ملتقى طلاب وطالبات جامعة الملك فيصل,جامعة الدمام - جميع التخصصات مرّ ترم بحلوه ومره ... :)

"بورك لأمتي في بكورها " ♡

- مرّ ترم و لله الحمد، مرّ بحلوه و مرّه و بكلّ أحداثه السّعيدة و الكئيبة .. بحمد لله مرّ! و قدّامنا ترم آخر، صفحة جديدة و مشوار جديد
- نستقبله، ونحطّ بداخلنا فكرة إنّ هالترم بإذن الله بيكون أجمل من سابقه، نكسر الروتين! الحياة مو دراسة وبسّ، ونحرم أنفسنا من الأشياء اللي نحبها
-دائمًا هناك وقت لكل شيء، بس لو ننظّم الوقت! نرتّب كل شي براسنا، و من راسنا كل شي يطير إحنا نحتاج للتنظيم عشان لا نتعثّر بالعثرات اللي مضت
-وقت النّوم يتحدّد، وقت المذاكرة يتحدّد، و وقت أنفسنا يتحدّد! الكلام مثالي و أنا وقتي حايس .. قاعدة أرتّب أفكاري هنا و بطبّقها بإذن الله ()
- مجدّدًا آخر شي، ما ودّي الكآبات اللي قعدت أصيح منها أمس تتكرّر بكرة، النّظام إذا احتاس تنقلب النّفسية مرّة وحدة و لاححد يقرّب! طيّب على وشو؟
-لما يغيب عن أذهاننا الإتكال، و وكل أمورنا إلى جهودنا يخيب ويخرب كلّ شي جهودنا قد ما كانت كبيرة الله يرحم بحالنا، ما بتغير شي بلا عون الله
- مضايقك إنّ الدّوام بكرة؟ يعني بتغيبين؟ إن غبتِ فشيّ راجع لك، و إن داومتِ يا هنيّالك دام خالفتِ هوى نفسك! و إذا مغصوبة عادي إحتسبي بعد Oo
- المهم التّرم الجاي () لا نستقبله بالضّجر والتذمّر والبؤس والملل والشّؤم، كلّها أشياء ما تجوز بنتبطّر عالنّعمة؟ كم غيرنا يتمنّاه ولا لقا..
- المقارنات تحسّسنا بالنّعمة اللي احنا فيها، طيّب غير المقارنات .. الدّراسة طلب علم و طريق جنّة! طول ترم كامل ننهل بالأجور طوول الترم!
- فضيلة طلب العلم أبدًا مو شيّ يسير و هيّن، و فيه مشاقّ على طول السّنة و أحمال تكسر ظهورنا، ضغوط و واجبات و بحوث و امتحانات و وو ...
طلب العلم عند الله مو شي قليل () ورث الأنبياء اللي هم أشرف الخلق، وقُربى إلى الله في الوقت اللي انشغلنا عن العبادات الأخرى، طيب هو عبادة!

ايضاً شيئاً آخراً لو أحتسبوا إستيقاظهم ف الصباح الباكر لوجه الله ، لإنهالت الأجور بإذن الله دون أن يعلموا ()
- الله عادل ما يظلم و بقدر الجهد و لمشقّة يكون الأجر، والله كريم ذو فضل و فوق الأجر يعطي أجر، إذًا حقّنا عند الله أبدًا ما يضيع و إن ضاع هنا!
- هذا لمّا نستشعر إنّ احنا في عبادة طول التّرم، و احتسبنا عند الله طول التّرم، حطّوا للإحتساب وقت و وقّتوا منبّهكم للدوام و سمّوه احتساب!
- نذاكر و ندخل الإمتحان و ثقتنا بقدر جدنا و جهدنا بالمذاكرة، طيب وين الثّقة بالله؟ من قبل المذاكرة و من قبل الإمتحان، وين الإتكال!
- إذا انخسفنا بالدّرجات قلنا احنا ذاكرنا وتعبنا وما لقينا جهدنا، وتعبنا على فاضي.. طيّب مو هي درجات دنيا تروح وتجي،؟لو احتسبنا الجهد عند الله!
-كلّنا نحتاج للصديقة اللي إذا ضقنا أو تكدّرنا من منهج من امتحان من أستاذة، تجي تذكّرنا بالله و تقول وكليها لربّك، النّاس ما بيفيدونك ...
- طيّب ليش ما نصير إحنا ذيك الصّديقة اللي تذكّر النّاس؟ من يدري أي كلمة ننطقها يضع الله لها تأثير في قلوب عبادة، و ممكن تصير نقطة تغيير ..
- طيّب ليش ما نصير إحنا ذيك الصّديقة اللي تذكّر النّاس؟ من يدري أي كلمة ننطقها يضع الله لها تأثير في قلوب عبادة، و ممكن تصير نقطة تغيير ..

مو بس درجات دنيا ، الحرص على المذاكرة من إتقان العمل ، (من عمل منكم عملا فليتقنه) معنى الحديث
- الإحتساب ثمّ الإحتساب ثمّ الإحتساب، و التوكّل يلازمه! في منّا اللي يدرس مجبور من البداية و لا هو طايق الدّوام أصلا، طيّب احتسبي
- محّد مثالي! احنا ما انخلقنا في عالم مثالي أصلا، لكننا نسعى إنّنا نخلي الحياة مكان أفضل للعيش، مو أي شي يواجهنا يقلبالأخلاق صفر مرة وحدة
- و لو بنعدّد المرّات اللي قلبت أخلاقنا من الدّراسة و صحنا و تحوّلنا نفسيّة ما بنخلّص ذذ، و نستاهل الحقّ علينا ما وطّنا أنفسنا على الرضا
- خلاصة القول اللي مو راضي يخلّص، الله خلق لنا عقل نفكّر فيه، و عيب علينا إنّنا نقع بنفس أخطاء الماضي أمس تعثّرنا .. بكرة نتخطّاها!
- كلّش بالنّهاية بيعود لنا، إن تذمّرنا لنا، إن رضينا لنا، إن تكدّرنا لنا، إن توكّلنا لنا، إن احتسبنا لنا .. إحنا اللي نختار وش اللي نبيه يعود
-ترم جديد بإذن الله، نفسيّة جديدة بإذن الله، إستقبال أفضل، تفاؤل أكبر، ثقة و حسن ظنّ بالله، احتساب، تسليم كلّ الأمر لله، الدّعاء ..
- و ما بيضرّنا كلام المثبّطين، هو لا رفعنا و لا خفضنا .. و يرفع الله أقومًا بعلمهم و يخفض آخرين، أسأل الله أن يجعلنا ممن يرفعهم في جنّاته :"
- على الطاري، كلّ اللي بالهم وسيع مرتاحين نفسيّا تبارك الله، عرفوا كيف ياخذون الأمور ببساطة رغم صعوبتها، يا ناس إحنا نتعامل مع الله!
- الدراسة مو ساحة معركة و البقاء فيها للأقوى، وسعوا صدوركم بس و روقوا و وكّلوها لله، كل ضيق الدراسة ينفرج كما لو أنّه لم يكن :"")
- وسيرة سلفنا الصالح مليئة بأخبار هذه الرحلات العلمية فقد كان الرجل يقطع الفيافي والقفار من أجل الحديث الواحد والخبر من الأخبار* < همّة + علم!
- أكثروا من الدّعاء بقلب موقن بالإجابة () لو بنتكلّم عن لطائف الله و رحماته اللي تحفّنا في كلّ عمرنا ما بنخلص، ادعوا و ثقوا، و الله مجيب ()
- فلسفة أخيرة: كوني إيجابيّة و تحكّمي في الظروف المحيطة بك، اصنعي أنتِ الظروف! حتّى و إن أُجبرتِ على أمرٍ ما، توكّلي على الله .. ثمّ اسكني ()
- الله يوفقكم و ييسر لكم و يفتح عليكم أبواب الخير كلها () ويا ربّ ترم مليء بالبشرى والمسرّات والأحداث السّعيدة جدًا، والله يسرّ خاطركم بالأجمل
- الله يوفقكم و ييسر لكم و يفتح لنا أبواب الخير كلها () ويا ربّ ترم مليء بالبشرى والمسرّات والأحداث السّعيدة جدًا، والله يسرّ خاطركم بالأجمل

- من كتابات ( إحدى الطالبات )
وفقها الله ♡
ッ

...