رسااااله ... منقووول....رساااله. من مواطن .

[عنقاء أصيلة]

بسم الله الرحمن الرحيم

السلام عليكم ورحمة الله وبركاته


هاذي رسالة من مواطن فطرت فؤادي ... قريتها وحبيت انقلها لكم ....

الموضوع قوي شوي ... ولــــــــــكن ... ناخذ اراء ..


احب اهني اخواننا الكويتيين بحلول شهر الخير عليهم .. شهر فبراير

وعسى ربي يديم عليهم الخير ويديم الامن والامان على حمنــّـي واخوانه


قرأت الكير من النكت عن زيادة 5% الي حصل عليها الشعب السعودي

وعن الاكشن الي صار بين الاخت دودي والي سمتنا زلايب حديثين عهد بنعمه

واحب اقول لاختنا الكريمه .. ترى الحياه تعاون , موب لانك عايشه بخير

تظنين كل الناس عايشين مثلك مع اني اضمن لك انك ماكله هوى

ومسويه فيها بطرانه وانتي راس مالك رحتي اسبانيا وعلى بالك

يا ارض انهدي ماااحد قدي

وحتى لو كنتي بخير ونعمه .. ليه ادفع اكثر لشي انا عارف انه مايسوى

يعني بالله تضخم باسعار الحليب واللبن ... كبرت ديود البقره مثلا ؟؟؟

طيب اسعار العقارات ... تحتها بترول ؟؟؟

طيب البيض ... صغرت مكوة الدجاجه وصار صعب تبيض ؟؟؟

ولا اسعار اللحم والدجاج .. عسى مابينقرضون ؟؟؟

عايشه جوو المطنوخه وحنا كلنا عيال كلب عيال فقر

اول ماحد كان يشتكي لان ماكان في ارتفاع لذا الدرجه بالاسعار

والشعب عاوز يعيش ... والمخرج عاوز كده

ادري اني جاااي باخر السيل وكلامي سبقني فيه كثير

بس جايب مقال قريته وعجبني .. بعض من معاناة اكبر احتياطي

بترول بالعالم .. والله ضحكو علينا الخليج

تكفون ياقطر .. تكفون يالامارات

ماعندكم اكتتاب جديد غير دانه غاز والريان ؟؟؟

عاادي بننام بخيام وسليب باق بالبرحات بس نبي فلوس

طيب خلوا عنكم كوسوفو والشيشان

تبرعوا لاخوانكم في السعوديه

ترانا دم ولحم ونسايب

الحمد لله انا عايش بخير ونعمه بس من قريب ولا بعيد

في ناس محتاجه ولازم نوقف معهم .. لاتحسبوني زلابه لووول

ينعن ام الحاله المكافح صار يتسمى زلابه يازباله


منقول


حبيت أختبر اليوم هامش الحرية
وأوجه رسالة للوالد القائد خادم الحرمين الشرفين حفظة الله وأطال في عمره
واجبات الأبووووه أن الأب يستمع لصرخات أبنه وضمه على صدره وإذابة كل آلامه
والملك زي ابوي،، لأحد يتدخل بين أب وطفله


ابشرك يا خادم الحرمين الأسعار مضبوطة والمواد الغذائية متوفرة
ما نقصنا بس إلا الخبز يرفعون سعره
وخذ عندك بعض الأسعار
قشطة المراعي صارت 4 ريال
حبة المظبي 22 ريال
الكفرات ارتفعت 30 بالميه
الأدوية 25 بالمية
تخيل يا خادم الحرمين جبن كرافت والمراعي السايل ارتفع
طيب وش نسوي لبزارينا المشكلة يقدّرون الكرافت السايل مع الصامولي
الببسي صار 20.5
والأيجارات أرتفعت
وقسايم المرور زادت
الحمدلله على النعمه أمن وآمان
الله لا يغير علينا
حتى رز ابو كاس ارتفع
لا وازيدك من الشعر بيت رزمة الكراث والبصل صارت بريالين
شفت شلون حنا بنعمه


بس تكفى كلمة راس .. ما ودك .. تنزل رواتبنا شوي .. عشان .. نبني للأردن 70 الف وحده سكنيه ثانيه
ونعطي لبنان مليار ونص دولار
ونرسل لمصر المعونه السنويه
تعرف ماشاء الله حنا .. من كثر الفلل التمليك .. الناس صارو يأجرون ببلاش
ممكن طلب طال عمرك .. ابي سلف 12000 ريال
عندي دين اسدد فيه لي سنه ولا خلص .. كل شهر 500 ريال
الله يرحم حالنا والله

ابشرك طال عمرك
قبل كم يوم حطم سعر برميل البترول الرقم القياسي وصار يباع بـ 99 دولار
ورصيدي أيضا حطم الرقم القياسي في نفس اليوم وصار فيه 17 ريال
الحمد لله شفت كيف أنا بخير

