[ استفسار ] جايكم من مستوى خامس تكفون ردوا علي

[قصيمي شقردي]

السلام عليكم ... أنا قدر الله علي وأخذت النظريات الإجتماعيه وانا معي 4 مواد من الخامس و4 من السادس ومادة النظريات من الثامن

الموهم قبل إختبار النظريات يوم الثلاثاء صار عندي قبله بيوم استخدامةالحاسب في البحوث يعني مايمدي أذاكر النظريات

وانا كنت ناوي اضغط على نفسي شوي لكن شفت مواضيعكم عن دكتور الماده الخريف وعن أن الماده صعبه وناس تذاكر لها 3 أيام وتشتكي يعني أنا ماراح اقدر اذاكر في أقل من 24 ساعه


أبي رأيكم أدخل الإختبار ولا لا 😢

[ابومجود]

عليكم السلام ورحمة الله وبركاته

وانا اخوك تبي رايي ادخل الاختبار وتوكل على الله

بعدين الماده الي قبلها استخدام الحاسب سهله جداً

ولو فرضنا انك مادخلت الاختبار

وش الي بيصير

بيعتبرونك غياب وبتحمل الماده

الافضل لك

خل ثقتك بالله كبيره وان شاء الله راح تعديها

والله يوفقك ويوفقنا جميع

[أبو فيصل رويلي]

ادخل و قبلها ذاكر ذاكر يعني مو فاهم تطنش الاختبار وش تستفيد


اما بالنسبة للشكاوي من الدكتور الخريف فتأكد ان الناس مشتكية مشتكية صحيح انه يحط لك كم سؤال ماتدري اش حلهم لكن يجيب لك الاسئلة بشكل عام متوسطة

المشكلة مع النظريات مو الدكتور الخريف المشكلة ان المادة دسمة جدا يعني لو ابو زيد يدرسنا راح تكون صعبة



التثبيط موجود دايم عند البعض المادة صعبة نعم لكن مع المذاكرة ان شاء الله تعديها

و انت براحتك

[جميلة 83]

وعليكم السلام ورحمة الله

نصيحة استعن بالله وادخل الاختبار ولا تهتم لكلام المحبطين
حاول تركز أثناء المذاكرة من المحتوى وابدأ من البداية (المحاضرة الأولى حتى الأخيرة) قراءة بتركيز ثم استعن بالاسئلة والكويزات الموجودة بالملتقى واختبر نفسك

وإن شاء الله تتجاوزها بأعلى الدرجات
موفق والله ييسر لك و للجميع

[ميمي السنافيه]

ليه

ما يستدعي الامر انك ما تحضر

وش دعوه مو لدرجه هذي يا مسلم



ما عليك من اراء البعض عليك من نفسك الناس قدرات والبعض يكبر الموضوع وهو لا يستحق

ما عليك من تعليق البعض على الدكتور ثق بالله تؤكل عليه وادرس حتى لو اقل من 24 ساعه بيمديك ان شاءالله

ومو كل ما تقراءه تطبقه على نفسك لا مو صحيح ثق بنفسك وقل انا اقدر وانا قدها باذن الله

وبالنسبة لطريقة المذاكره عندك ملخص ثابت صفحاته قليله و راجع اسئلة العام

وهذا مرفقات مختصره وبتساعدك باذن الله

اتوقع 3 ساعات متواصله بتركيز وانت خاتمها ومريح

[abo0o0d]

اخوي انت الان اسمك نزلت الماده وا تقدر تحذفها وكل شي مع المذاكره يصير سهله وعدم دخولك للاختبار يعني رسوبك بالماده


اخوي انا عديت الماده المستوي الماضي وانا بالعاده ما اذاكر الا يوم الاختبار والحمدالله نجحت بالماده بتقدير جيد جدا يعني لا ذاكرت قبلها لا بيوم ولا بثلاث ايام انت اليوم الي قبل الاختبار حاول تبدا بالماده وبيوم الاختبار قوم بدري وراجع مذاكرتك واضمن لك الـ +a

[قصيمي شقردي]

مشكورين على الردود وماقصرتو ورفعتو المعنويه شوي لكن انا وقتي مايسمح لأني عسكري اختبر واداوم يوميا لأنهم منعو الاجازات الدراسيه يعني ضغط دوام واستلامات واختبارات لكن الاستلامات امرها سهل توكيل وانتهينا المشكله أنك تداوم من الفجر وتطلع وحده ونص تعبان مايمديك تذاكر ... عموما أنا أبدخل الاختبار وعلى الله كل شي ..... يعطيكم العافيه

[برج التطور]

بالتوفيق

[شعاع النور]

انت ماخذ ٨مواد هالمستوى حلووو

تقدر ماتحضر الاختبار وتاخذ ورقه طبيه من. اي مستشفى تعرفه. وترفعه بايقونه الاعتذار تبع الجامعه

اخوي تبي نصيحتي ادخل الاختبار حتى لو مانجحت المهم اخذت فكره عن هالمقرر وخذها المستوى الجاي
ومن ناحيه حكي الناس لاتشيل هم
الدكتور الخريف من افضل الدكاتره بالجامعه. لكن مشكلته ماياخذ الا المقررات الصعبه
وهو يهتم بالفهم اكثر من الحفظ
على فكره ترا معظم الطلبه يبون ياخذون ١٠٠بالميه عنده
وهذا مستحيل هو قاله بنفسه واسئلته متنوع تلاقي سؤاليين مدري كيف جايبها يعتمد على ذكاء
والباقي قد. جت من قبل ومرت عليك بس مسوي فيها شغلبه

الله يوفقنا ويوفقك

[ضامية]

توكل على الله وادخل ... ولاتتاثر بالمواضيع المحبطه ... انا مثلك عندي رعاية الفئات الخاصه الاحد وماقدامي الا 24 ساعه لنظريات ومافتحتها من قبل .. في نقاط مهمه ركز عليه الي هي اسئلة الاعوام الماضيه .. ماقاله في المحاضرات المباشره .. والعلماء اربط كل عالم بكلمه .. في اخت مسويه تلخيص للعلماء .. وانتهى ... توكل عى الله وقدامك التوفيق ان شاءالله