ملتقى طلاب وطالبات جامعة الملك فيصل,جامعة الدمام - شعر مدري بكى حلم ؟ .. مدري ليلةٍ غبْرة ؟

- ملتقى الفنون الأدبية (https://vb.ckfu.org/forumdisplay.php?f=150)

- - [ شعر ] : مدري بكى حلم ؟ .. مدري ليلةٍ غبْرة ؟ (https://vb.ckfu.org/showthread.php?t=472213)

مدري بكى حلم ؟ .. مدري ليلةٍ غبْرة ؟

مدري بكى حلم ؟ .. مدري ليلةٍ غبْرة ؟
نسيوني أحباب ولاّ ضاعت أخبـاري ؟

هي إتدبّر ؟ .. أو أقفَت مابهـا دِبـرة ؟
ليـت الليالـي تقـدّر غربـة السـاري

مدري من اللّي من الثاني نفذ صبـره ؟
لا يازمن .. من هو البايع من الشاري ؟

لا الوجه وجهك ولا النبرة هي النبـرة
مدري.. ولكن طرا لك يازمن طـاري

ماني بجاهل على الشـدّات .. تختبـره
تشتدّ ياوقت .. وإصراري هو إصراري

بالقلب ما تعرف العبـرة مـن العبـرة
وبناظري غيمةٍ مـا تمطـر أسـراري

خلّيت الأحزان بأقصى القلـب منثبـرة
ياكثر كذبي علـى نفسـي وأنـا داري

قـم ياقصيـدٍ يعـزّي لا إنتثـر حِبـره
إليا حدانـي زمانـي تفـزع أشعـاري

وإن بـار فِيَّـه رفيـقٍ كنـت معتبـره
أغلى من الروح .. ما نّزلت مقـداري

والله لو ردّ هـاك الحـبّ مـن قبـره
مارِدّ له .. لين تبرد غلّتـي .. ثـاري

ماكلّ شـقٍّ .. مـداه السلـك والإبـرة
وماكلّ عينٍ .. تجامل جرحي العـاري

إمّا يقولون .. طاح الضلع .. من كبره
ولاّ يقولون .. ماهو للوطـى ضـاري

كلٍّ تكلم وكلٍّ خابـرٍ خبـره وبكـره ..
يبيـن الصحيـح .. إن سهّـل البـاري

البارحة ضقت .. وأثر البارحة غبـرة
مدري بكى حلم ؟ ولاّ ضاعت أخباري ؟