ملتقى طلاب وطالبات جامعة الملك فيصل,جامعة الدمام

ملتقى طلاب وطالبات جامعة الملك فيصل,جامعة الدمام (https://vb.ckfu.org/index.php)
-   ملتقى الفنون الأدبية (https://vb.ckfu.org/forumdisplay.php?f=150)
-   -   [ شعر ] : يا لحون العود (https://vb.ckfu.org/showthread.php?t=602932)

Sul6an Suba3ei 2014- 7- 20 03:42 AM

يا لحون العود
 

يالحون العود والا يامجارير الربابه …. إختلف معنى القصيد وضيّع الفنان فنه

حلم مدري علم مدري نوض برقٍ في سحابه ….. أثرها طلّة جبينه يوم زاح الليل عنّه

أقبلت مثل الفرس لا سمعت طبول الحرابه ...... مقتفيها ليلٍ أسود والنجوم يفرّقنّه

النهار يمر ويعدّي وليله في عقابه ...... النحر صبحٍ تجلّى والجدايل كنّهنّه

مخملٍ يلتفّ فوق الجيد الأتلع بالنيابه ...... عن سلاسيل الذهب والماس خوف يجرّحنّه

غاب عنّي والوله خلاّه عندي في غيابه ...... مادرى ان فرقاه نار ولا درى ان لاماه جنّه

ياوجودي وجد من صفّق على ماضي شبابه ..... بان شيبه والسنين اللي يبيهن خالفنّه

غرّته خضر السنين وراح عمره مادرى به ......غرّرنّه وارفعنّه لين سجّ وحولنّه

وياوجودي وجد عودٍ لا عيال ولا قرابه ..... ماجداه إلا يونّ ويردف الونّه بونّه

مالقى فزعة رفيق ولا دعاةٍ مستجابه ...... كلّ ماامسى له بظنّ خيّبت الايام ظنّه

هذا وجدي في غياب اللي نزح والله جابه ...... صح فرض الله فرض وسنّة المرسول سنّه

الغلا جسمٍ رقيق ومرهف احساسي ثيابه ..... مثل غصن الورد يوم الهبايب يطرقنّه

مازرعت إلا غلاه ولا نقلت إلا صوابه ...... والحشا ماضاق من خضر الطعون المستكنّه

ياحبيبي مازها كفّ الخضاب إلا خضابه ...... فيه نظم المفردات وفيه للعشّاق عنّه

الظبي ماله شبيه وبينك وبينه تشابه …… إلتفت بشويش وألقى فيه منك وفيك منّه

خالقك من فضّل محمد على كلّ الصحابه …… وسخّرك مثل المهار اللي تسخّرها الأعنّه

والثنا والشكر للي رحمته تسبق عذابه ...... لا لخلق الله شكر ولا لخلق الله منّه

قاله اللي ماخذا مما يريد إلا هبابه ....... خيرة الفارس ثنيّة خيل صفراً مستعنّه

للشاعر/ سلطان بن وسام


Dr ʀeнαв 2014- 7- 20 07:14 PM

رد: يا لحون العود
 
_


قصيدَه جميله بقافيَه صعبه
كلمات وتصورات رائعه من الشاعر سلطان
صح لسانه واعتلا مقامك ع النقل
أختيار جيد أخوي
كل الشكر لك

Sul6an Suba3ei 2014- 7- 20 09:54 PM

رد: يا لحون العود
 
يطول لي عمرك على مرورك لا خلا ولا عدم

وعلى قولك اختي رحاب قافية صعبه وتصورات رائعة واسم الشاعر سلطان

لكل امرئ من اسمه نصيب :(291):

الــغـــدراء 2014- 7- 23 11:51 PM

رد: يا لحون العود
 
،،


قصيدة جميلة من الشاعر / سلطان الهاجري
و بها من التشبيهات و الصور الإبداعية الشئ الكثير
أنتقاء يدل على ذوق [ سلطان ]
و نقل رآآآآآئع

لآهنت ،،،


.

Sul6an Suba3ei 2014- 7- 24 04:03 AM

رد: يا لحون العود
 
يطول لي بأعماركم جميعا لا خلا ولا عدم


All times are GMT +3. الوقت الآن حسب توقيت السعودية: 10:47 AM.

Powered by vBulletin® Version 3.8.7, Copyright ©2000 - 2025, Jelsoft Enterprises Ltd. جامعة الملك الفيصل,جامعة الدمام

Adsense Management by Losha

المواضيع والمشاركات في الملتقى تمثل اصحابها.
يوجد في الملتقى تطوير وبرمجيات خاصة حقوقها خاصة بالملتقى
ملتزمون بحذف اي مادة فيها انتهاك للحقوق الفكرية بشرط مراسلتنا من مالك المادة او وكيل عنه