[ مذاكرة جماعية ] : تنبيه لنقاط مهمه جدا

[بو عبد المحسن]

السلام عليكم ورحمة الله وبركاته ،،

صباح مساء الخير ،،،،

طبعا الاتفاق شي طيب بس مع وجود الجميع لكي لا تضيع الجهود ، الترم الي فات كان فيه اكثر من ملخص لمادة واحده وطبعا هذا الشيء سبب تشتت بالنسبه لبعض الاخوان والاخوات ، ولتفادي هذي المشكلة الانتظار الى وقت نزول المحاضرات الاولى ان حصل اي تغيير في اي دكتور لا سمح الله وقتها يطرح نقاش بالبحث عن اشخاص لديهم قدرة وسرعة في التلخيص لان الكل عارف ان عامل الوقت شيء مهم خصوصا اذا كانت المحاضرات جديده اي لم تكون موجوده في الاعوام السابقة هذا بما يخص التلخيص .

الشي الثاني الترم الي فات الكل لاحظ وجود مشكلة في عدم الثبات على اجابه واحده وهذا يرجع لعدم ادخال اسئلة السنوات الماضيه في المحاضرات المباشرة علما باني اتذكر اني وضعت اسئلة نظم المعلومات وتقنية المعلومات لسنة سابقة مع الاجابات الي كنت مشكك فيها وطلبت من الجميع المشاركة في الحل لكن لا حياة لمن تنادي وقبل الاختبار بيوم او ليلة الاختبار او يوم الاختبار الصباح يجيك من يسألك اجابتك ماهي صح دون ان يبني على اساس . يعني ان كان عندك مشكله في اي اجابة من الاجابات المجال كان مفتوح قبل الامتحان بكم اسبوع وكان فيه مجال انك تتأكد من خلال سؤال الدكتور اثناء المحاضرات المباشرة .

طبعا صدمت صدمة كبيره من كم دكتور بانك عندما ترسل اليه سؤال لا يقوم بالرد مع التحفظ بالاسماء لذلك اتمنى اخذ نماذج اسئلة الاختبارات للاخوان الذين كانو في المستوى السابق وتصحيحها عن طريق مشاركة ثم التطرق للاسئلة المشكوك فيها اما براسله من مجموعه لكي لا يكون هنالك حجه للدكتور لعدم الرد وذالك بحجة ان الرسائل كثيره وكذلك ادخالها في الحاضرات المباشرة .

الكوكيزات الخاصه بالمواد اتمنى وضعها في وقت مبكر والاتفاق عليها مع الاتفاق على الشخص القادر والمناسب لوضع الكوكيزات خصوصا انها تتطلب جهد كبيررررررررررررررر جداااااااااااا .

اخر نقطة اتمنى من الاخوان والاخوات اصحاب السؤال الذهبي (( دكتور راح تجيب اسئلة السنة الي طافة في الاختبار الاختبار مقالي ولا )) ان لا يتكرر منهم هذا السلوك الله يرحم والديهم ..

بالختام احب اقول لكم اني ماشي على الخطه والمواد سبع مواد

موارد بشرية - اخترتها تحدي وبنفس الوقت هم وابي ارتاح منه وتم الاطلاع على جميع المحاضرات .
ادارة مالية 2 - واتمنى ان لا يكون فيها اخطاء بالاجابات اثناء الشروحات وضياع .
التحليل الاحصائي - مادتي المفضلة اخذت نظره فيها من الاحصاء الشيء الكثير .
الاساليب الكمية - خلال يومين سوف يتم النظر في محاضراتها والنظر فيها .
اساسيات البحث العملي - المادة كانت اختيارية يعني لو اخذت مهارات البحث والتفكير ما يحتاج تاخذ اساسيات البحث العملي لكن الله واعلم بس اخذتها وعلى الله .
مهارات البحث والتفكير - تم التنبيه فوق وتم اخذها وعلى الله .
ادارة التسويق - تم الانتهاء من المحاضرات الدكتور شيق والله يستر لا يتغير .

اتمنى التوفيق للجميع ........

اخوكم / ابو عبد المحسن

[تراتيل المساء]

*


اعجبني كلامك بصراحه ,,
في رد لي ع موضوع غيداء نفس كلامك بالزبط بس المختصر ..
ان شاءالله الاخطاء تتغير والسنه هذا تكون افضل يارب ..
بالنسبه للاسئله اللي ح تكون غلط فيها شك ونسأل الدكتور ..
السنه هذه اي سؤال نراسل الدكاتره ح يكون في تجاوب ان شاءالله ..
لان خلاص اللي متحفظين حتى ما يقبلون السؤال خلاص راحو ..







