السلام عليكم

ملاحظة: هذا الموضوع فقط للي يبغا يحسن من إنجليزيته و واجه صعوبة في الاختبارات إلى حتى الآن، اذا كنت من النوع الي يتحطم بسرعة و لا بيزعل من كلمة و لا كلمتين سكر الموضوع و دور لك ع موضوع ثاني يقولك "ملخص سريع سريع أو تعلم الانجليزية كاملة في دقيقه"

المهم

بغض النظر كون الاختبار كان صعب، سهل، جاب أسئلة من برا المنهج و لا من داخله، مهما كان العذر لازم يا شباب تحاولون تشدون حيلكم بتعلم اللغة الإنجليزية أكثر و أكثر، أنا سبق و فتحت موضوعين اثنين مثل هذا لما كنت مستوى و ثاني و منتقل للمستوى الثالث تخصص انجليزي و كتبت نصائح و تنبيه للي يبغا يتخصص انجليزي و الاغلب رد علي اني محطم و لا عندي سالفة، لكن راح أعيد الموضوع عشان لو واحد أو اثنين استفادو من هذا الموضوع ف أكون الحمد لله أفدتكم بشغله على الأقل

و الي يبغا يقرأ الموضوعين السابقين هذا هو الرابط

الرابط الأول: لمن يريد التخصص لغة إنجليزية

الرابط الثاني: تنبيه للي يبغا يتخصص انجليزي


نرجع لموضوعنا المهم...

طيب أحين انتو تخصصتو و خلصتو، صار الي صار و البعض للحين يواجهون صعوبات في الإنجليزية، و أنا أقول هذا الكلام لما رأيته في الاختبارات، الأغلب يكون في نص ورقة الأسئلة و أنا خلصت و طلعت من القاعة، و الي يقول مافي وقت و الي يقول القطعة طويلة يبغالها وقت (وين طويلة؟ كلها 6 سطور و الثانيه 4 أظن) و الجاي بيكون مشابه و يبغاله مذاكرة أكثر و فهم للغة الإنجليزية أكثر، كل الي يبغالك عشان تطور لغتك الإنجليزية تقرأ النصائح التالية و تتبعها لأن هذي هي طريقتي، لا مدرس خصوصي، لا دورات و لا تلخيص و لا هم يحزنون...

النصائح (مأخوذة من موضوعي القديم مع إضافة بعض النصائح الجديدة):
1- احصل على برنامج ترجمة من المتجر الاكتروني يا كثرهم و ببلاش، أحين صار عندك مترجم و بجوالك، أو استخدم جوجل ترجمه "اضغط هنا" لترجمة الكلمات فقط الي ما تعرفها من اليوم و رايح "بس الكلمات، جوجل ما يعرف يترجم الجمل صح أو بالمعنى المطلوب 100%".

2- حول جميع الأجهزة الإلكترونية الي عندك إلى الإنجليزية ... الاب توب ، جوالك بالكامل خلها بالإنجليزي و أي كلمة تواجهك ما تعرفها روح ع طول و ترجمها بالبرنامج أو بجوجل الترجمة.

3- حول البرامج الي عندك بالأجهزه أيضاً إلى إنجليزية، المتصفح خله انجليزي، برنامج الوورد خله إنجليزي، برنامج الحماية و الخ... و نفس الشيء، أي كلمة ما فهمتها ترجمها.

4- شاهد الكثير و الكثير من البرامج باللغة الإنجليزية، يفضل برامج خفيفة مثل عن الحيوان و الطبيعة و حاول تركز بالاستماع و ليس قراءة الترجمة العربية.

5- بعد التعود على مشاهدة البرامج الأجنبية أنصحك بمشاهدة أي برنامج تلفزيوني باللغة الإنجليزية + ترجمة إنجليزية، بهذا الشكل راح تعود نفسك على التالي : سماع اللغة بشكل صحيح ، قراءة اللغة ... و هذا بالتالي يعودك على الكتابة السليمة لأنك راح تقرأ الترجمة كثير و تسمعهم بنفس الوقت و راح يعودك على القراءة السليمة و السمع الصحيح.

6- اقرأ روايات أطفال بالإنجليزية "لا حد يقول لي عيب ما عيب" الروايات الإنجليزية للأطفال فيها كلمات بسيطة و سهلة الحفظ و أغلبكم يعرف معناها، أيضاً راح تتضح لك الترجمة من مشاهدة الصور فـ راح تفهم أغلب الكلام من دون ما تترجم شيء.

7- تصفح مواقع و مجلات و جرايد إنجليزية، هذي النقطة مهمة جداً جداً، لأن كل شي جديد و بالصور و راح تفهم أغلب الشغلات بس من العنوان و من الصور و الباقي عليك تقرأ و تترجم الي ما عرفته، و مو تدخل لي أي موقع، حاول تدخل موقع موثوق و معروف و كتابه يكتبون مقولات إنجليزية صح لأنهم راح يستخدمون جميع القواعد النحوية الخاصة بالإنجليزي و راح انت بنفسك بعدها تحس انك تقرأ و تكتب مثلهم.

8- هذي نصيحة جديدة و لا أضمن لكم تفيدكم ميه ميه، و هي لا تسمع لكلام الناس و الي يقولك لازم تتكلم مع واحد انجليزي عشان تكون ممتاز بالانجليزية، لان هذا يعتبر من مهارات المحادثة و افيه منا الكثير يبغا الشهادة و بس، ف لا تركز أو حتى تحاول انك تتحدث مع أحد بالإنجليزية (حديثاً وجهاً لوجه أقصد) لأن هذا ما راح يفيدك في المقررات القادمة و لو تحط تركيزك كله ع القراءة و الكتابة أحسن بواجد.

