأ المدرسين .. وصراحة بحكم خبرتي اقول لك في مدرسين لو تنجح عندهم يسلمونك ميدالية الكفاح !! .. والعكس صحيح في مدرسين عسل ويسهلون كل شيء ..

عموما لا تركز كثير على المدرسين لو عاجبك التخصص ولا يكون عذر انك ما تدخل التخصص ..
وخذها قاعدة كل واحد وله نظرة مختلفة عن المدرس البعض يشوفه ممتاز والاخر بنفس الوقت يقول فاشل ..



ما تحضرني عيوب اكثر لان بصراحة اشوفه تخصص حلو .. يمكن يجي غيري يقول لك الف عيب ..


الفرص الوظيفية :

بصفة عاملة لكل الخريجين وكيل الكلية الدكتور عادل باحكيم صرح بنفسه ان نسبة توظيف الطلاب بعد تخرجهم مباشرة = 98%

إن شاء الله وظيفتك مضمونة بس طبعا لازم يكون معدلك عالي وكل ما كان عالي كانت لك الأولوية في الوظيفة والأولوية في الشركات القوية ..

مع كذا خل في بالك هالمعلومة : تخصص الالآت الدقيقة مطلوب بشكل اقل في الشركات بعكس تخصص الميكانيكا .. مثلا اذا كانت الشركة وظفت 50 شخص . فراح يكون منهم 5 الآلات دقيقة و45 ميكانيكا ..

لكن مع هذا كثير توظفوا ويبقى ان الموضوع قضاء وقدر من الله سبحانه
الله يرزقنا واياكم ..

طبيعة العمل :

بصراحة ما عندي خلفية كبيرة او خبرة لاني باقي ادرس .. بس اللي فهمته وسمعته ان دورك يكون في ضبط واصلاح اجهزة القياس والتأكد انها تعطي قرائات صحيحة ودقيقة ولو كنت مهندس ممكن تكون انت من يختار القطع والاجهزة اللي تحتاجها الشركة مستقبلا او تطور أنظمة التحكم ..


البكالوريوس :

تقدر تكمل بكالوروس في الكلية وهذي شروطهم واتوقع عدد معين وعلى حسب دفعتك .. صاحب المعدل العالي فرصته اكبر ..


يشترط في المتقدم للالتحاق في برنامج البكالوريوس ما يلي:-

1. أن يكون الطالب سعودي الجنسية أو من أم سعودية.
2. أن يكون المتقدم أحد خريجي كلية الجبيل الصناعية وأن لا يقل معدله التراكمي عن (2.45 من 4.00).
3. أن يكون المتقدم حاصلاً على شهادة الدبلوم في العلوم في التخصصات التي يتم الإعلان عنها.
4. أن لا تزيد مدة حصوله على شهادة الدبلوم في العلوم عن (5) سنوات.
5. أن يجتاز الكشف الطبي.
6. يجب على الموظف في القطاع الخاص أو الجهات الحكومية تقديم خطاب تعريف من جهة العمل مفاده بأنه لا يزال على رأس العمل.
7. ان يكمل الطالب بنجاح دراسة أي مقررات تأهيلية أو تكميلية يقرها مجلس الكلية كشرط للالتحاق ببرنامج البكالوريوس.
8. ان يستوفي أية شروط اخرى يقرها مجلس الكلية.

معلومات بسيطة عن اول بلوك في التخصص

الضغط يكون في أول سمستر من التخصص .. خاصة من المواد العامة الموجودة في كل التخصصات التقنية مثل الانجلش والكالكولست والفيزياء :

مواد اول سمستر في التخصص

كالكولست Calculus 1 ( مادة عامة )
تكامل وتفاضل وغنية عن التعريف

سيركت Electrical Circuit 1 (مادة تخصص )
والمادة هذي لطلاب الباور خاصة لكن ندرسها بشكل ابسط منهم وفي البكالويس تاخذ سيركت 2


( عملي - ونظري )

العملي بيكون تقريبا تطبيق للنظري

المادة عن الدوائر الكهربائية وكيف تحسب الفلوت والكرنت في الدائرة كاملة او في نقاط محددة .. المادة فهم بشكل كامل ولها قوانين قليلة وبسيطة .. تحتاج فهم فقط واهممم شيء ممارسة على حل المسأئل وصدقني تطلع بـ A منها



انسترومنتيشن Instrumentation 1 ( مادة تخصص )

المادة بصفة عامة سهلة لكن تحتاج اهتمام كبير لانها اساس مهم جدا للـ الأنسترومنتيشن 2 وغيرها اللي تدرسها في البلوك الثالث ..

