[ محتوى مقرر ] : لازم الكل يدخل بخصوص د.السقوفي والدعاوي

[nado_rs]

السلام عليكم ..

بس حبيت أنبه عن موضوع السب والشتم واللعن والدعاوي الغريبه اللي قاعدين نشوفها من بعض الطلاب بهالقسم هداهم الله ..

ارجوكم خافوا ربكم ولا تظلمون انفسكم وتظلمون الناس ..


بالنسبه للدكتور السقوفي ومادة اللغويات .. الصراحه والشهاده لله انه ماقصر ابن الحلال ..


لكن الماده هي نفسها دسمممممه دسممممه دسمممه (فهمتوا شقلت .. دسمممممممه)

هي كذا ويبي لها ياحبايبي دراسه مكثفه جدا وتعيد المنهج أقل شي اربع مرات وتترجمها بنفسك عشان تستوعب انت وش قاعد تقرأ ..

صح كلها تعاريف لكن فهموني شلون تبون تحفظون تعريف بدون لاتفهمونه ولاتدرون هو يتكلم عن ايش اصلا ولا وش يقول !!!!


جد استغرب منكم !!! واستغرب اكثر انه ما اكتفى انه ماعطى الماده حقها وذاكرها لاااا فوق كذا جاي يسبسب ويدعي على خلق الله !!! ويسقط اهماله وكسله على الدكتور !!!!

خافوا الله ياجماعه وارتقوا بتفكيركم وكلامكم .. ترى كل كلمه تنطقونها وتكتبونها محاسبين عليها عند ربكم ومحسوبه عليكم ..


لا وتتفننون بالدعاوي وتدخلون أهله معه وعياله ووالديه !!!!! أعوذ بالله وش هالحقد !!!!
تراكم مسلمين ومو هذي صفات المسلم ..

وبالعكس اختياراته اللي حاطها اغلبها واااضحه لانه مباعد بين الاختيارات يعني نادر اللي يمر عليك فيه اجابتين قراب من بعض (جزاه الله خير على هالنقطه)

وبالنسبه للتواريخ ترى حتى انا ماحليتها لكن ألوم نفسي وما ألومه لأن المحتوى كله بكبره مافيه الا هالتاريخين المهمين وكلنا خليناهم وتعيجزنا نحفظهم !!


وعلى فكره ترى أنا ما حليت كل الاسئله صح زي ماراح تتوقعون .. والله عندي اخطاء مو شويه .. بس ما ألوم الدكتور السقوفي صراحه ألوم نفسي .. ماعطيت الماده حقها .. صحيح عدت عليها ثلاث مرات عشان اقدر استوعبها شوي ومازلت مقصره لاني اكتشفت ان ماتكفيها ثلاث مرات المفروض مروقه عليها من بدري .. زي بعض الطلبه والطالبات اللي اشوفهم بالمنتدى ماشاءالله عليهم .. الله يبارك لهم فوقتهم وجهدهم ..

يعني ياعزيزي اللي ساحب على ام الجامعه طول التيرم واخر يومين قبل الامتحان توك تصحى وتبي يجي الدكتور لعند باب بيتكم يقول لك خذ ياولدي هالاسئله هدية .. ترى نظامك هذا ماينفع حتى لو كنت تدرس اسهل قسم شلون عاد متخصص انجليزي وكله كلمات جديده وغريبه عليك فما بالك بالمعلومات اللي فيه .

طولت عليكم كثير لكن والله جرحني اللي قريته من دعاويكم و اوجعني قلبي .. هالدكتور اللي تدعون عليه درس وكرف وتعب على نفسه صح واغلبهم تغرب بعد وتحمل الضيم عشان الشهاده ولقب (الدكتور) اللي تنادونه فيه .. وآخرتها يجي واحد حاط رجل على رجل ويقلب الملزمه يطالعها من برى يشوف كم ورقه ويقطها ويدور اسئلة العام ويدخل الامتحان مايدري شسالفه ويطلع يلعن ويسبسب فيه فهذا جد حراااام اتقوا الله ..

واقول للمشرفين عالقسم ارجوكم لازم تضعون شروط للمشاركه وتحذفون كل الردود المسيئه والظالمه

وانا على فكره بعد ترى جديده على قروبكم .. انا كنت المفروض الحين بمستوى ثامن لكني أجلت سنه لظروف خاصه والشهاده لله قروبنا كانوا أغلبهم ناس كبار ومحترمين جدا ويحاسبون نفسهم قبل يظلمون احد

واتوقع انتم نفس الشي كبار وفيكم آباء وامهات وموظفين ومكافحين

ولازم هالشي ينعكس على طريقتكم وتذكرون بعض دايم

ايه وملاحظه اخيره اللي يقول لخبطنا ومو عاجبه الدكتور السقوفي يروح ياخذ له نظره سريعه على محتوى العام حق الدكتور التركي وراح يعرف ان الله حق وان السقوفي بذل كل جهده عشان يبسط الماده لنا ويخفف محتواها

وبس سلامتكم

[مرتديلا]

جزاك الله خير عالكلام المقنع
الله يهدي الجميع ويوفقنا باختبار الدنيا والاخرة امين

[Rashed]

عليكم السلام ورحمة الله

الله يجزاك خير اختي

ومشكورة و ماقصرتي على الموضوع

بس اعذريني راح اقفله لانه بالاغلب راح يقلب مناقشة او نفس موضوع الانطبعات بما انه في دايم ناس تعاررض

موفقه