وقفله لما يحدث في العيد

[WALEID]

السلام عليكم ورحمة الله وبركاته
اسعد الله صباحكم بالخيرات والمسرات جميعاً
وعيدكم مبارك جميعاً وكل عام وانتم بألف خير

خلص العيد يا شباب و يا بنات وكلنا كنا مشغولين في المعايده والمواصله
فيه ناس كثير تقول العيد ما سار مثل اول لا العيد هو العيد بس الناس ماهم هم الناس اللي زمان
انا عن نفسي في ليلة العيد نمت الساعه 11 المساء .. وصحيت على صلاة الفجر وصليت في المسجد .. ورجعة البيت ... وخت شور طيب.. ومن ثم لبست ملابس العيد .. وانا نازل من البيت لقيت عمي نازل كمان معايه ورحنا انا وعمي للمصلى حق العيد وصلينا ورجعنا البيت.. دخلت بيت الوالده الله يحفضها ويطول في عمرها وعمر امهاتكم كلكم وعايت عليها وعايدت على خواتي واخواني وكان البيت كله فرحه وحلاو والاطفال صاحين وزي العاده عيونهم ماهي لي عيونهم للجيب ينتظرون العيديه وزعت عليهم العيديه وبعدها رحت لجدتي الله يطول في عمرها وعمر جداتكم كلكم ومريت على كل اللي في العماره بحكم ان العماره كل اللي ساكنينها اقاربي

وبعد ما خلصت المعايده جلست في المجلس مع عمي والوالد وخواني وجبنا الفطور والحلاو وجو الجيران والاقارب من كل مكان يعايدون .

وزي العاده ركبنا جمس الوالد ورحنا لعماني كلهم وسلمنا عليهم وعايدناهم وجيرانا وكل بيت نمره لازم يحطون في جيبك حلاوه حلاوتين هههه لين ما سار الجيب مليان .

ووالساعه 11 جبنا الغداء عباره عن ذبيحه مندي وتغدينا منها وطبعاً وانا جالس ع الصحن اشوف انواع العيون الحمراء اللي تبي بس تغسل يدها بعد الغداء وتروح تنام

ومن الشي المخجل ان المسجد اللي كان في صلاة الظهر في رمضان ثلاث اصفوف او اكثر في العيد سار نص صف الكل راح ينام صليت الظهر ورجعت البيت لقيت العالم كانهم كلهم ميتين ما فيه كائن حي صاحي والعصر كذلك الكل نايم والمغرب كذلك الكل نايم عاد انا نمت الظهر وصحيت ع اذان العصر ورحت اعايد الشياب اللي ممكن الاقيهم صاحين

المهم نمت الساعه 11 في الليل وصحيت ع صلاة الفجر وصليت ورحت اجيب فطور كبده وكمونيه وحركات كذا .. وفطرنا انا والاهل بعد الفطور بنص ساعه الكل نام عيد يا شباب يا هو عيد ما فيه احد قلت ما عندهم سالفه خليني اشوف الاصحاب والحبايب اروح اعايدهم ادق ع الاول .... ما يرد مره مرتين ثلاث ابد ماله نيه يرد ادق ع الثاني.... ما يرد هو بعد .. الثالث.. والرابع .. والخامس ما فيه الكل نايم

وبعده قلت يا رجال البس الثوب والشماغ وروح لف في السياره إلا اشوف العجب العجاب احس اني انا لوحدي في المدينه ما فيه سيارات في الشوارع ما فيه إلا العمال والشاحنات وكم سياره بس يا سبحان الله العيد ثلاث ايام يا مسلمين .. عاد كنت افكر في الناس اللي عندهم عمل اول العيد وثاني العيد يبون يعايدون العالم كيف يسوون اتوقع ينتظرون العيد اللي بعده.

وعلى الساعه 10 جوالي يدق إلا واحد من الاصحاب يدق يقول وينك قلت انا جالس اعايد شوارع المدينه قال مرني خلني افطر معاك قلت سلامات غداء الان ماهو فطور بس خلنا نروح قهوه ناخذلنا دله .. والحمد لله لقيت كائن حي اسولف معاه .

وفي الليل بعد الساعه 12 يوم جات نومتي إلى تشوف الإتصالات جايتني وصمت ام الجوال ونام

ما يسير ينقلب الليل نهار والنهار ليل ابداً ماهو صحي والمصيبه اني الاقي ناس اطفالهم اعمارهم على 4 او 5 إلى 10 سنوات ويخلونهم يسهرون لين الفجر حرام عليكم يا عالم ترا يدمر اعقولهم عدم النوم في الليل ويتاثر نموهم .

وثالث العيد اخس من ثاني العيد الله المستعان .
يعني المشكله ما هي في العيد المشكله فينا حنا اللي ما نحترم العيد ولا نحترم هذي الشعيره الإسلاميه اش اللي يمنع ما تنام ليلة العيد بدري وتجلس صاحي ومصحصح الصباح وبعد ما تصلي الظهر تنام وتصحى ع صلاة العصر وتجلس مع العالم بعد العصر وتنام الساعه 11 او 12 في الليل وتصحى الصباح ثاني العيد وكذلك ثالث العيد

ما ذبحنا غير كلمة كل الناس كذا .. هي اللي دمرتنا الله المستعان

بعد الكلام الكثير اللي انا كاتبه حبيت اشاركم بالتفصيل عيدي واتمنى الكل يشاركنا عيده
والله يوفقنا ويوفقكم للخير

[تيتشر ريماز]

ههههههه صراحة استمتعت بقراءة قصة عيدك ماشاء الله نمت بدري وصحيت بدري وعشت الجووو اللي مفروض الكل يعيشه لكن للاسف الكل صدمك بالنوووووم

صراحة من صار رمضان صيف وهو هذا حااال العيد يواصلون الناس ويصلون العيد و يعايدون شوي بالكثير الساعة 11او 12 وهم في سبات عميق ومهما حاول الانسان يجبر نفسه ينام ليلة العيد بدري ماراح يقدر يغير النظام فجأة بيوم واحد ومشكلة السهر هذي ماراح تنتهي الا لمن تبدا المدرسة ويبدا معاها الروتين والنظام حتى لو ماانا موضفة يتنظم نومي شوي على الاقل بالفعل السهر شعور مرهق ويسرق بركة الصباح واليوم عني شخصيا ذاك اليوم اللي انام فيه بدري واصحى بدري احسه اسعد يوم في حياتي ...

شكرا على الموضوع الجميل اللي طالع من قلب وكانك تعاتب به الجميع نسال الله ان يهدي الجميع ويبارك لهم في اعمارهم واوقاتهم ...

[المحترمه]

وعليكم السلام ورحمة الله وبركاته

كل عام وأنت بخير وعساكم من عواده وتقبل الله منا ومنكم صالح الأعمال

العيد مهما اختلفت البروتوكولات عند البعض نتفق بالنهايه على أنه مناسبه
سعيده علينا الإحتفاء بها وإدخال السرور على قلوب المسلمين ..
العيد لم يصبح مثل السابق للأسف تربية النشئ لم تقوم على غرس معنى
العيد مضمونا فأصبحت كالروتين ... في حين لو كان عيد الحب أو عيد الأم أو
عيد الأب وغيرها من الأعياد النتنه سـ تضج العالم بالإحتفالات الباهره
علينا أن نعيد الصفحه مع أنفسنا ... مع هدايا رب العالمين لهذه المناسبات
السعيده وعدم التضجر حتى لا تنزل علينا عقوبته


شكرآ لك عزيزي على هذا المتصفح المفعم بروح الجمال
تقديري لك

[WALEID]

اشكركِ اختي الغاليه على التفاعل الجميل
وانا كنت اسهر زمان قبل ما اتوظف وانتقل من المدينه إلى الرياض بس سبحان الله في الرياض نظمت نومي وسرة انام بدري واصحى بدري وكنت قبل ما اجي الرياض وانظم نومي حالتي سيئه جداً
ودائماً انا احط نصب عيني قول الله عز وجل في كتابه الكريم ( وجعلنا اللي سباتا والنهار معاشا )
وايضاً وردت احاديث كثيره عن القيلوله في منتصف النهار وهوا الظهر عن أنس _ رضي الله عنه _ قال: قال رسول الله صلى الله عليه وسلم: «قيلوا فإن الشيطان لا يقيل»

[حُروف آنثوية]

هههههههههههه العيد عند الكثير ثلاث فقرات
فقره غيبوبه جماعيه لين يفرجها ربي يصحون ثاني العيد
وفقره بعد الغيبوبه اسمها ماندري وش نسوي
وفقره يطلعون يفجرون بذي الطراطيع ، ارعبووونا حسبي الله
وبس وخلص العيد ، يعطيك العافيه

[F!x]

أستمتعت بقراءة قصتك
كل عام وانت طيب
صحيح كلامك عن العيد ....
وكذلك أساس العيد أيضاً الترابط الأسري وإجتماع العائله ..بهذه الفرحه

[WALEID]

اشكر الجميع على الردود والتفاعل
واعتذر عن الخطأ الإملائي في الآيه الكريمه ((( ودائماً انا احط نصب عيني قول الله عز وجل في كتابه الكريم ( وجعلنا الليل سباتا والنهار معاشا ) )))