انا عندي مشكله تكفى حلها لي
انا اختبرت المستوى الاول في اول ماده ورسبت فيها
والمواد الباقيه من المستوى الاول ما اختبرتها لعذر الولاده وتم قبول عذري وقالوا ان اختبارها مع الاختبارات القادمه
الحين انا هل اسجل مواد المستوى الثاني واختار منها 8 مواد فقط
ومادة المستوى الاول اللي رسبت فيها
أو اسجل مواد المستوى الاول
وعليكم السلام ورحمة الله وبركاته ،،،
لاتنزعجين ..
ماعندك مشكلة وسهالات على رب العالمين ، قولي يارب ..
1- المادة اللي رسبتي فيها :
إن حبيتي تدرسينها هالفصل فالواجب عليك تسجلينها وتدفعين رسومها من جديد وتنزل لك على البلاك بورد ، يعني حالها حال المادة الجديدة .
وإن ماحبيتي تدرسينها هالفصل ممكن تأجلينها للترم الجاي او اللي بعده .
طيب إذا حبيتي تسجلينها وين تروحين ؟
تروحين لجدول المستوى اللي انتي رسبتي فيه ،مو المستوى الجديد ..
خليني اضرب لك مثال :
إنتي رسبتي في مادة الإحصاء في الترم الأول ..
ورحتي الحين مستوى2
بس تبين تسجلين هالمادة اللي انتي راسبة فيها ..
ماراح تلاقينها مع مواد المستوى الثاني ، مالك لوى ..
تروحين تدورينها في مواد مستوى 1 اللي انتي رسبتي فيه وتسجلينها عادي .
ــــــــــــــــــــــ
2- المواد اللي انتي غبتي عنها بعذر مقبول :
ماتدفعين لها رسوم ، ولا تسجلينها ، ولا تنزل لك على البلاك بورد ..
لأن وضع المواد اللي تغيب عنها الطالب بعذر مقبول يختلف عن وضع المواد اللي رسب فيها .
يتوجب عليك انك تذاكرين من المحاضرات السابقة اللي عندك تبع المواد هذي ، لأنها ماراح تنزل لك على البلاك بورد خلاص .
وتشوفين مواعيد امتحاناتها من جدول الإختبارات اللي منزلته الجامعة هالفصل ،
مو تكونين مخزنة مواعيد الإمتحان للفصل اللي راح اللي انتي غبتي فيه وتبنين جدول امتحاناتك عليه ، انتبهي من هالنقطة .
جدول امتحانات المواد اللي غبتي عنها تاخذينه حسب المواعيد الجديدة اللي في جدول الامتحانات للترم هذا .
ــــــــــــــــــــــــ
3- تسجيل المواد الجديدة
تسجلين مواد جديدة ، ولازم تسجلين اصلا مواد جديدة وتسددين رسومها لأن إذا ماسجلتي فالنظام يعتبرك منقطعة ..
والمنقطع يتم طوي قيده من الجامعة (يعني البعيد يُفصل من الجامعة)
اقترح عليك تسجلين 12 ساعة فقط ، هذا مجرد اقتراح
عشان انتي وراك 7 مواد راح تختبرينهم بالإضافة إلى مواد جديدة شوفي عاد كم يوصل مجموعهم !
وانتبهي وانتي تسجلين المواد الجديدة لازم تراعين إن مواعيد امتحانها ما تتعارض مع مواعيد امتحان المواد اللي تغيبتي عنها .
وإذا شفتي فيه تعارض ، تخلي عن المادة الجديدة ولاتسجلينها ..
لأن المادة اللي تغيبتي عنها هي اللي لها الأولوية .
الآن بقولها لك باختصار :
إن حبيتي تسجلين مادتك اللي رسبتي فيها هالفصل أو الفصل الجاي براحتك ، لكن وقت ما تسجلينها لازم تدفعين لها رسوم من جديد .
تختبرين موادك اللي تغيبتي عنها بدون ماتدفعين لها رسوم ،
وتسجلين مواد جديدة للفصل هذا وتدفعين عليها رسوم ،
يجب مراعاة عدم حدوث تعارض بين مواعيد الإختبارات النهائية للمواد المتغيب عنها والمواد الجديدة .
أتمنى اني أفدتك .
بالتوفيق للجميع ...