فيها قسمين ( عملي - ونظري )

النظري :

مادة فهم + حفظ للوحدات وقوانين التحويل بين الوحدات .. ومسائل على حساب مستوى المادة في الخزان + عمليات حسابية يمكن يكون فيها شوية فيزياء

في العملي:
شغلك كلها في اللاب ( المختبر ) تسوي تجارب عن اجهزة القياس وكيف اعادة ضبطها وخواصها ... ألخ .. متعة بصراحة والعملي سهل وعادة اسهل من النظري بكثير



انجلش 3 English ( مادة عامة )

كله عن الكتابة ومهاراتها .. غنية عن التعريف


ورك شوب Workshop ( مادة عامة )

هذي المادة الـ A فيها مضمون إن شاء الله ان ما كنت تغيب ومركز مادة عملي فقط


....

نصائح لك طالب في الكلية وبرى الكلية ..

- ركز في المحاضرة .. تذكر انك جاي تدرس وتبني مستقبلك وتشرف أهلك وتنفع دينك ووطنك .. فلا تضيع الوقت في الفهاوة او على الجوال او بالغياب .. واستفيد من حظورك في الكلاس .. لأنك لما تجي تذاكر بتكون في اشياء صعبة عليك وما فهمتها ويبيلك واحد يشرح لك وما في احسن من المدرس فلا تحط نفسك مواقف زي كذا بسبة انك مسرح او غايب او مطنش في المحاضرة ..


-الدراسة أول بأول يا شباب .. نظام الثانوي بطلوه ما ينفع تذاكر ليلة الأختبار .. خاصة المواد الصعبة والدسمة .. وطبق هالخلطة السرية وراح تمشيء أمورك إن شاء الله :

لما تخلص دوام وترجع الغرفة او بيتكم .. راجع اللي درسته .. لمدة ربع ساعة بس 15 دقيقة .. أقرأ بتمعن وصدقني راح ترسخ المعلومة في راسك + تحل مسائل لو في .. صدقني لوتقفل الكتاب وقتها وما تفتحه الا ليلة الاختبار تلقى كل شيء سهل ..

يمكن الطريقة تكون صعبة على البعض او اللي ما تعود يذكار كل يوم .. بس كل شيء وله ثمن ولازم تبذل مجهود عشان ترتاح بعدين .. وترى الشغلة كلها من ربع ساعة الى نص ساعة ..


- معدل عالي في اول سمستر = راحة لا تقاس في بقية السمسترات

حاول تجيب معدل عالي في اول سمستر في التخصص ويكون 3 وفوق والافضل 3.5 واكثر .. عشان بعدين لا قدر الله لو جبت العيد في كم مادة وكانت دراجتك فاشلة ما راح يتأثر المعدل حقك .. ولو انخفض ينخفض بشكل بسيط

فيكون الاساس عندك قوي وعالي

لو جبت معدل ضعيف 1.8مثل او حول 2 .. راح تعاني في رفع المعدل وبيشكل ضغط نفسي عليك .. تذكر ان كل سمستر يصير رفع المعدل اصعب وخاصة المعدل المنخفض والعكس لو كان معدل عالي يكون الانخفاض اصعب ..


- نظم وقتك للدراسة والطلعة مع الشباب ولا تخلي احد يلهيك عن هدفك

فلها وخذ راحتك بس بحدود المعقول .. اعرف طلاب مستواهم تعبان بسبب الفله الزايدة .. وأعرف طلاب شخصيا تركوا الكلية .. !


-اثنان لا يتعلمان المتكبر والخجول.



لا تستحي او تخجل انك تسأل المدرس عن اي شيء ما فهمته .. حتى لو كان تافه جدا وتذكر انه من اسط حقوقك .. فحاول ما تطلع من محاضرة الا وانت فاهم .. للأسف كثير من الطلاب يستحي .. وفي النهاية يتوهق في الاختبارات بسبة انه يستحي !!

تصرف كما يتوقع منك المدرس وهو انك تسأله في اي شيء ما فهمته ..


- ساعات المكتب .. ترى مهم جدا تروح للمدرس في ساعات المكتب .. لو كان عندك اشكالية في شيء ما فهمته ..

