ملتقى طلاب وطالبات جامعة الملك فيصل,جامعة الدمام

محمد بن فطيس

ياهيه اللتفت لي واسمع ادعاي لك ياهيه
ترا عادك بتشبع من البعد وتواجه

دعيتك بصوت ٍ ياصلك ليه ماتوحيه
وانا اسمع ضلوعك من صدى الصوت لجّاجه

عليك الفؤاد اخلاجه مصمّخ ٍ راعيه
خف الله في راعيه ماتسمع اخلاجه

ترا العفو قد جاك اوله واغتنم تاليه
وترا الحلم بحر ٍ غير لا تامن امواجه

وترا الود ليل ٍ مظلم ٍ جيت لك ساريه
سراجه وصالك والجفى ينفخ اسراجه

وترا قصرنا اللي كم سنه نجمع ونبنيه
هوى العذل طيّح بابه العود وسياجه

لي أيام مدري وين دارك ولا ادري ليه
وانا خابر اني باب شفك ومزلاجه

غياب ٍ بلا سبّه هجاد ٍ بلا تنبيه
وجفا أغلا العرب نار ٍ على الكبد وهّاجه

نضج قلبي من البعد وش حاجتك تكويه
جفاك الجمر والصبر في بعدك الصاجه

طبع حبك بقلبي والايام ما تمحيه
هذا هجرك يحاول يموجه ولا ماجه

يموت الأمل لكن ضنون الغلا تحييه
وعروق الوفا فالروح والقلب وجّاجه

خبرتوا حد ٍ يبكي على واحد ٍ يبكيه
وخبرتوا حد ٍ مسجون مايبغي أفراجه

احبه ولا ابغضته على شي ٍ إيسويه
ولا زالت أرقاب الرجا فيه منعاجه

عسى منزل ٍ ضمه حقوق الوسم تسقيه
وتضحك له الدنيا وهو يضحك أحجاجه

فقد خاطري شي ٍ من الضيقه امسلّيه
وغدت روحي من الناس والليل هجّاجه

اروح لمكان ٍ خابره ..خابره ياتيه
اسوق القدم صوبه وهي مالها حاجه

مكان ٍ نزيه وأول مواجهي له فيه
وانا خابر ٍ مارجل مثله بدواجه

لعل وعسى ما حدني للمجي ..يدعيه
واشوفه وانا ماودي اسبب احراجه

يحب الجريح اخر دروب اللقاء ويجيه
وتحب القدم جيّة مكان اول مواجه