9- لا حد يروح يشترك بدورات تدريبية لتقوية اللغة الإنجليزية و الخ، راح يضيعون وقتك و جدهك و الأهم فلوسك، فيه مليون فديو باليوتوب تعليمي للغة و كلها ببلاش، غير انك لو انك اتبعت النصائح الي ذكرتها فوق و انتبهت لأساسيات اللغة الإنجليزية راح تكون تمام التمام ان شاء الله...


بالأخير هذي نصائح أنا مجربها بنفسي و الحمد لله، أروح اختبارات الانجليزي بدون لا أفتح الكتاب، أراجع بس كويزات خفيفه قبل الاختبار بساعتين عشان بس أفهم طريقة الأسئلة و عن شنو بالضبط راح تكون (تستقوي علينا يعني؟ ايه أستقوي عليكم)

للي عنده أي استفسار أو شغله معينه راح أرد عليكم ان شاء الله بالي أقدر عليه

وفق الله الجميع لما يحبه و يرضاه



تعديل رقم 1: سيكون هذا ردي على استفسارات الأعضاء حتى الرد رقم 12، سأضع الرد هنا حتى يتسنى للجميع مشاهدة التساؤلات و ردي عليهم.

اقتباس:

المشاركة الأصلية كتبت بواسطة ASH2013 (المشاركة 12403139) الاخ: شخص 101 شكرا على هذه النصائح المفيدة ولكن عندي شوي قلق من التخصص انا ولله الحمد عندي اللغه مقبوله نوعا ما بس بعد سنتين وبعد التخرج هل اني استفدت شئ من الجامعة وهل اقدر اتكلم بطلاقة واترجم النصوص والكتب ياخوفي اني اتخرج وماستفدت شئ نصيحتك لي ايش اسوي علما باني احب هذه اللغه واحب اتعلمها بس خايف من مابعد التخرج

نفذ النصائح الي قلت لك عنها، و خاصة و أقل شي انك تغير كل شي من حولك إلى الإنجليزية عشان تضبطها، هل جهازك بالإنجليزية؟ الجوال؟ البرامج؟ غير المواقع الي تزورها و خلها أخبار إنجليزية 100%، لا تروح لمواقع عربية و عندهم أخبار إنجليزية بعد، لأن إحتمال كبير ان الإنجليزية حقتهم مش كويسه.

اقتباس:

المشاركة الأصلية كتبت بواسطة هيفاء90 (المشاركة 12403566) مشكور ع هالنصائح الله يجزاك خير اذا تعرف قناة باليوتيوب تنصحنا فيها ي ليت تعطينا وشكرا مرا ثانيه ..

صراحة ما أعرف و البحث مافي أسهل منه في اليوتوب، لكن في قناة قديمة طلاب كانو يستخدمونها للدراسة قد تفيدك

https://www.youtube.com/channel/UCrF...x2SrIeQ/videos

اقتباس:

المشاركة الأصلية كتبت بواسطة loge (المشاركة 12403677) طيب عطنا جدول انا تحمست بس من اسكر موضوعك راح انسئ يروح الحماس ولاراح اسوي شي طيب وش رايك كشخص متعلم اللغه تعطينا جدول حق اسبوع )))متاثره بالملخصات ههههههه بس جد يعني وش نسوي مثلا باليوم حق اسبوع بس واحنا نستمر عليه مدري كيف اوضح اكثر بس يعني من خبرتك

نصائحي مافيها جداول و لا وقت محدد و لا ساعة تخصصها للدراسة و لا شي، كل ما عليك هو تغيير الروتين من أخبار عربية إلى إنجليزية، جهاز عربي إلى إنجليزي... إلخ، يكون كل شي بالإنجليزية بالكامل بالنسبة لك.

اقتباس:

المشاركة الأصلية كتبت بواسطة البندري11 (المشاركة 12403884) كلام رااااائع جدا بل في منتهى الروووووعة ولا يقل روعة عن كلام تهاويل جزاك الله خير لأنك مادخلت وأعطيت من وقتك وجهدك الا لمصلحة الجميع أسئل الله ان يوفقك لما يحب ويرضى وكذالك تهاويل جزاه الله خير على ماقدم الله يجعلها في موازين حسناته وليت فيه موضوع في الملتقى يجلس شغال على طول لتعلم اللغة بقيادتك او قيادة احد الأخوان او الأخوات يعني زي مسابقات وفوائد وزي كذا يعني نتشجع مع بعض والله يوفق الجميع لما يحب ويرضى

عفواً أنا شخص يفضل المذاكرة لوحده و لا يحب الإختلاط و التحدث كثيراً مع الآخرين، لكن يمكنك تنسيق هذا الموضوع مع الكثير من الأعضاء الممتازين هنا

اقتباس:

يعني مثلا ينزل جملة او مثل وكل شخص يترجم وينزل ترجمته ونشوف أفضل ترجمة او الأصح وهيك يعني

إذا تم العمل على النصائح التي سردتها في هذا الموضوع راح كل شخص يحسن إنجليزيته بنفسه بدون الإعتماد على الآخرين و الانتظار، لا أقول أن العمل الجماعي لا يثمر بنتيجة، لكن هذا ليس أسلوبي


شكراً لكم على التعليقات

موفقين



::