|
500 ريال لحضور الدورة التدريبية !!
السلام عليكم
هذا أول موضوع لي .. واضح اني مشكلجي :) بس ما تلاحظون ان 500 ريال لحضور الدورة التدريبية ( على النت ) هو استغلال ؟! يعني ليه ما يحطون رابط فيديو يشرح كل شي وانتهى الموضوع !! الجامعات الثانية ليه ما ياخذون ؟! على كل حال .. بندفع والشكوى لله :) بس مانتم معي في هالشي والا انا بس بلحالي اللي حاس كذا ؟! والا انا فاهم غلط ؟! |
رد: 500 ريال لحضور الدورة التدريبية !!
وعليكم السلام ورحمة الله وبركاته لا يا استاذي ماهو باستغلال رسوم الدراسة 150 للساعه ونفس الحكاية تنطبق على الدورة التدريبة مدتها 3 ايام كل يوم من ساعه الى ساعتين ولو تحسب الساعه بـ 150 × 3 بتطلع 450 وعلى حسب تقطع النت واسئلة الطلاب اذا بتزيد او بتضل ساعه اذا بتركز بالدورة وتطبق مابتشوف انها خساره واذا تقطع النت بيخّرب عليك صدقني الـ 500 بتروح خسارة |
رد: 500 ريال لحضور الدورة التدريبية !!
^ طبعًا بالتأكيد بتحصل ناس مأيدينك وكذا :) بس انا رأيي يمثلني فقط ولا يمثل غيري ولاني استفدت من الدورة التدريبية واغنتني تمامًا عن الاستفسار كيف اسوي كذا وكيف احل الواجب وكيف اراسل الدكتور ... الخ ما اشوف ان الـ 500 راحت هباء |
رد: 500 ريال لحضور الدورة التدريبية !!
أنا ما عندي اعتراض على الدورة نفسها ..
ولكن أقول ليه ما يكون لها رابط على موقع الجامعة وكل من يبي يدخل ويشوف ويتعلم مجاناً ؟ يعني ليه الـ 500 ريال هذي ؟ يعني ما اعتقد ان الموضوع فيزياء :) كلها خطوات للتعامل مع نظام التعلم عن بعد. |
رد: 500 ريال لحضور الدورة التدريبية !!
^ النظام في تطور كل ترم يتطور عن الترم اللي سبقه يعني لو حطوا فيديو واحد مثل ماتقول ما اعتقد بيستفيد منه الا طلاب السنة اللي نزل فيها الفيديو بالاضافة الى ان الناس قدراتها تختلف يا استاذي يعني ممكن انا عندي ميول تقنية وافهم للبلاك بورد من هالفيديو غيري ما يفهم الا اذا سأل واستفسر وشرح صح ؟ وبعطيك مثال صغير بالمحاضرات المسجلة اللي كانت تنزل موب كلنا كنا نستوعبها فينا اللي يفهمها بسرعه وفيه اللي ينتظر المحاضرة المباشرة عشان يسأل الدكتور ويفهم منه اكثر اما ليه مايخلونها مجانية .. ما اعتقد ان فيه احد بيتطوع و بيتعب نفسه وبيشرح لمدة ثلاث ايام ويرد على ثلاثة ارباع الاستفسارات ببلاش :) |
رد: 500 ريال لحضور الدورة التدريبية !!
اقتباس:
تقوله بس كذا لانك ما جربت تدرس بالتعليم عن بعد اذا انت من النوع اللي يفهم بسرعه بالتقنية غيرك وصل المستوى الرابع وهو الى الان ما يعرف كيف يفتح البلاك بورد .. بعضهم عبط مايبي يفتح ويتكل على غيره بس البعض واعرف اكثر من شخص حتى بعد ما افتحه قدامهم يرجعون يقولون من وين نفتحه :10: |
رد: 500 ريال لحضور الدورة التدريبية !!
