|
نصيحه
سلام عليكم
مساء/صباح الخير للجميع وان شاءالله فالكم النجاح جميعا اللي يسأل عن النتائج راح تكون بعد 20 يوم من اليوم بحكم تجربتي لأول ترم ومستوى بالجامعه اشوف فيه ناس بالمنتدى يشتتون تركيز الطلبه بشكل كبير وواضح جدا لما يشوف تعليق او استفسار يدخل ويفتينا بسطر او سطرين ويمشي صح غلط ما عنده اي مشكله اهم شيء يكتب ويضيع الطلبه بكلامه اقرب مثال تعليقات بعض الطلبه على الكويزات وتصحيح الاخطاء يقول فيه سؤال غلط ولا يجيب الحل الصحيح وهذي مصيبه ممكن يضيع علينا اجابة هالسؤال والسؤال هذا احتمال كبير يكون فيه حمل للماده وممكن تعدي فيه نوع ثاني من الطلبه يدخل ويخوف الطلبه عن الماده ويصيبك توتر حتى لو كنت مذاكر نوع ثالث يقولك انا سمعت الدكتور يقول ماراح يجيب أسئله من الاعوام السابقه!!!! او الدكتور هذا ماراح يجيب شيء من الاسئله السابقه او ان الدكتور يغير اسئلته كل ترم بالله عليكم من وين بيجيب الدكتور اذا كل ترم يختار 50 سؤال خلال اربع اترام بيكون المجموع200 سؤال من وين بيخترع أسئله جديده اذا كل الاسئله ذكرها بالاترام السابقه ؟ أسئلة الاعوام السابقه ضروريه ولابد منها لمعرفة طريقة الدكتور بالاسئله واغلب الاحيان يجيبون الدكاتره منها نســــخه كربونيه بالنسبه للأعتراض على مادة مباديء الاداره او غيرها من باب اولى اي مستوى يشتكي من ماده المفروض يساعدونهم باقي الطلاب اللي ضامنين الحل ويتضامنون ويشتكون الحـــــلــــــــولـــ ســـــــــــهـــــــــــــلـــــــــــه: لا احد يكتب شيء الا متأكد منه مليون الف مره عشان ما يوهق خلق الله اذا فيه شيء مفيد للطبه نزل موضوعك اي ماده صعبه الكل يشتكي ااذا فيه كويز غلط اكتب الصح نـــــــــــــصـــيــــــــــحــــه أخـــــيـــره: اذا جاء ليلة الاختبار وما ذاكرت ابد لا تذاكر الا اسئلة الاعوام السابقه والكويزات وتوكل بالله صدقني بتعدي لا تيأس ابدا اللي عنده شيء يضيفه هنا عشان نتلافى الاخطاء مستقبلا لسى ببداية المشوار ورانا مشوار طويل |
رد: نصيحه
المشكله لما احل الكويزات القى كل كويز له اجابه غير عن الكويز الثاني ساعتها انا كيف اعرف اي كويز اجاباته هي الصحيحة ؟؟
ياليت يركزون اللي يسوون الكويز الله يجزاهم خير لان اغلب مذاكرتي منه واعتمده اكثر شي |
رد: نصيحه
:d5::d5: اقسسسسم بالله كلام في الصميم وفي خاطري يجوووول ووقعت فيه امس جاني رعب لما دخلت المنتدى وشفت الترعيب والتخويف على اني مذاكره الماده والمشكله معاد ركزت في الاسئله لما سمعتهم يقولون مراح يجب مثلها بيغيرها والي ضيعني اكثر اختلاف الاجوبه اليوم في الاختبار ماادري اخط جواب الملخص والا جواب المنتدى ضعت :000::000: |
رد: نصيحه
النصيحه جت متاخره مدري وش نقول لك
على العموم يعطيك العافيه وان شاء الله نتذكرها بالترم الجاي |
رد: نصيحه
اقتباس:
ويطبقونه الشباب لأن الوقت طويل الان لحد ما تجي الاختبارات القادمه يعني يمديهم يعدلون الكويزات اذا فيها اخطاء والخطاء وارد بس اخطاء المنتدى فادحه |
رد: نصيحه
انا ما قلت هالكلام بالوقت هذا
الا عشان نتلافاه بالاختبارات القادمه ويعلم الله قلت هالكلام بالردود على الشباب بالمنتدى بس ما كتبت فيه موضوع مستقل لا بس ردود ولا زالت المشكله مستمره وكل يوم اختبار اقوى من اللي قبله لكن وش اقول حتى اانا بس المشوار طويل باقي لنا كثير باقي 7 اترام لعلى وعسى يتعدل الوضع ونمشي سوا بالمستويات ونتلافى الاخطاء اهم شيء العمل وحنا نعمل والعمل لابد اخطاء ولا انسى اشكركل من شارك بكويز او اي شيء مفيد |
رد: نصيحه
الله يجزاك خير الواحد لازم يعرف أسلوبه في المذاكرة علشان ما يمشي ورا كلام حيى الله
|
رد: نصيحه
صراحه الكويزات فيها إغلاط وهذا سبب تشتت عندي وحلول غلط بالاختبارات لدرجة اني استغنيت عنها باختبار الصحه :(
|
رد: نصيحه
اقتباس:
وش دخل الاسلوب نتكلم عن نقاط ضيعتنا بالمستوى الاول فيه ناس مجبوره تذاكر من المنتدى وكويزاته لعدم توفر ملازم عندهم واخرتها غلط هنا المشكله ! |
رد: نصيحه
والله عندك حق بكل كلمة قلتها انا وقت الاختبارات بطلت ادخل في المنتدى بسبب كمية الطاقة السلبية اللي تنبعث منه والتوتر من جد ضيعوا علي اختبار النحووو بسبب مذاكرتي واعتمادي كلام الاعضاء هنا بعدها تركت المنتدى ما ادخله الا اذا خلصت الاختبار وبديت اذاكر بمفهومي و الحمد لله باقي المواد مشيت فيها فالله يخليكم يا اعضاء انتبهوا لكلام الاخ نيف١ |
| All times are GMT +3. الوقت الآن حسب توقيت السعودية: 05:48 PM. |
Powered by vBulletin® Version 3.8.7, Copyright ©2000 - 2025, Jelsoft Enterprises Ltd. جامعة الملك
الفيصل,جامعة الدمام
المواضيع والمشاركات في الملتقى تمثل اصحابها.
يوجد في الملتقى تطوير وبرمجيات خاصة حقوقها خاصة بالملتقى
ملتزمون بحذف اي مادة فيها انتهاك للحقوق الفكرية بشرط مراسلتنا من مالك المادة او وكيل عنه