اللهُ اكبر يازمنا على وين
ياما نوينا ولاانكتب مانويناه
كنا نرتب نحتفل حين تمشين
واليوم ازورك وسط قبرٍ حفرناه
يمه رحيلك مخلفٍ للموازين
العقل مدري يوم فرقاك وش جاه
مصدوم حتى شفت جمع المعزين
ماكنت اصدق عن فراقك وطرياه
ليتك عن اللي صار فالبيت تدرين
الحزن وثق صورتك في زواياه
يمر وقتٍ و اسمعك لي تنادين
ولاجيت ادور صاحب الصوت مالقاه
صوت مونسني وانا بعمر شهرين
واليوم يصلاني على الجمر وابغاه
نظقتي اسمي واحتريتك تزيدين
ولاعاد زدتي لي بصوتٍ فقدناه
صوتك شلع بي للقبر عصر الاثنين
خلاني اقرب للقبر واتوحاه
سلمت علّك تسمعين وتردين
وهليت دمعٍ جرح الخد مجراه
قمت اتذكر ويش كنتي تقولين
اخر كلامك إبعدوا بطلب الله
صبري وصمتي مامسك دمعة العين
ولاستر ضيقٍ على الله مشكاه
عزاه ياصبرٍ يشيل الكسيرين
وعزاه ياشوفتك فالبيت عزاه
وداعة الله رددوها المحبين
وداعة الله ياعزيزٍ قبرناه

سعد الروقي

المشاركة الأصلية كتبت بواسطة dr ʀeнαв (المشاركة 1057323956) _ صوت مونسني وانا بعمر شهرين واليوم يصلاني على الجمر وابغاه اليمَه بجَد الله يرحم موتانا وموتى المسلمين اجمعيَن كلمات حزينه جدا لله درك سعَد ويعطيك ربي الف عافيه تقيمي ~

المشاركة الأصلية كتبت بواسطة باسل العيادة (المشاركة 1057328820) مصدوم حتى شفت جمع المعزين ماكنت اصدق عن فراقك وطرياه ليتك عن اللي صار فالبيت تدرين الحزن وثق صورتك في زواياه يمر وقتٍ و اسمعك لي تنادين ولاجيت ادور صاحب الصوت مالقاه احسن الله عزاءك وغفر لميتك وجبر الله مصابك صح لسانك ...قصيده حزينه ومؤلمه و من اجمل ما قرأت بالمنتدى

المشاركة الأصلية كتبت بواسطة حسين ال منصور (المشاركة 1057339649) صح لسانك

المشاركة الأصلية كتبت بواسطة وداعة الله (المشاركة 1061625389) وداعة الله رددوها المحبين ... وداعة الله يا عزيزا قبرناه .... ولن تضيع وودائع الله .. أبيات موووجعه وووصلت للقلب بشكل ما تتخيله أسأل الله تعالى أن يرحمها ويغفر لها ولموتى المسلمين .. عد ما انهمر المطر وسال