ملتقى طلاب وطالبات جامعة الملك فيصل,جامعة الدمام - ||| تنبيه هام جداً وضروري قبل الدخول إلى قاعة الإمتحان |||

- ارشيف المستوى 2 تربية خاصة (https://vb.ckfu.org/forumdisplay.php?f=255)

||| تنبيه هام جداً وضروري قبل الدخول إلى قاعة الإمتحان |||

السلام عليكم ورحمة الله وبركاته

الكل يترقب المنتدى ما سيكتب فيه لعل وعسى شي محذوف ، اسئلة للسمستر الماضي ، تلخيص
الكل طايرة(ن) عيونه وأنا منكم :mh12:

( مالكم بالطويلة ) على قولة ولد أبها ( الله يوفقه ويوفق من يقرأ هالكلام بعد )

السالفة مافيها عن الغش في الإمتحان
أرجوا أنكم تقرأون الموضوع للنهاية

ادري أنه مهوب وقت كتابة مواضيع جديده لكن هالأمر ضروري

والله شيء يضيق الصدر

غاص(ن) بهالموضوع ( وعلى لساني ) من الترم الأول من شيء شفته في قاعات الإمتحان

وأكيد أنكم شفتوه بعد وهو كثرة اللي يغشون

( وهذا والله ما يبشر بخير )

حكم الغش معروف ما يختلف عليه أثنين لكن اللي يضيق الصدر عدم أحساس الشباب بالمشكلة اللي هم فيها

والله أن الموضوع خطير ويترتب عليه أشياء كثيرة

الخجل ما أدراك من الخجل والمجاملات ( لا طاعة لمخلوق في معصية الخالق )

بعضهم ما وده يغش ولكن يفاجأ بجاره اللي في القاعة يجبره على الغش وحياءً وخجلاً منه يعينه على ذلك

أتذكر الترم الأول كان جنبي واحد ويقول ( ابيك تغششني ) ابتسمت في وجهه وقلت له بكل لطف ( المعذرة أنا ما أغش ) أنصدم أبو الشباب وظهرت على وجهه علامات التعجب
والأستحياء في نفس الوقت ، وما رد علي ، فقلت له _ ابي الطف الجو _ ( أن كانك تبيني أغششك تراك تبي تحمل المادة لأني ما ذاكرتها زين )
وكنت والله صادق ما ذاكرتها زين . بس الحمد لله ما حملتها أنا وما أدري عنه الله يستر عليه

والله أني لا أذكر هذه القصة بطلب المديح أو غير ذلك ولا أزكي نفسي على الله . قال تعالى ( ولا تزكوا أنفسكم ) فكلنا أصحاب أخطاء ( أسأل الله أن يعفوا عني وعنكم ) وكما قال النبي صلى الله عليه وسلم: (كل بني آدم خطاء، وخير الخطائين التوابون)
ولكن أذكر لكم الواقع اللي صاير في القاعات وكلكم سمعتم ورأيتم وش اللي يصير ، القاعة اللي في الرياض تقول كأنك في الحراج .

وبعضنا يطير في العجة أذا قاله أحد ( تكفى يالذيب - أفزع ياذيبان - ياشنب - نخيتك - أنا داخل على الله ثم عليك - وتقول أنت على خشمي أبشر ( وأنت المصيبة تدري أنه حرااام ) - يقول عليه الشحم ) وتروح السالفة هياط في هياط وكلها ذنوب تحملها معك يوم القيامة ( والله المستعان )

ولو أعتذرت منه بأدب وبأبتسامه كان انتهى الموضوع وسلمت على دينك

أنا ما أدري عن مجتمع ( حواء ) في القاعات وش ينتخون به . يمكن يفيدونا الأخوات .مع أني أتوقع أن الغش قليل عندهم :(269):

الموضوع ما يقبل القسمة على أثنين واذا كان البعض تبلد أحساسة من هالقضية فلا يعني بالضرورة أن الأمر عادي .

يمكن البعض يقول أني أضخم المشكلة ( راس مالها غش فقرتين والا ثلاث والا اربع ) ( لا تصعبها ، وش اللي صار في الدنيا )

والله لو تحمل المادة وتختبرها بدون غش أهو عليك من أنك تأخذنا بغير وجه حق

أنا أقول وأعوذ بالله من الأنا

يمكن يترتب عليها حرمانك من بركة المال ( راتبك ) اللي أخذته من هذه الشهادة

اذا جاء بعدين وتندمت وحبيت تصحح الخطأ وأنت لك سنوات مستفيد من هالشهادة اللي أخذتها بالغش
قلي بالله وش الخطوات اللي تبي تسويها حتى تتخلص من هالمشكلة
ترجع تذاكر و تختبر ثاني وتقول أطبعوا لي شهادة من جديد

( لا حل الأ أنك تنتهي عن سالفة الغش )

والله يعفو عنا وعنكم

العلماء والمشايخ لهم كلام طويل في تحريم الغش ( اللي ما أقتنع من كلامي )
يتفضل بزيارة أحد هذي المواقع

سماحة الشيخ العلامة / عبد العزيز بن عبد الله بن باز ( رحمه الله )
http://www.binbaz.org.sa/mat/9360
http://www.binbaz.org.sa/mat/370

الشيخ العلامة / محمد بن صالح العثيمين ( رحمه الله )
http://www.ibnothaimeen.com/all/khotab/article_532.shtml
http://www.ibnothaimeen.com/all/noor/article_8201.shtml

الشيخ العلامة / عبد الله بن عبد الرحمن بن جبرين ( رحمه الله )
http://ibn-jebreen.com/ftawa.php?view=vmasal&subid=11304&parent=786

الشيخ العلامة / عبد العزيز بن عبد الله ال الشيخ ( مفتي المملكة العربية السعودية ) ( حفظه الله )
http://www.mufti.af.org.sa/node/708

الشيخ العلامة / عبد الكريم بن عبد الله الخضير ( حفظه الله )
الفتوى في نهاية الصفحة
http://www.khudheir.com/audio/746

اسأل الله أن يوفقني وأياكم لكل خير وأن يجنبنا كل شر
أسأل الله أن لا يخيب أجتهادكم ومثابرتكم وحرصكم
أسأل الله أن تحصلوا أعلى المعدلات والدرجات في الدنيا والآخرة

والحمد لله الذي بنعمته تتم الصالحات

من أعجبة الموضوع وأراد نقله الى اي منتدى فله ذلك وليس بالضرورة ذكر المصدر
فالهدف هو تنبيه الناس بالمشكله

والله من وراء القصد