ماذآ لو كانوا متخصصون بالدراسآت الاسلاميه وهم يفتقرون الى اخلاقهآ

[طالبة بالدمام]

السـلآم عليكم ورحمة الله

اول شي اتمنى ماينحذف الموضوع لاننا من جد نعآني كثير ولا لقينا مجيب


وثآني شي فرحت يوم شفت هالموقع لان يمكن امنيتنا تتحقق ويشوفون لنا حل المسؤولين




من احآديث سيد البشر في الاخلآق التي نفتقرهآ في اكثر استاذاتنا ودكتورتنا ومراقباتنا العزيزات


قآل الرسول صلى الله عليه وسلم:

"ان من اكمل المؤمنين ايمانا احسنهم خلقا والطفهم بأهله."

"ان من خياركم احسنكم اخلاقا."

"البر حسن الخلق, والاثم ما حاك في صدرك وكرهت ان يطلع عليه الناس"

"ان من احبك واقربكم مني مجلسا يوم القيامة احسنكم اخلاقا."

"ما شيء اثقل في ميزان المؤمن يوم القيامة من خلق حسن."

"الخلق الحسن يذيب الخطايا كما يذيب الماء الجليد, والخلق السوء يفسد العمل كما يفسد الخل العسل."

"اوحى الله الى ابراهيم عليه السلام:يا خليلي حسّن خلقك ولو مع الكفار تدخل مدخل الابرار, وان كلمتي سبقت لمن حسّن خلقه ان اظله تحت عرشي وان اسقيه من حضيرة قدسي وان ادنيه من جواري."



.....


بما اني قسم دراسات اسلاميه فأول شي جا في بالي اول ماسجلت ان هالقسم ودكتوراته ودكارته ومراقباته يتحلون بأكثر الخصال السلاميه والحميده

ولكن للأسف كآن العكس تماما ثلاث ارباع القسم قليله فيهم كلمة متسلطات حقودات ماتهمهم الا انفسهم ومصالحهم الخاصه ضاربين فينا عرض الحائط


نبدا بالدكتورات

من وقت ماتدخل وهي نفسها بخشمها ماهي طايقه تعطينا المحاضره وتفتح ملزمه 1 من 6 ملازم عدد اوراق الملزمه الوحده ماتقل عن 80 صفحه

تدخل تاخذ الحضور وتجلس تقرا من تدخل الين تطلع وزياده تاخذ ساعات زياده بسبب ايش ؟ تكمل قرآءتهآ للمهج شآن تختمه وبنت ابوهآ تقول مافهمت والا دكتوره عيدي

وقبل الامتحان نسألها كيف بتجي الاسئله من مجموعة الملازم والا حددي لنا والا احذفي ماتشوفين الا عيونها طايره كنك قايله انا ذابحه ابوك

مادري تحسب عقولنا آلة طابعه نقرا وتنطبع بعقولنا والا وش سالفتهآ؟؟

المهم انا بالاخير نتمنى انا مافتحنا افواهنا لان الامر زآد سوء واحنا ماندري وكان كلامها كله انتوا بناتي وطالباتي والاسئله تافهه وسهله جدآ ( كني ارتحت يوم قالته بس حسيت بخبثها لانها كم مره وهقتنا وصدمتنا بس توقعتها صآدقه ذا المره وللأسف ماتغيرت عن قبل )


يوم جا ذآك اليوم اللي كليت فيه الماده اكل وكنت مذآكرتها من قبل بس والله العظيم انها جات 3 اسئله عليها 15 درجه ماحلينا الا سؤال واحد

وبقآعة الامتحان اذكر ان طالبه طلبت دكتورة الماده ويوم جات طلبت الطالبه من الدكتوره قرآءة الاسئله وتوضيح سؤال واحد لانها مافهمته وهي صآدقه لان كلنا مافهمنا وش تبي ( ومجرد قول الطالبه يا استاذه ممكن تقرين صارخت الدكتوره بوجهها انتوا اطفآل عشان اقرا لكم انتوا قليلات ادب ( شكيت بأخلاق البنت لاتكون سوتلها حركه مع كلامها؟؟))