- الغياب له تأثير كثير خاصة في مواد التخصص لان حصص النظري عادة تكون حصتين في الأسبوع بس .. يعني لو تغيب طار عليك درس كامل والمشكلة لو كانت مادة فهم .. وحتى لو درست لحالك . ما بتكون احسن من المدرس ..
واهم شعلة هي الحرمان .. لكل مادة عدد من الساعات تقدر تغيبها .. ومواد التخصص معروف ان عدد ساعات الغياب فيها قليل .. فانتبه تداوم شهرين على حافة الحرمان .. دايم وفرها لليوم الأسود او خلها اخر اسبوعين تغيب وتفلها

- حاول تبني علاقات مع زملاء التخصص حتى تتبادلون المنفعة وحاول يكونون من اصحاب المعدلات العالية .. في حال ما فهمت شيء يكون في من يشرح لك .. + كثير من اللي بتكتشفونه بعدين من فائدة الصحبة الدافورة ^^ بس لا تكون مصلحجي بس :)

- ابدا ابدا بدا لا تفكر ان المادة صعبة
أعرف ان كل ما تجهله يعتبر صعب عليك وكل ما تعرف يكون أسهل
لما تقول عن المادة صعبة مرة .. راح تشوفها صعبة وحتى في اسهل أجزائها ..
وهذا شيء اكيد الكثير مر فيه ..
وطبعا لا تنسى تعطي المادة حجمها .. يعني لا تقول المادة سهلة وتنصدم في الاختبار


- دائم اطمح للأعلى .. لا تفكر انك تعدي المادة بس .. انا مجربها بنفسي .. وفعلا شفت النتيجة .. لو كان هدفك A+ ممكن راح تكون المادة بسيطة مررررة

والعكس صحيح لو كان هدفك انك تعدي بس بـ D اقول لك احتمال كبير جدا انك ترسب في المادة ..

..

-حكمتي الخاصة
لا تسمح لمجموعة من الكتب او الأرقام أن تهزمك .. فكما تغلب عليها من سبقك ستتغلب عليها أنت أيضا :)

انتهى

جميع ما ذكر من مجهود شخصي وان كان في أخطاء أرجوا المعذرة فأنا انسان والخطأ وارد..
..
حبيت افيدك وافيد كل من يقرأ باللي اعرفه واتمنى لكم التوفيق في الدراسة ومستقبلا ناجحا ..

أي سؤال انا في الخدمة

.. اذا قدرت افيدك فلا تنساني ووالدي بدعوة صالحة في ظهر الغيب ..

[السلام عليكم :)]

ماشالله عليك كفيت ووفيت, انا ودي على بكلريوس في نفس تخصصك, وش الفرص الوضيفية لبكلريوس هندسة الات دقيقة وتحكم؟ وهل تقارن بخريجي بالبترول؟ اكثر الناس يحسبون التخصص هذا موجود في الجبيل وينبع فقط, لكنه موجود في البترول تحت مسمى "هندسة نظم التحكم والقياس"

[silver NEO]

المشاركة الأصلية كتبت بواسطة السلام عليكم :)

ماشالله عليك كفيت ووفيت, انا ودي على بكلريوس في نفس تخصصك, وش الفرص الوضيفية لبكلريوس هندسة الات دقيقة وتحكم؟ وهل تقارن بخريجي بالبترول؟ اكثر الناس يحسبون التخصص هذا موجود في الجبيل وينبع فقط, لكنه موجود في البترول تحت مسمى "هندسة نظم التحكم والقياس"

بصفة عامة ..

كل ما ارتفعت شهادتك كل ما قلت فرصك الوظيفية .. الشركات تدور اهل الدبلوم .. فأحتمالية توظيفك مباشرة لو تخرجت ببكالوريس اقل من الدبلوم .. وسالت مدرس واعطاني اياها كاش :( .. صح انه شيء يقهر لكن هذا الوقع لو تفكر فيه .. تقدر تقول الدبلوم إن شاء الله مضمون بحسب اللي تخرجوا وتوظفوا مباشرة .. أما البكالوريس ما اعرف احد .. كل اللي اعرفهم باقي يدرسون





لو تخرجت بدبلوم من الكلية .. يكون المسمى الوظيفي لك مشغل ( Operator)

اما البكالوريس المسمى الوظيفي = مهندس

لا تنسى ان الانسترومنت مطلوب في المصانع لكن بشكل اقل من بعض التخصصات الاخرى مثل الميكانيكا .. لإما بالك لو كانت شهادتك بكالوريس ..