أشكرك حقيقة على تجاوبك وتفاعلك مع الموضوع :)
- لو كان النظام يتطور سنوياً فليه ما يطورون (الفيديو التعريفي) كل سنة ؟ - أنا أطالب بأن تكون مجاناً ليس لحضور دورة يلقيها محاضر .. تكون مجاناً بمعنى يكون هناك (فيديو تعريفي) متاح للجميع مشاهدته. وإذا كانت المسألة تفاوت في الفهم بين الطلاب .. بعضهم يفهم بسرعة وبعضهم نص ونص وبعضهم من جنبها :) ليه تجبرني الجامعة اني ادفع مقابل شيء أنا أرى في نفسي اني ما احتاج له ؟! غيري يحتاج ؟ بكيفه يدفع. ليه ما يكون الموضوع اختياري ؟ يبقى السؤال العريض هو : ليه بقية الجامعات ما تجبر طلابها على أخذ مثل هذه الدورات وبمقابل مادي ؟!!! ليه جامعة الدمام فقط ؟!! |
رد: 500 ريال لحضور الدورة التدريبية !!
كل جامعة ولها سياستها الخاصة جامعة الدمام تشوف من الضروري تدريب طلابها على النظام الجامعات الثاني ماتبي شيء يرجع لها وقد قلتها من قبل كل جامعه تتفرد بميزة ما تحصلها عن غيرها والدورة التدريبة لطلاب التعليم عن بعد اتوقع انها ميزة موب موجوده بجامعة ثانية وللعلم فيه فيديو تعريفي مجرد ما تدخل البلاك بورد بتحصله ولاكن مع ذلك فيه محاضرة مباشرة للدورة التدريبية ترجع تشرح لك كل شيء من الصفر طبعًا لك وجهة نظرك اللي ما اقدر اغيرها ولي وجهة نظري اللي ما اتوقع في مخلوق يقدر يغيرها :biggrin: واشوف انه الدورة التدريبية مهمة جدًا وارجع اقول لاني استفدت منها ما تحفست على الـ 500 اللي راحت لها وانصحك تراسل العميد او الوكيل يمكن يتجاوب معك بهالموضوع ويتفاعل ويرد على استفساراتك اما يقنعك بالموضوع ولا تنقنعه ويشيلون الـ 500 :cheese: |
رد: 500 ريال لحضور الدورة التدريبية !!
انا عني ما استفدت من الدوره التدريبيه كانت سطحيه جدا اشياء كثير تعلمناها مع الوقت من خلال الاستخدام اليومي :29: واساسا حتى لما فات وقت الدوره وطلاب من الضغط او من النت مادخلت نزلوها مسجله
مفروض تكون مسجله وبلاش هال500 مع انها ماتقدم ولا تأخر بس هذي وجهة نظري :1: انا اساسا باقي لي 300 ريال عندهم من الساعتين حقت المستوى الثاني الي سددت قيمتها وبعدها تغيرت وقالو راح ترجع او تنخصم بس انا ما رجعت ولا انخصمت وعادي جدا تستمر الحياه نفس الشي لاتقدم ولا تأخر :29: المهم معليش شطحت :35: بالتوفيق للجميع :1: |
رد: 500 ريال لحضور الدورة التدريبية !!
الأخت نصرون .. ربما ترينها ميزة وأراها شي سلبي ..
وكما قلتي لكل منا وجهة نظره :) الـ 500 ريال من وجهة نظري لا تحتاجها الجامعة لـتأخذها من كل طالب .. بينما هذا المبلغ يفرق مع الكثير في هالزمن .. ما يطلق عليها (دورة تدريبية) بالإمكان تعلمها عن طريق مقطع فيديو .. لا تحتاج أن ينتدب لها محاضر ويلزم كل طالب بدفع رسوم لحضورها .. وفي الأخير يقول البعض أنه بإمكانك أن تشاهدها مسجلة :)) الأخت دافورة .. أشكر مداخلتك .. وحكاية الـ 300 هذي يبيلها موضوع منفرد :) |
| All times are GMT +3. الوقت الآن حسب توقيت السعودية: 02:18 AM. |
Powered by vBulletin® Version 3.8.7, Copyright ©2000 - 2025, Jelsoft Enterprises Ltd. جامعة الملك
الفيصل,جامعة الدمام
المواضيع والمشاركات في الملتقى تمثل اصحابها.
يوجد في الملتقى تطوير وبرمجيات خاصة حقوقها خاصة بالملتقى
ملتزمون بحذف اي مادة فيها انتهاك للحقوق الفكرية بشرط مراسلتنا من مالك المادة او وكيل عنه