البنت طبعا ( بلعت العآفيه) وتمنت انها ماسألت


ويوم جا توزيع درجات البنات كلهم 1 , 6 , 3 , 9 << طبعا اللي جايبه تسعه كل العيون عليها شلون جابتها


المهم قلنا ان شالله نقدر على نجيب ال15 درجه اللي ع البحث كامله ونجيب درجةالنجاح ع الاقل

ويوم جات الموقره توزع درجات البحث غسسسلت يدي 5 درجات على الحضور وعشر درجات على البحث

حتى بغيابنا اللي هو من حق الطالبه سلبته منا الله لايسامحهآ

وصرنا نحضر غصب عنا لو عندي اصعب الظروف ولا راح تحط درجة الحضور الا بعذر طبي !!! طيب انا وش اسوي لا صآر ش والا ماتلي قريب اروح المستشفى اتميرض والا اعطيهم رشوه ؟؟!!!

يعني السالفه كذب x كذب ويخلونا نلجآ للكذب غصصصصب .. وكله عشآن حضرة جنابها سالبه منا حق من حقوقنا وتحت تهديد الدرجات !!!



حطينا قوتنا بذآ البحث وقلنا يالله نضمن 5 درجات الحضور ونجتهد بالبحث

الا الطامه الكبرى ان البحث عليه 4 درجات و5 درجات مناقششششه!!! من متى بقسمنا مناقشة بحث ؟؟

وعليه 5 درجت ليييه؟

ولا تكرمت بدرجه وحده لتسيق البحث ( الله لايكثر خيرها ولايكثر من امثالها)


وبالاخير طلعنا من البحث ب7 من 10 :D


وكل ماسألنا طالبه عن بحثها ردت نفس الرد ونفس الدرجه الا الاقليه ماخذين 5 او ماخذين 9 لأنها قايله ماحد ياخذ الدرجه كامله (( على كيفهآ))

وبالاخير الشي اللي يقهر ان هالدكتوره جايه من دوله ثانيه تمارس تسلطها وجبروتها علينا والله لدرجه انا نحس بالذل ولاهانه لكن مالنا الا السكوت ومهما شكينا راح تكون هي دكتوره واحنا طالبات وكأننا الالات يحركونا كيف يبغون وليتهم يعطونا اقل حقوقنا !!!

واخر الترم نتفاجأ بكم سؤال عليهم 70 درجه وكل سؤال اصعب من الثآني


الين متى نصبر ؟


الين متى نسكت ؟؟

الين متى ننظلم بذآ الكليه ولاحد يمنا؟؟؟


وهذي وحده من بين الف دكتوره بالقسم


وغيرها اللي تستغل منصبهآ كونها استاذه وانا طالبه عشآن ابيها تسجلني حضور تسحبني من المدرجات خلف المسرح الين اخر قسم دراسات وفي الاخير تجلس على كرسيها الوقر وتسألني بكل (( رفعة خشم)) وش اسمك عزيزتي؟؟

اسمي ....

طيب تفضلي !!!!!!


طيب وبس ؟؟


سجلتيه؟؟


طيب احنا وش ذنبنا تسحبينا من اخر الدنيا وأخر الدوام عشآن تورينا كرسيك وتكتبين اسمائنا وانتي على مكتبك؟؟


والغلط اني ماكتبت اسمي لان بالمدرج مايقاب 100 طالبه والورقه مرت من جهه ولا مرت من الجهه الثآنيه؟؟؟

وجلستي واقفه 10 دقايق تنتظرين خروج الطالبات من القاعه وانقولك حضرينا وانتي تقولين لحظه لحظه ؟؟؟ كلها بالاخير عشان تسحبينآ لمكتبك اخر الدنيا وتسجلين اسمآئنا!!!!!!


