مجرد تعبير عن رأي شخصي

[nadak]

السلام عليكم ورحمة الله وبركاته*

اتمنى من اللي يدخل موضوعي يستاسع صدره لكلامي ويفكر قبل اي رد*

دائماً اقرا هنا في المنتدى *استنكار الطلبه من التفرقه الحاصله بين طلبة الانتظام والانتساب في الوظايف والمراتب وانه احنا درسنا وتعبنا وحالنا حال المنتظمين الفرق ان الظروف ما سمحت لنا نداوم في الجامعه*
واذا احد قال الانتساب تتخرجون ما براسكم علم نعترض ونطلب عدم التعميم الاغلبيه تدرس وتتعب ويذاكرون من بداية الترم وممكن يكونون مجتهدين ومهتمين اكثر من اغلب طلاب الانتظام وسواء كان انتظام او انتساب اذا جا الموضوع للعلم هذا يرجع للشخص نفسه ولو الانتساب فعلاً بهذي السهوله والموضوع قبل الاختبار ذاكر اسئلة الاترام السابقه وتنجح كان كل الطلاب مستواهم ومعدلهم واحد !!*
كلام سليم وانا من المؤيدين لهذا المنطق وبشده ومن وجهة نظري انه خريج الانتساب خريج تحدي*

لكن في المقابل استغرب من اللي اذا واجهنا اي صعوبه سواء في المادة او اسئلة او مقرر او مع دكتور قالوا احنا انتساب مو انتظام !! (عفواً !!! كيف نطالب بحقوقنا واحنا اول من يسلبها )*
ويطالبون بتسهيل الاختبار وتقليل المقررات وحذف بعض المواد لاننا طلاب انتساب ولو اردنا التعلم والدراسة لانتظمنا !!! ( كيف نطالب احترام شهادتنا وعلمنا واحنا اول من قلل من شئنها !!)*

صحيح النسبه الاكبر فينا غير متفرغ ومرتبط بمسؤوليات عائليه ووظايف وتاركين الدراسه من زمان ومجرد الرجوع لها بعد هذا العمر فيه صعوبته لكن هذا كله مو مبرر وهذي الصعوبات كلها تزيد من قيمة الانتساب ما تقللها دراستك في هذا العمر وهذي الظروف (اختيارك) مافيه عمر محدد للدراسه ولا ظروف معينه بالعكس كل ما كبر الشخص كان انضج واكثر قدره على الاستيعاب وكل ما زادت مسؤولياته زادت حاجته للتقدم والتطور وكل مرحله في الحياة لها اولوياتها بترتيب اولوياتنا نحدد وين الدراسة اذا ماهي من ضمن اولوياتي بتكون عبء علي انا في غنى عنه*
*كل اب و كل ام قرروا يكملون تعليمهم انتم مصدر فخر لابنائكم وكل موظف رغم ضغوط العمل والحياة قرروا يكملون ويطورون نفسهم انتم مصدر فخر ورمز للارادة والتحدي وكل شخص قرر يكمل قرارك هذا لانك محتاج هذا التحصيل بصرف النظر عن السبب.*

فيه اشخاص تحسسني انها تبي تشتري شهاده والسلام كأن الموضوع طباعة ورقه من خدمات طالب ( لا ياجماعة الخير الموضوع مو كذا ) لا تسيئون لانفسكم ولغيركم بهذا التفكير احنا نبي شهادات تنفعنا وتوظفنا ما نبي شهادات من جامعات او نظام سيء السمعه من قبل ما تجي والسبب رأي طلابه !!*

صحيح فيه دكاتره اساؤوا لنا في اسئلتهم وطريقة شرحهم *وانظلمنا بتقصير الجامعه في بعض الامور لكن مو كل مادة ما جاوبت فيها زين اروح اشهّر فيها وفي النظام ..فيه فرق بين اني اشكي ثلاث دكاتره واكتب عنهم وبين ان الشكاوي تصير على عشرين دكتور ليه لمجرد اني ما جاوبت زين وان الدكتور ما راعى اني طالب انتساب !!!!!!!!! ليييييييه كذا ليه اقلل من قيمة نظام انا لجأت له حتى اتساوى اجتماعياً ومهنياً مع خريجين الجامعه
كثرة التظلم والشكاوي يفقدنا مصداقيتنا .. اتمنى منكم ان اي اعتراض او شكوى على ماده او دكتور تكون حسب الاغلبيه *يعني اذا الماده طلع فيها كم واحد يقول انا ما اشوف اللي تشوفون خلاص ماله داعي نكتب في كل مكان كفايه عليك التظلمات في موقع الجامعه والواحد يكون صريح مع نفسه هل انا اعطيت الماده حقها خلال الترم ؟ بعد علشان الواحد ما يكون ظالم *اي تشهير في اي دكتور بدون وجه حق يعتبر ظلم له فيه دكاتره متعاونين اذا ارسلوا لهم طلابهم او حاولوا يتواصلون معاهم يردون عليهم ... لكن الظلم يكون من الدكاتره اللي ترفض الرد او تختفي*

اتمنى من كل شخص في هذا المنتدى يتذكر ان اللي جمعنا هنا هدف واحد وهم واحد وهو التخرج والشهاده والمساواة بخريجين البكالوريوس وبكرا احنا كلنا بإذن الله بنكون خريجين نظام التعليم عن بعد وشهادتنا (انتساب)-هالكلمه اللي مزعله كثير - ياليت نحاول نرفع من قيمتها او نعطيها قيمتها الفعليه لانها برغم اختلافات التفكير لكن محد جابها بالساهل بلاش نكون احنا من يقلل من قيمتها او يحطها بدرجه اقل من الانتظام ويحسس العالم انه المفروض تعطى باسهل الطرق والدراسه تكون فيها رفع عتب لانها مع هذا التفكير اللي للاسف موجود بالعالم (وللاسف الشديد طلابنا يأكدون هالفكره بطلباتهم) ماراح نحقق اي هدف فيها وبتكون فعلاً ورقه مطبوعه تقول انا لنقص وتقصير فيني جبت هالورقه.*

وسلامتكم ...*
*

*

[Silent Light]

وعليكم السلام ورحمة الله وبركاته ,,,

أولا جزاك الله خير على حرصك وتعبيرك الراقي ..