ويبقى كل شيء بيد الله اولا وأخيرا ..

...

لو جينا بنقارن ما عندي الكلام الأكيد لكن حسب ما سمعت من مدرسين ..

كلية الجبيل تتفوق على البترول في شغلتين كثير تهم الشركات

إنضباط الطلاب بحيث انهم طول فترة دراستهم ملتزمين بقوانين وسلوكيات مشددة مثل الحضور والغياب والمظهر

وهذا سبب مهم لأي شركة ..

والسبب الثاني ان الساعات العملية في الجبيل الصناعية للطالب أكثر من الساعات العملية في البترول

..

ما اتوقع ان البترول عندها نفس التخصص وإلا كان المسمى واحد .. ابحث في قوقل تشوف الفرق

وبعدين بشهادة طلاب كثير .. الدراسة في البترول اصعب وتهد الحيل .. وبالعكس للجبيل وفي النهاية فرصتك كمتخرج من الجبيل أفضل بحسب ما سمعت ..


بصراحة ماني متأكد 100% .. لكن هذا الكلام المتداول بين الطلاب+ المدرسين عندنا

+ اسأل قبل ما تختار اي تخصص .. انا قلت اللي عندي عن تخصصي بس وانصحك تستخير قبل كل شيء وتشوف ايش التخصص اللي راح يناسبك أكثر وترتاح معاه وتذكر انه قرار مصيري راح يبقى معاك طيلة حياتك


وحياك الله في أي وقت

[السلام عليكم :)]

صحيح كلامك ماهو نفس التخصص بالضبط, اللي في البترول يركز عالجانب النظري اكثر على حسب ما قريت عكس الكلية يركزون فيها عالجانب العملي بشدة, عالعموم الله يعين الجميع

[silver NEO]

السلام عليكم ورحمة وبركاته ..

(حبيت اضيف معلومات زيادة دام اني فاضي ^^" ) ..


هذي الخطة الدراسية للتخصص ..

فيها جميع المواد المقررة + ساعات الدراسة

واللي يمشي على الخطة هذي راح يخلص الدبلوم في سنتين ..

ملاحظة : تقدر تقلل عدد ساعات الدراسة عن طريق الترم الصيفي تنزل فيه مواد عامة مثل

Technical Writing
Computer Applications
Organization Behavior and Ethics
Islamic Culture

مادة Elective على حسب المواد الي تنزلها الكلية في الترم الصيفي ..

...

الخطة الدراسية لتخصص هندسة الآلات الدقيقة والتحكم










رابط الخطة من موقع الكلية للي ما تطلع له الصورة أضغط هنا

+ الصورة موجودة في المرافقات

...


راح احاول قد ما اقدر اضيف كل شيء يطرأ علي ممكن يوضح لكم شيء او يساعد في التخصص إن شاء الله
وياليت اي واحد عنده ملعومة ولو بسيطة او نصيحة ما يبخل علينا ..

بالتوفيق

[هاووي لعب]

والله أنصحك بالمكانيكا صيانه الفرص الوظيفيه كثيره + تخصص تشوفه مو كذب زي الكهرباء والانسترمنت يقول سيل من الالكترونيات هههههههههههههههه وبالأخير الأمر راجعلك بس والله بقولك بالنسبه لي من أفضل القرارات إلى اتخذتها بحياتي اني دخلت ميكانيكا والله ييسرلك وانت أسأل الطلاب نفسهم وان شاء الله ما يقصرو معك وتري مجرد دعابه يا أهل الكهرب

[kitchen]

أدخل الميكانيكا افضلك ,المدرسين زي العسل مو مثل مدرسي الكهربا كلهم نفسيات ,اهم نقطة جب معدل عالي في التحضيري علشان تدخل ميكانيكا لان التخصص ذا عليه زحمه كل ترم زي تخصص الهندسة الكيميائية ,وفي نقطة حاب اوضحها الميكانيكا نوعين :اولا هندسة التصنيع وهاذا يتكلم عن اللحام والخراطة والتصميم الهندسي والثاني هندسة صيانة ميكانيكية وهو اللي يتكلم عن الصيانة وايضا عن الميكانيكا بشكل عام .

[silver NEO]

تعديل يا شباب ..

المسمى الوظيفي يمكن يختلف من تخصص لآخر ..

لكن في الالآت الدقيقة يكون المسمى الوظيفي فني Technician