ماتســـــوى علينا والله

اي اخلاق واي دين يعرفونه ذولا ؟؟


اي ثواب يرتجونه من تدريسهم ؟؟

اي تدريس واي خرابيط؟؟ اصلا هذولا كرهونا حتى بـ هالقسم واللي فيه






لا ولا بكينا من بعض الدكتورات نجي عند المراقبات يسغلون اي حركه واي كلمه اي شي عشان يحطونك غياب!!


فلانه غياب كلام!!


فلانه غياب زي !!


فلانه غياب تنفس !

غياب غباء !




لا والله الا غيآب رقآبه وغيآب مشآعر وغيآب خوف من رب العالمين


لكن الله لايوفقهم ولايسامحهم كلهم

حسسونا انهم يستعبدونا تحت مسمى خصم درجات



بالاخير


اتقوا الله في الامه الي تحت يدينكم لان والله ماتكلمت وحده فيهم الا تدعي عليهم وتتحسب عليهم

والله مانقول غير كلمـة امين


ولا يسامح ناس يتساهلون في قسم كامل وطالبات يتعدون الالاف ..



....




بـ الاخير


مارح ناخذ منهم الا الدرجات والنجاح وحسن الاخلاق ان كانوا اهلا لهآ

ولا راح ياخذون منا الا الدعوات اما بالتوفيق في الدنيا و الاخره
او الدعآء عليهم ( علمآ بأن دعوة المضلووم ليس دونها ودون الله حجآب)






.........



نجي عند الامن اللي نحسب انهم امن وامان للكليه الين اكتشفنا يوم جينا نبلغهم عن طالبتين يمارسون الشذوذ ورى المكتبه العامه بردهم ( نمسك مين ونترك مين؟؟)!!!!!

احنا لو مانخآف الله يخسف علينا واحنا بذآ الكليه والبنات بـ هالمنظر والله مانجي نقولكم جعلها تنطبق عليكم انتوا واياهم


لا صآررو حتى الامن يتجردون من مهمتهم مين رآح يضبط الكليه ؟؟

والا حاطين قوتهم كلها على الضعوف يغيرون بلايزهم عشآنها كم قصير << يبونا نلبس كم طويل ايام لحر والقرف

والا يمسكون اللي جيين قهوه والا شي مسوينه بالبيت كون كفتيريا الكليه تستنزف وتستغل الطالبه ( ويبيعون اللي ينباع برى بريال يبيعونه بريالين وثلاثه ؟؟؟))


يجلسون الامن يحطون دوبهممن دوب هالبنات واللي يستحقون الفصل والطرد مايجادلونهم


هذآ غير عن اذا كانت تعرفهم تسامحهم لانهم صيقاتها الي ماعرفها تخليها عض الارض



...

ولكن ماقول الله يسهل لي ذآ السنه وافتك من كلية سلب الحقوق الانسانيه بالدمام

مودتي


reem

[تركية]

يا حبيبتي لا تقهرين نفسك ....... ربي على الظالم صدقيني ما في شي يضيع عند ربي

فيه يوم بتآخذين فيه حقك
أنا مو إنسانة أجمع أحقاد ومو من طبعي كذا لكن الوضع اللي يحطونك فيه يضطرك انك تكونين كذا و الظلم صعب على النفس والمشكلة إنهم يرددون في محاضراتهم عن صعوبة الظلم وأخذنا مع د. هدى مرعي أنواع الدواوين ديوان لا يغفره الله وهي حقوق الانسان مهما تاب إلا إن يغفر لك هالشخص

أستغرب كيف يقدرون يمسكون منصب والا مكان وهم مو أهل له ما يدرون إن في رب بيحاسبهم عليه .......... هي وضعت لمصلحة الطالبة لتوجيه الطالبة وكل ما جينا نرفع لهم ونشكيلهم قالوا مشغولة ما ندخلك على رئيسة القسم .. تدرين طريق التواصل مع العميدة أسهل بمراحل من الدخول على رئيسة القسم ........... بسألك كم مرة جت رئيسة القسم دارت على المدرجات ولااااااااااااااااااااااااااااااا مرة ...