/

[سارة محمد1433]

يعطيك الف عافيه
وإن شاء الله
هالمستوى يكون غير المستويات اللي طافت
طبعا بالاحسن
تحيتي

[عبدالله الاشهب]

الله يوفق الجميع ..اخوي ابو عبدالمحسن انت من الاخوه اللى النقاش معه ذو شجون > متعوب عليها.. عندي اقتراح فيه مثل بدوي يقول " الشويه اللي عليها ثنين ماتستوي " مناسبة هالمثل انه من الصعب بل من المستحيل تطبيق فكرة ان شخص او شخصين مسؤؤلين مواد معينه العدد كبير والناس كل واحد وله تفكير الافضل انكم تبعدون الاتكاليه الا صايره وتخلون كل شخص يعتمد على نفسه ولا يتكل على احد غير الله سبحانه وتعالى تخيل مثلا انا كلفت " بضم الكاف " بعمل الكويزات وماقدرت اعملها وش راح يكون موقفي قدام الاخوان بيبدون الملامه وانا غير ملزم بالشغله هذي المفروض نصير اكثر اخترافيه كوننا في مستوى 4 عندك مثل ثاني حل الواجبات المفروض مايتنزل مباشره مع نزول الواجبات المفروض يترك لنهاية الفتره بيومين او 3 ثم ينزل علشان نعطي فرصه لانفسنا اننا نبحث عن الحل خوفا من تعليق النظام في نهاية الفتره حقت المشاركه اللي صاير الحين اننا نحل الواجب ع العمياني نسخ لزق هذا مضر وبالنهايه نجي ونشتكي الدكتور ادري طولت بس الخلاصه نبي هالترم احترافي بالاعتماد ع النفس والمفروض الطالب يلجأ هنا اذا واجهه صعوبه شديده وبالتوفيق

[NFN]

معاك في كلآمك ميه بالميه ياآبو عبدالمحسن

[نواسي]

بارك الله فيك بو عبدالمحسن ..
وتشكر وتقدر على ما قدمت وعلى كلامك الجميل

وعن ما حصل في السابق ..
بعتبرها تصرفات فردية يصعب السيطرة عليها ..
وهي هي .. كهامش خطأ في كل بادرة تنعمل من قبل الأخوة الأفاضل .. شي طبيعي تحصل
الأهم ألّا تؤثر على من يقدم وينزعج منها ..

وأحب أذكرني وإياكم .. بإخلاص العمل لله
نحن هنا نعين ونعاون بلا مقابل ..
لكن بإخلاص النية لله حيكون ثوابك وأجرك من لدنه سبحانه

نسأله أن يجزيكم ومن ساعد وعاون خير الجزاء
وينولكم مرادكم أجمعين

[hadialdossery]

يعطيك العافية أخوي على التنبيه

ومسألة الأخطاء مشكله تحتاج لحل جذري

فالواحد صار يتأكد بأن دكتور المقرر يعيد الأسئلة بناءاً على مايلاحظه من اخطاء في حلول بعض الأسئلة

المتناقله إضافة إلى بعض الأجتهادت الخاطئة

لذلك الحل ان لايعتمد الطالب على اي كويز الا من قبل ورشة المقرر المكلفين بمراجعة المقرر

وعلى اعضاء الورشة اعتماد الكويزات التي تم تدقيق اجابتها والتأكد من صحتها وخاصة اسئلة الأعوام السابقة

وهذه من احد اجابيات الورش التي يتم من خلالها توزيع الجهود بين الطلبه بشكل عام

تحياتي لك

[DODY-11]

كلامك عجبني وفي محله خصوصا انو هالمستوى شوي دسم ولازم نكوون دقيقين ونطلع على كل شي من بدري ونتاكد من الاسئله واجابتها الصحيحه
اهم شي التعاون

الله يعطيك العافيه

[zubaidia]

السلام عليكم
أخوي بو عبدالمحسن كلامك صحيح وتشكر عليه بصراحة أكثر ما يبثرني السؤال اللي في المحاضرات المباشرة يادكتور بتجيب اسئلة العام الماضي يادكتور الأسئلة وش طريقتها تحس ان الحبيب ما عمره حضر اختبار أحيانا أحس الدكتور بيطرده الا شوي واللي يسأل عن الملخصات والفلته الرايق اللي يجيك مسوي أنا المطقطق الخطير راعي الذبات وراعي الوناسة والفله يسوي بيطقطق على الدكاترة ياخي ما ضيعنا الا هالنوعيات صرت اكره المحاضرات المباشرة من اسئلتهم الغبية ياجماعة الخير اعذروني بس فيني ضيقة من نوعيات وحبيت افضفض شوي.
المهم سنة سعيدة وجميلة على الجميع بإذن الله وأتمنى التوفيق والهداية والصلاح للجميع
تقبلوا تحياتي وودي

[زوال الشمس]

شكرا اخ بو عبد المحسن انا معك بس في شغلة انة الكل يبي كم واحد يكون مسؤول والباقي يستفيد بس لو مشينا كذا يمكن يكون ظروف لهم وبعدها الطلاب راح يتوهقون وترى ناس مبدعة في مواد ومتنحة في مواد ثانية فكل واحد ممكن يشارك ويستفيد بس في مكانه الخاص يعني لكل مادة ورشة فيها المواضيع بترتيب ومساحة لابداء الراي والمشاركة واذا كانت قيمة تثبت تحت الموضيع المهمة في نفس الورشة وخصوصا اشوف في كل سمستر ماتطلع المواهب والدفارة الا في الايام الاخيرة قبل الاختبارات لانه في ناس ماتلتفت للمواد الا في ذاك الوقت وشغلة ثانية اذا ماخذ مهارات ماتاخذ اساسيات هي نفس المادة وعلى حسب رقم الدفعة 2013 فما فوق اساسيات والي قبل مهارات ويعطيك العافية دوم ارائك حلوة