ملتقى طلاب وطالبات جامعة الملك فيصل,جامعة الدمام - بخصوص تخصصات الهندسه .. للسنه الاولى تخصص السميستر الأول

السلام عليكم و رحمة الله و بركاته ..
يعطيكم العافيه جميعاً .. ان شاء الله بكرا السبت أول يوم دوام رسمي لجميع طلاب و طالبات جامعتنا الحبيبه ..:biggrin:

اتمنى من الجميع التفائل ثم التفائل ثم التفائل مع البدايه و ان شاء الله يارب كل الأمور تتسهل .. :106:

حبيت أذكر مواد السنه الأولى لتخصص الهندسه الميكانيكيه و المدنيه " السميستر الأول" .. خصوصا انهم يتشابهون بالسنه الأولى بنسبه 99% ..

و أتمنى اي شخص عنده اضافه يذكرها بالموضوع ..

السميستر الأول بالتخصص بالنسبه للهندسه الميكانيكيه ..

Calculus I

مادة رياضيات ما اقدر اقول سهلة او صعبة تعتمد على تركيز الشخص و حبه للرياضيات
بس بالطبع التركيز مع الشرح فهم المسائل أول بأول رح تصير سهلة
وهي تتكلم عن الاشتقاق و التكامل ..

English Composition I

ماده فيها الكتابه أكثر من غيرها
تقدر تقول رياتينج + ريدينج مدموجين مع بعض
ما فيها لا جرامر و لا ليسينينج

حلوه و ما فيها صعوبه بس اللي بيتخرج من التحضيري ضعيف بكتابة البرجراف رح يواجه صعوبة فيها
لأنها اعتمادها الكلي على كتابة القطع

General Physics I

ماده فيزياء انا اشوفها ممتعه يمكن لأني احب الفيزياء
و ممتعه القسم العملي منها مع دخول اللابات و التجارب اللي نسويها
و طبعا بشكل اسبوعي يتطلب عمل ريبورت نهاية كل تجربه
و طبعا كل دكتور له طريقة :cool:

General Chemistry

أنا بصراحه واجهت صعوبة مع هالماده :mad:
لأني اكره الكيمياء .. بس هي نفس مرحلة الـ3 ثانوي تمااااااااماً
بس انها باللغه الانجليزيه
فيها توزيع إلكتروني و وزن المعادلات و هالشله كلها :sm5:
و فيها قسم عملي ممتع اللي هو المختبر نسوي تجارب
و تطلب ريبورت بشكل اسبوعي بعد نهاية كل تجربه ..

Belief and its Consequences

مادة دين باللغه العربيه

سهلة جدا و مثل هالمواد تعتبر مادة رفع معدل
ممكن في صعوبة خفيفه لأنها تحتوي على أدله مكثفه ..

Arabic Practical Grammar

مادة عربي
سهلة جدا و ايضا مادة لرفع المعدل
المبتدأء و الخبر و الفاعل و تفرعاتهم

كذا انتهينا من السميستر الاول .. مجموع الساعات "19 ساعه " "24 محاضره بالأسبوع"

بالنسبة للمدنيه نفس الفوق زياده عنهم عندهم ماده "ساعه واحده فقط "
وهي مدخل للمدنيه يعني زي تعريف عن التخصص .. ماده حفظ فقط ..

****

*نقاط عالسريع ..

- أتمنى من الجميع بأول يوم يروح عند اي مكتب إداري و يطبع الخطة الدراسيه الخاصه بتخصصه علشان يتعرف على المواد أكثر و يكون عنده علم بجميع مواد تخصصه ..

- قبل لا تقدم على خطوة حذف ماده تأكد انه كل سميستر رح تتكثف المواد و تصعب و اذا ما اخذتها الآن متى بتاخذها !! مع المواد الأصعب !!!

- قبل لا تقدم على خطوة حذف ماده تأكد انه السميستر الجاي مو اكيد تقدر تنزل الماده اللي حذفتها لأنه يمكن و نسبه كبيره يصير تعارض مع مواد ثانيه
لأنه انت اخذتها بوقت مو وقتها !!! ..

- قبل لا تقدم على خطوة حذف ماده تأكد انه مو أكيد تفتح هالماده السميستر الجاي يعني يمكن تنتظر سنه علشان تقدر تاخذها ..

- قبل لا تقدم على خطوة حذف ماده تأكد من الخطة الدراسيه في مربع اسمه per-req و معناه المتطلب
يعني انت لازم تاخذ ماده علشان تفتح ماده .. مثلا لازم تاخذ "English Composition II" علشان تفتح "Business Communication" و هكذا ..
يعني انت بتحذف ماده ممكن تتأخر سنه علشان الماده بالسميستر الجاي ما قدرت تاخذها لأنه لازم تاخذ الماده اللي حذفتها أول ..

- قبل لا تقدم على خطوة حذف ماده تأكد انه مو شرط انت حذفت الماده تقول عادي اخذها بالصيف !! نظام الصيف عندنا مافي مواد ثابته يعني انت وحظك تنزل او ما تنزل !! ..

****

بالنهاية هي مجرد و جهة نظر و تجربة شخصيه و استفاده من اللي قبلي ..

وكل واحد عارف مصلحته .. و الله يوفق الجميع و يسهل علينا جميعا ..

و اعذروني عالإطاله ..

اي اسفسار انا حاضر ..

طبعا كلامي للطلاب و الطالبات .. ان شاء الله اكون افدتكم و لو بجزء بسيط :rose: