ملتقى طلاب وطالبات جامعة الملك فيصل,جامعة الدمام

السلام عليكم ويسعد الله صباحكم راحت الصيفيه ودخل علينا شهر الصيام وقدر الله اني ماسافرت ووسعت صدري ونفست عن العيال خصوصا بعد موسم استثنائي وشاق بالنسبة لي ولكن الحمد لله على ماختاره الله قبل لحظات كنت احدث نفسي وتحدثني وكنا في نقاش حاد عن عام مضى لم يراعي كل طرف فيه الطرف الاخر وتصرف كلا الطرفين (انا ونفسي) بانانية مفرطه حيث كان الحديث على النحو التالي:
انا: آه يالقهر وشفيها لو اجلت بعض اشغالي وحجزت مثل ابو سعود وابو راشد ورحت لسالزبورغ
نفسي: هه النمسا مره وحده يارجال قل ابها او دبي على الاقل,,, والله اني قرفت منك ابي ارتاح ياخي انا وش ذنبي تربطني معاك؟؟
انا:انتي آخر وحده تتكلمين مو كافيك اني مدلعك حتى على حساب صحتي... دخان وخليتك على راحتك اي شي تشوفينه وتبينه اجيبه لك ان شفتي سياره حلوه جبته وان بغيتي شلة الاستراحه وديتك وعلى حساب عيالي وان بغيتي تسهرين اهيألك الجو وانواع المكسرات لدرجة ان امي مرات تبي مشوار وانتي تقولين صبر شوي بعد مباراة النصر( عاد لو هو برشلونه مايخالف) والمشكله كلها خساير اكتفيتي والا اعد لك اكثر
نفسي: بلا بشكلك يعني ماسك علي ممسك!! أصلا لولا الله ثم انا كان ماكنت بهالوضع ياظالم لي 8 سنين وانا أزن على راسك تكمل جامعه والا كان للحين على ثنويتك اللي كاشخنبه لا وكرتون بعد من القديمات وبيتك اللي قاعد تطحنبه سنه مو انا اللي اقنعتك به والا ناسي.. أصلا انت ماكنت تعرف الا دوام ونوم هذا جزاي ياظالم؟
أنا::شوفي انا والله ماني شايل عليك لكن والله اني ناصح لك وتذكري ترى النفس أمارة بالسؤ هالحين رمضان قرب وارجعي لله واتركي عنك الشهوات والله ماضيعن الا انتي خليك سند لي ومعول بناء مو هدم لاتنسين انا مجرد جسد يعكس رغباتك وشهواتك لا حول لي ولا قوه تذكري ان الله عندما يخاطب بني آدم يخاطب النفس فيه وليس الجسد( كل نفس ذائقة الموت) و(نفس وما سواها فألهما فجورها وتقواها) وتذكري انك ثلاثة انواع حسب ذكر القران فأنت يأما1- نفس أمارة بالسوء ( وما ابرئ نفسي إن النفس لأمارة بالسوء إلا ما رحم ربي ) أو 2- النفس اللوامة
وهي النفس التي تكثر من لوم صاحبها ، فتوبخه عند وقوعه في الرذائل وتندم وتستشعر الندم والتقصير بحق الله
قال تعالى:
( لا أقسم بيوم القيامة * ولا أقسم بالنفس اللوامة) أو3- النفس المطمئنة
هذه النفس هي مستقر الإيمان ومستقر النور ، وهي نفس خاشعة محبة لله
قال تعالى:
( يـأيتها النفس المطمئنة * ارجعي الى ربك راضية مرضية ) فياليت انك تكوني الثالثه
نفسي: لا تعليق (توهقت)
انا:(بخبث) هاه اشوفك تبرطمتي ردي قولي أي شئ
نفسي:والله اني خجلانه من الله ومنك واوعدك اني اكون خير معين لك وانا والله تايبه توبة نصوحه وارجو من الله ان يتقبل توبتي والحين قم صل صلاة الفجر شوي ويذن واهديك هذا البيت
((لو كانت القلوب حجارة,,,,,,,
فقلب سيدي ريح صبا تشفي من العلل.........
أقدم اعترافا بالأخطاء قاطبة.........
لكنني عزمت على تصحيح أيما زلل...........
أرجوك بكل لحظة عطف وحب.......
منحتها لقلبي اصفح عن قلب بحبك لله يبتهل))
بالاخير أبشركم تصافينا وكل حب خشم الثاني اتمنى من اخواني واخواتي محاسبة النفس ومجتهدتها (لا تخلونها على كيفها ) انا الحمد لله الله نصرني عليها والله الله ببر الوالدين وبالصلاة ياخوان
يالله عاد جاء وقت الصلاة وتصبحون على خير