ثانيا :

بإذن الله إننا لا نسيء فهم الإنتساب ولا نسيء فهم الشكاوي ..

ولكن أختي الكريمه .. أعجبني جدا تطرقك لأمور إيجابيه حيث أن فعلا لا نجعل ضروفنا تحكم مستقبلا وهذا يعتبر ( تفائل ) و ( همه )

وأيضا حينما تطرقتي إلى ( كون الأب والأب ودورهم الكبير في تكوين المستقبل والدرجه العلميه والحاجه للدرجه العلميه )

وأيضا ( أن نحن من قررنا هذا المصير )

وحينما تطرقتي إلى الحاجه للدرجه من اجل الشأن الإجتماعي

:

بارك الله فيك

:


حينما أتطرق لبعض الأمور أجد أن هنالك إختلاف في الآراء بيني وبينك وبين الكثير ..

والرأي ( يحتمل ثلاثه .. إما مع .. أو ضد .. أو لا أعلم )

وكل شخص منا مسؤول عن كلامه ويعبر عن نفسه وكل منا لابد أن يحترم الرأي الآخر ..

______


بالنسبه لتقليل قيمة الشهاده :

ليس هنالك ما يقلل من قيمة الشهاده بإذن الله .. لا الشكاوي .. ولا الإقتراحات ..

إذا كانت للمصلحه العامه ..

( إذا النظام الدستوري للدول .. تجدين لها مؤيدين ومعارضين )

أعني بهذا .. أن ليس هنالك نظام سوف يخدم الجميع .. بل هنالك بعض الثغرات ..

الجامعه لم تقصر أبدا معنا في شيء .. خاصه بعد ان مسك الدكتور الفريدان .. ولكن لا يخفى عليك أن الطالب هو ( الأساس للجامعه .. لولا وجوده لما كان هنالك جامعه بالأصل )

لذلك توجد بعض السياسات ضد الطالب .. وأيضا بعض الخطوات ضده .. وبعض القرارات والأسئله و و إإلخ

( فماذا تتوقعين بعد ذلك .. ) إبتسامه عريضه وإنتهينا ..

( أنا معك في نقطه جدا مهمه ذكرتيها ألا وهي )

طريقة المذاكره .

أنا معك 100% أن لابد المتابعه من أول الفصل .. ولكن تأبى بعض الأحيان الضروف هذا الشيء ..

والجامعه غير مسؤوله عن ذلك ..

ولكن ( أؤكد لك أن يكفي الطالب في المواد النظريه .. 4 ساعات مذاكره فقط حتى لو لم يفتح المنهج )
وهي تختلف من شخص لآخر ..

والعمليه ( يومين بالكثير )

صدقيني هذي كفيله في أن يأتي الطالب بما يقارب 70% صح ..

الطلاب هنا طلبو حقوقهم .. والبعض لا تنطبق عليهم لأن أموره تمام وماشيه ( زي الفل )

مثلا :

الإشعارات برسائل الجوال .
رصد الدرجات .
طريقة وضع الأسئله ( لبعض المواد ) حيث الإلتفاف والرمزيه .
التواصل المعدوم مع دكتور الماده نسبيا حيث أن العميد أفضل منهم.
أمور أخرى بإمكانك التصفح في المنتدى ومعرفة ذلك

:
:

أختي أنا معك بما تقولين .. ولكن حينما يطلب الطالب حقه ( يطلبه كما يشاء )

الشهاده لن تتأثر بشيء ولا متانتها ..

تخرجو طلاب قبلنا وكانوا يشتكون اكثر منا .. مع ذلك وجدو مبتغاهم

لا أريد الإطاله عليك صراحه لا ينتهي الكلام في هذه المسأله

ولكن أهم الفكره وصلت


شكرا لك وعلى رقيك

تحيتي

[nadak]

شكراً لمرورك ومشاركتك

انا ما اختلف معاك بحق الطالب بالتعبير والمطالبه بحقوقه وانا من ضمن المطالبين بكثير من حقوقنا ومشاركه معاهك وحتى في الشكوى والتظلم لكن عتبي كان على من يضع ضمن مطالبه الرأفة بحالنا كوننا انتساب ومراعاة ذلك وكاأن هذا السبب في صعوبة المادة او الأسئله وهذا الكلام غير صحيح لانه يشعر المسؤول بتقصيرنا او حدود امكاناتنا وكما ذكرت من حق الطالب التظلم في موقع الجامعه ومراسلة الدكتور

ولكن في المواقع العامه مثل التعليق في الجرايد وتوبتر اتمنى مراعاة الاسلوب والصوره التي نعكسها في مطالبنا وشكاوينا


اشكرك اخي silent light اسعدني تعليقك
شكراً لك
*