مدراس الرواد عدم مسؤليه

[دمـ البحرـوع]

السلام عليكم ورحمة الله وبركاته

طبعا الكل شاف موضوع الاخت الي تشكي في حالتنا

http://www.ckfu.org/vb/t183932.html

والله يا اخوان اني اليوم كرهت الانتساب بسبب المدرسه هذي

تخيلو يا اخوان والي معي في المستوى الثاني واختبرو تجويد وحاسب عارفين

نبدأ من حكاية الاسماء حاطين من قاعه رقم 7 الى 27 حقين التجويد طبعا فصول

4 في 5 المهم وشوف العالم ندور كله فل انا عن نفسي دخلت فصل المكيف عطلان

انكتمت والله طلعت سألني المراقب وين قلت حر بروح ادور فصل ثاني

المهم وندور وندور الى ماجت اربعه وثلث تقريبا لقينا فصل

ونجلس مافيه مراسم قال من بكره تدبرون انفسكم قلنا وانتو قال لا قلنا ابشر

ونقعد نحتري توزيع الاوراق مابدى الا خمس الا ثلث قلنا معليه المهم قال لنا في البدايه

راح اعطيكم وقتكم المهم يوم جات سته الا عشر قال يلا خلصو باقي خمس دقايق

ياولد انت قلت قال لا قلنا طيب مو مهم اصلا ماعاد تفرق حالين الي عرفناه

انا اوك بالنسبه لي بس غيري مسكين وش ذنبه انتو السبب

المهم هذي خلصنا الماده الثانيه يقولون 6 ونص والله التوزيع مابدى الا سبع وربع

اوك فيه صلاه نصلي وعلى طول مو نقعد نحتري المراقب مو فيه نروح ندور مر اقب

والشيء الثاني الكراسي ياهوه شوفو حل والله ظهري راح بخرايطها

من جد ماتوفقو الجامعه في الرواد شكلهم شافوها رخيصه قالو نتعاقد معها

نبي اصواتنا كلنا وانا اتزهل لكم بالباقي ننشرها بالجرايد وعد مني لكم ان شاء الله

بس ابغى وقفه جاده من الكل عشان يوصل صوتنا

حنا ندفع دراهمنا واخرتها باقرب شيء حطونا والله انا عن نفسي مو مستغني

عن صحتي بسبتهم يجني انزلاق والا شيء لاسمح الله

[ريانة]

ارسلو لهم احد يكلم النجار والله اليوم راح نص الوقت والاوراق ماتوزعت احس الرياض ادارتهم فاشلة

بسراحة فرق بينها وبين مراكز اختبار الدمام المديرة ماشاء الله تلاحق البنات ادخلهم القاعات

بنفسها وهذولى

نترجاهم يعطونا الاوراق

[الثالثة ثابته]

الرواد ممتازة جدا ما عليهم قصور والي تكلموا ما ادري وش يبون تكييف ممتاز والطاولات والكراسي مقاسها ممتاز للي طولهم اكثر من متر ونصف اما الي اقصر هم الي راحوا فيها لازم مخاد ترفعهم انا بالدور الثالث
يعجبني تنظيمهم وتكييفهم وترتيبهم بس مسالة البعد هي المشكلة

[لين 24]

الله يكون بعووونكم

[أم هيون]

فعلا مشكله صراحه تأخير الاسئله
يعني اليوم العقيده على الرغم انها سهله واقرا واجاوب على طول الا اني ما خلصت الا على انتهاء الوقت


مدري بكره وش بسوي في الانجليزي اللي يبي له فصفصه
في الثانوي وهي ورقه وجهين اجلس فيها ساعه

فما بالكم بــ 70 سؤال

[دمـ البحرـوع]

المشاركة الأصلية كتبت بواسطة الثالثة ثابته

الرواد ممتازة جدا ما عليهم قصور والي تكلموا ما ادري وش يبون تكييف ممتاز والطاولات والكراسي مقاسها ممتاز للي طولهم اكثر من متر ونصف اما الي اقصر هم الي راحوا فيها لازم مخاد ترفعهم انا بالدور الثالث
يعجبني تنظيمهم وتكييفهم وترتيبهم بس مسالة البعد هي المشكلة

نتكلم نبي راحتنا ترى دافعين دراهم مو بلاش ومن ابسط حقوقنا نتكلمـ

تكييف بشكل عام ممتاز لكن فيه فصول معدومـ فيها التكييف هذا شيء

النقطه الثانية وين الكراسي ممتازه شكلك شفت الي لونها ازرق بس

اوك معك بس وين بكم فصل موجودهـ .؟

اتكلم عن الي بنفس الشيء الطاوله والكرسي لازقين ببعض والله لو اني لاعب

سله ياشيخ ماوصلت للطاوله .

والتأخير وهالكلام كله ياشيخ خلو عنكم المجامله وقولو الصدق

فيهم قصور واربعين قصور بعد مو معناته اخالفك الرأي وبس لا ياخي شوف

المصلحه العامه الكل يشتكي

[شاعرر]

صدقت واحناجالسين مجموعة كبيرة دخلو وطلعو
مالقو اماكن


مالقينا عندهم مويه رحناشرينا من سوبرماركت بالسيارة

عندهم موية ؟


واحد من الشباب اللي معانا انعدمت ورقة الاجابة حقته من الحبر اللي في الطاولة(شخابيط)
ولالقوله ورقه ثانيه


للامانه عندهم شاهي اخضر

شاهي عادي ماحطو شكلهم حريصين على الصحة العامة

[نجداوي حيل]

زين انا فريت من قاعه الى قاعه ماصفت الا 27 معاي

[رنو]

تنظيم مافيــــــــــه ,,

إدارهـــ عدم

مانقووول إلا حسبي الله ونعم الوكيل ,,

[الثالثة ثابته]

بنات والله ما قصروا مويتك ووسادتك خذيها معك تراها سبعة ايام فقط استهدو بالله والله انهم ما قصروا بس الكلام على بعض المراقبات الي كعبها يطقطق والى الي طوال الوقت رايحة جاية تزعجنا طوال الوقت والا المدرسة وطاولاتها ممتازة اتكلم عن المشبوكة ببعض اتقوا الله واعلموا بانكم محاسبون وانكم شاهدون فلا تشهدوا زور والمدرسة اتمنى كل ترم امتحن فيها مرررررة عاجبتني ولله الحمد وانا طولي متر ونص يعني اقصر الموجودات ماشاءالله ومناسبة لي بس احط مخدة تدعم طولي هههههههههههههه