والكثير الكثير الكثير لكن اللي يقدر يبلغ القسم ........... إن عمري مراح أتنازل عن ظلم منهم جاني وكلت ربي ياخذ حقي وما وكلت غيرة لأن أخذ ربي إذا أخذ أقوى
ياليت إنهم يتفادون هالشي بالسنوات الجاية ولا يعلقون بأرقابهم ناس تنشب لهم يوم القيامة



وبالمقابل أحب أشكر العميدة / الله يوفقها ويسهل عليها إنسانة على كبر مهماتها إلا إنها تسمع لأصغر الأشياء
ود. أمل العرفج .. يارب تدخلها الجنة من غير حساب ..


.
.
.
.

[*طالبة جامعية*]

بعض الدكتورات لو ياخذون دورات عن الأخلاق سواء بتخصص دراسات ، لغة عربية ، المهم الأخلاق أهم شيء والأهم لما يكون تخصصها له علاقة بالدين التدريس والتعليم مسؤولية كبيرة ليش هالتكبر ، هالتحدي وين قاعدين بمباراة كلها دراسة وإمتحانات ودرجات سهلوها الله يسهل عليكم والأفضل من كذا خلي لك ذكرى حلوة سمعة حلوة للناس يذكرونك بالخير ويدعون لك

الله يهدي كل دكتورة أو استاذة تظلم البنات وتستغلهم ترى الجزاء من جنس العمل ، وكما تدين تدان ، أنا ماأتوقع يادكتورة ترضين بنتك تنهان وتنظلم فعاملي الطالبات كبنتك أو أختك والله يعطيكم العافية

المشرفااااااااااات وماأدراك مالمشرفات بعضهم مو حاسين بالمسؤولية يسكتون البنات دقيقتين وكم تهزيئة ويطلعون وإذا الدكتور يبي يكلم المشرفة يقعد ينتظر ويضيع الوقت على ماتجي لو يدري الدكتور إنها أصلا ماتجلس راح يعصب ويزعل

الأمن هذووولي حالة خاصة هم مسؤوليتهم كبيييييييرة حماية الكلية والبنات حسافة على أمانتكم للأسف الشديد الدنيا صارت واسطات حتى عندكم الله يهديكم

وأنصح نفسي وأنصحكم ورانا حياة ثانية ورانا يوم حساب خافوا الله بعملكم وحسوا بالمسؤولية والله يهديكم ويهدي جميع المسلمين والمسلمات

وشكرا ياأختي على صراحتك ونتمنى يلقون لنا حل للموضوع لأن الكلية راح تخرب وتضيع سمعتها إذا كذا الحال استمر والظلم ظلمات يوم القيامة

[أزهار الشتاء]

عزيزتي أكره..
أنا طالبه في قسم الدراسات الإسلامية وفي سنة رابع..
بصراحه أنا مستغربه من الكلام اللي انت تقولينه ..
بالعكس دكتوراتنا من أروع وأفضل الدكتورات أدبا وخلقا ..
يعني أنا تعاملت مع أغلب الدكتورات والمرقبات ولا شفت مثلهم..
حتى >>>>>>>>>>دايم إذا شفتنا تسلم علينا ..
ممكن يجي على الشخص أيام أنه يعصب بس ما تعممين يعني حرام اللي تقولينه ..

وبعدين بالنسبة للبحث يمكن ما ناقشتيها ليه انت ناقصه .. احنا ناقشنها قالت ينقصكم الهوامش وهي صادقه في هذا الشيء ..
عزيزتي أتمنى منك تسامحينهم ما دامك بتتخرجين .. ولا تعممين بكلامك كذا تسيئين لقسمك وبنات قسمك عموماً
وإعذريني على صراحتي