أحب اطمنك صرنا نسوي رجيم غصب عنا
تعرف اللحم ما عاد نعرفه
حتى الدجاج ما عاد نأكله
صرنا رشيقين
تسمع بالكرش ما عاد نشوفها
تسمع بالبطن اللي لاصق في الظهر
يوووووه في كل مكان نشوفه
نم قرير العين الشعب بخير
لاتتعب نفسيا ودور في النت توأم تفصلهم
توائمنا ليش ينفصلووو
صلة الرحم زينه خلهم يتشابكون طول العمر
يمكن لو فصلناهم يتهاوشون ويفترقون
خلهم متشابكين في جسد واحد
الله لا يغير علينا

ابشرك طال عمرك شعبك تطور
استبدل البكاء بطعم الملح ببكاء بطعم الدم
آآآآآآآآآآآآآآه يا حلو مذاقه
ودك تجربه؟؟
انا أقولك وشلون
نظف منزلك من حليب الأطفال
نظف جيبك من الفلوس
نم ومخباك فاضي
خل زوجتك تصحيك من النوم قبل الفجر
وتقولك أن طفلك ما عنده حليب
دق الشماغ ولف على جيرانك
دور سلف .. علشان تشتري حليب لطفلك
الجميع بيطردك لأنهم طفارى
انس انك ملك وأرجع للبيت
بتدخل على أنغام بكاء طفلك
عندها ستحتقر نفسك وانت عاجز عن اشباع طفلك
عندها ستلعن اليوم اللي انولدت فيه
عندها ستلعن اليوم اللي انولد طفلك وصرت مسؤول عنه
عندها ستضمه وستبكي من القهر
ستنزل دموعك وتحس بطعم الدم في حلقك

تذكر طال عمرك يوم حنا صغار وش كانو يقولون لنا
كانو يقولون الرجال ما يبكي
عيب تطلع دموعه
صرنا نصيح عادي
البكاء صار ملازم لنا
والسبب كومة لحم (أطفال ونساء) في رقبة الواحد
يبكي لأنه عاجز عن توفير الحياة الكريمة لهم

بس ودي أقولك شي قبل ما أروح أصيح
تدري وش معنى الرجل يبكي قدام زوجته وأطفاله
معناها تساقط كل قيم الرجولة اللي تعلمناها في طفولتنا
معناها إحساس المرأة بالانكسار وعدم الأمان

معناها خنوووووع ما بعده خنووووع للظروف القاسية اللي وضعنا فيها
معناها أمور كثيرة ما راح تفهمها







اكرر ... منقووووول .. اخلي مسؤوليتي . منقو ل من قروب سنفووور.

[بـــو أحــمــد]

و عليكم السلام و رحمة الله و بركاته

رسالةليست كأي رسالة ..
فطرت قلبي تلك الكلمات .. و انتابني شعور ذلك المواطن و معاناته

لم نفقد الأمل في تحسين الوضع المعيشي من قِبل حكومتنا الرشيدة


شكراً جزيلاً لكِ أختي عنقاء أصيلة

[مرزوق]

اوووووووووووووووووه

هذا كله كوم وبسكوت المربع كوم لحاله

اجل من يقول هذا البسكون الاثري الي تعودنا عليه من نعومة اظفارنا بنص ريال نشتريه اهو مع البارد بريال

الحين صار بريااااااااااااااال

المشكله يا مليكنا انك حاط صورتك على الريال

يعني سعرك وسعر بسكوت المربع واحد

ترضاها يا مليك عاد

مشكورة على الموضوع

[دفا الروح]

رساااله بالصميم ..

وربي يعينا ..

أنا اللي قاهرني ..باسكن روبنز ..


خلينا ساكتين بس ..

يعطيك العافية ...


تقبلي مروري الحزين ..

[الجــ2008ــوري]

رساله ادمعت عيني .. الله يعينا وياهم

مشكوره عقاء اصيله عالنقله ..

[الموت البطيء]

لا حول ولا قوة الا بالله

الله يحسن حال الفقراء

ربي يحفظك
تشكرين عنقاء على الرساله

[عنقاء أصيلة]

اشكر كل من مر .. فعلاً ...

هناك من يعاني ....


والله يمهل ولا يهمل...

وحكومتنا الرشيده ما تقصر بس لو وصلت لها الرساله .. الله يعز خادم الحرمين ..

شاكرررررررره طلتكم ..كان لها وقع في متصفحي ..

دمتم بود

[stop its me]

أختي عنقاء أصيله

يعطيك العافيه عالنقل وفعلآآ رساله مؤثره

ماأقوول غير حسبي الله ونعم الوكـــيـــل **

:011: