حط نفسك بهالموقف!!!!!!!!

[سلمان اللحيدان]

الليله نزلت للسوق ومعي ولدي الله يحفظه دخلت المحل ومالقيت حاجتي وانا طالع من باب المحل شفت ولد قاعد على كرسي مقابل المحل اعطيه من 10 الى 12 سنه كان يبكي ولما شافني استحى وحاول يغير تعابير وجهه المهم قربت وسألته ليش انت مضيع اهلك وكان يقول لا لا وهو جدا متضايق حسيت ان فيه مشكله قلت انت وين اهلك هنا انفجر الولد وقعد يبكي تجمعن الحريم حولي وفيه بعض الرجال واقفين من بعيد التفت للرجال وقلتلهم الولد شكله ضايع (ليتن ماقلت هالكلمه) يوم عرفوا الموضوع كلن كمل طريقه الا واحد شباب قعد يسأل الولد عن اسمه و..و..و.. انا فتحت السياره وركبت ولدي وقلت للشاب عرفت اسمه قال لا ناديت الولد وقلت امش اوصلك للبيت فتح الباب اللي ورا وركب (انا لاحظت فيه بنتين ورجال صورو سيارتي ) قبل لاحرك قلت تدل بيتكم قال ايه دخلت يمين بيسار على وصفه وانا بالطريق كنت اساله وشفيك وليش انت لحالك كان ساكت فجأه قال وقف قلت وين بيتكم قال تكفى وقف وقفت قعد يبكي ويتكلم مفهمت شي من صياحه هديته قال تكفى لا تسوي بامي وخواتي شي صراحه استغربت وقلت وين امك وخواتك وليش اسويلهن شي انا مثل ابوك يابابا قال بنزل اصوت لامي وخواتي قلت وين قال باللفه هذي نزل ولف ورا بيت بالزاويه نزلت وراه والله شفت منظر غريب من قلب شفت مره ومعاه بنتين صغار جالسات بارض فضا وبجنب الارض بيت دور واحد وقديم بس شكله مسكون قدامه سياره (رود ماستر) رجعت لولدي بالسياره ودخلت مع اللفه نزلت للمره وقلت وش مقعدك هنا ماردت علي رجعت للسياره ودقيت عالشرطه وانا بالسياره المره وعياله قاموا وراحوا من اخر زاوية الارض ودخلوا للبيت القديم جت الدوريه ونزل العسكري الثاني واخذ اثباتي وقال رح قسم الشرطه رحت للشرطه ولطعوني ساعه ونص طبعا حققوا معي وقلتلهم السالفه شوي الا العسكري اللي بالدوريه جايب اثباتي وسألته وش الموضوع قالي الله يعطيك العافيه يابن الحل وش السالفه قال انت ماقصرت وتوكل على الله الستر زين الله يعافيك صراحة مت قهر ودي اعرف الموضوع (الصراحه ماحبيت انزل هالموضوع الليله كنت مفكر انزله بكرا لين ماعرف القصه من قريب لي بالشرطه)تهقون وش السالفه اما انا عجزت انام

[نوافذ]

الله يستر عليهم يااااااااااااارب ياااصبرهم مالناااا الادعاء لهم

[حمود السهلي]

والله مالومك شي يحير اخوي سلمان اللحيدان

[بنتـ السلطان]

اممممم يمكن متسوليين

ولا نصابين

ربي يستر علينا وعليهم

[سلمان اللحيدان]

والله ممكن هذي اللي ماطرت علي

[بنتـ السلطان]

انتبه مو اي احد يكسر خاطرك ويمثل انه فقير ولا محتاج ولا اين كان

ترى الدنيا مالها امان يمكن تشوف ناس مساكين قصدك خير تبي تساعدهم الا انهم يسون لك كمين علشان يورطونك بشغله

[*الراقيه*]

ياليت تعلمنا وش بيصير

[سلمان اللحيدان]

والله كلامك واقعي بس المفروض نقدم حسن النيه والدنيا مليانه مشاكل بس سبحان الله قعدت افكر باللي صار اولا ليش الولد بالسوق؟ممكن امه مرسلته!!اذا مرسلته وش الهدف ؟لو الام خايفه على نفسه ليش ترسله؟ولو يبون مساعده ليش دخلوا البيت؟ صراحه بديت اشك انهم متسولين لكن كل ماتذكر شكل الولد اقول الموضوع فيه شي كبير الولد ماكان يمثل والله شكله يقطع القلب يوم قال لا تسوي شي بامي وخواتي صراحه شي يقهر والله اني فكرت اروح لبيتهم قبل شوي احس ان الام كانت خايفه من شي عموما الله لايوري مسلم مكروه

[يـآرب توفـيـقكـ]

اتوقع ابوهم طاردهم

كل شيء جايز بها الزمن


الله يفرج كربتهم وييسر آمورهم

وبيض الله وجهك ياخوي ماقصرت

ترجيح بميزانك ان شاء الله

[هـمـس التميمي]

سالفتهم ما تطمّن..!!

عشان كذا العسكري قالك الستر زين


الحمدلله انك عديت بسلام