ملتقى طلاب وطالبات جامعة الملك فيصل,جامعة الدمام - اقلبلو مني هذه الهديه يامستوي ثالث....

السلام عليكم ورحمة الله وبركاته
اخواتى واخواني المنظمين لنا فى الدراسات الاسلاميه حياكم الله فى اول مستوى تبدون فيه بمواد التخصص واللى هو من خلال تجربتي مستوى رائع ومفيد بكل مافيه من سهوله وصعوبه
فى هالمستوى عرفت الفرق بين العلم العام اللى درسناه فى المدارس وبين التخصص فى العلم فرق شاسع بين انك تتعلم قواعد عامه او تتعلمها بفروعها وتفصيلاتها بصراحه هنااااك فرق ويكفى احساسي انى هنا اصبحت طالبه جامعيه ابحث فى كتب اخرى لاصل للمعرفه واتعلم
فى هذا المتصفح ساقدم تعريف بسيط لمواد المستوى الثالث من خلال ماوضحته الجامعه فى خطه الكليه ومن خلال مادرسته

بأسم الله نبدأ

هنا الخطه الدراسيه لمناهج الدراسات الاسلاميه( نصيحه خليكم على نفس الخطه ماله داعي تسجلون من مستويات مختلفه لان بعض المناهج مرتبطه ببعض واسهل لكم بالنسبه لجدول الاختبارات مايكون فيه تعارض )
http://www.kfu.edu.sa/ar/Deans/elear...20الدراسات.pdf
هنا مواد مستوي ثالث
http://www.kfu.edu.sa/ar/Deans/elear...lamics_L03.pdf

هنا توصيف المقررات
http://www.kfu.edu.sa/ar/Deans/elear...0الإسلامية.pdf

بالنسبه لخبرتي في مواد مستوي ثالث فبتكلم بشكل عام عن المواد ودكتور كل ماده
1-تاريخ التشريع:(بديت فيه ابى ارمي همه اول شئ ههه )ومادراك ماتاريخ التشريع ماده جدا رائعه بمحتواها ومعلوماتها تتكلم عن التشريع ومراحله وهالجزيئيه جدا سهله ومافيها معلومات كثيره اشياء احنا نعرفها من اول وبتتعرفون عليها من خلال مواد اخرى فى نفس المستوي وفي اخر الماده بتتعرفون على الائمه الاربعه بنوع من التفصيل الممتع وهذا شئ جديد علينا خصوصا للى مايقرأ فى هالعلوم ,,,,دكتور الماده الديرشوي شرحه بسيط ماشد اهتمامى كثير لكن الله يجزاه خير ويعفو عني وعنه بدع فى وضع الاسئله واختصر المنهج فى الائمه فقط وباسلوب غير واضح فى الاسئله فاحرصوا على فهم كل شئ لان الاسئله كانت دقيقه جدا يعني ممكن يسأل كم رقم الصفحه اللى ذكرت فيها هالفقره (ههههه امزح)

2- النحو3 :ماده كمحتوى مافيها اى صعوبه وممتعه تحتوى على التركيبات اللغويه واختلاف المعاني وجزء نحوي عن احرف الجر والعطف ومعانيها ومحاضرتين سبق درسناها فى نحو1 ونحو2 اللى هي المعاجم والالف المقصوره والتاء المربوطه ,,,,دكتورها مايحتاج له تعريف جزاء المصاروه :sm5::sm5:المهم ركزو على الاسئله اللى بينزلها للمراجعه علشان تفهمون طريقة الاسئله ودائم احرصوا على فهم ابسط تفصيل موجود لاتتركون ولا تفصيله وحده ههههههه كله بيسأل عنه لانه يعم كل المنهج بالاسئله وهذا من النقاط الجيده للدكتور

3-فقه العبادات:ماده مثل شربة المويه البارده مريحه للنفس وتستمتع وانت تدرسها لانك تطبق كل ماتدرسه فيها على عباداتك تتكلم عن الطهاره والصلاه واقسامها من واجبه وسنه واحكام المريض والميت ,,, يبيلها تركيز بالمذاكره لان احكامها واقسامها كثيره ,,,دكتورها مايحضرني اسمه بس مايشرح يقرأ مباشره من الكتاب والماده واضحه مايبيلها شرح

4-اصول الفقه:اممممم احتار فى هالماده السهل الممتنع تتكلم عن الاحكام واختلاف الائمه في بعض الاحكام (كنى هونت رجعت اقرا المنهج احذفو الله يعافيكم السهل وخلو الممتنع):(269):يبيلها استعداد من الاول ومذاكره اول باول تفصيلاتها كثيره واللى ماعنده ملكة الحفظ الله يعينه,,,دكتور الديرشوى(غير الاول يمكن عيال عم)شرحه جيد بس هادي وياليت تسمعون المحاضرات وتسجلون نقاطكم

5-الاخلاق الاسلاميه واداب المهنه:ماده جدا سهله واحفظوها صم خلوها من المواد اللى ترفع المعدل فلا تستهينون فيها دكتورها ناسيه اسمه كويس بس كنه عصبي فى المباشر فاجبرو بخاطره وادخلو المباشر وكثرو الاسئله حتى لو فاهمين:oao:

6-علوم الحديث:ماده جديده علينا تختلف عن مادرسناه فى المدارس تتكلم عن انواع الحديث والرواه فيها تفاصيل كثيره وماده دسمه بمعلوماتها تحتاج للمذاكره من البدايه,,,دكتورها الشهري لله دره من استاذ والنعم فيه يشرح من قلب ويحببك فى الماده من شرحه سمعت كل المحاضرات مرتين قبل الاختبار علشان ترسخ المعلومات وخصوصا انه الكتاب او المحتوى فيه مفردات جديده علينا فهو يشرحها بكل سهوله ويوضح كل نقطه ويبين انه دكتور متمكن من مادته ويحبها كثيير

7-علوم القرآن:ماده مافيها صعوبه تتكلم عن القران وكيف تم كتابته وحفظه والمراحل التى مر بها حتى وصل لنا بهالشكل,,,دكتور القرعاوي الله يجزاه خير ماقصر بس كانت الصعوبه عدم وجود محتوى للماده والكتاب غير متوفر بالمكتبات بس فيه ملخص يكفى للماده وانصح بسماع محاضرته علشان تغطي المنهج براحه

8-التلاوه والتجويد2:منهج لم يسبق لنا دراسته فى المدارس سهل وممتع يبيله حفظ اكثر من الفهم ومن المواد اللى ترفع المعدل فلا تتساهل في مذاكرتها....دكتورها شرحه رائع ماشاء الله ويطبق فى كل محاضره بتلاوه من القرآن

9-الاتصالات والانترنت:من اسمها اعتقد سهله مافيه احد الان مايتعامل مع الانترنت مااقدر اعطيكم تصور عنها لانى ماسجلتها

اعذروني اذا اثقلت عليكم بس كنت سابقا اتمنى انى اجد احد يوجهني لكل مستوي واتمنى انى قدمت لكم لو شئ بسيط يريحكم ويوضح لكم اللى مقبلين عليه
اسأل الله ان يجعله علم نافع للجميع ولايحرمنا اجر تعلمه والعمل به
تمنياتي للجميع بالتوفيق واى استفسار الجميع من طلاب وطالبات القسم حاضرين

(طلب بسيط من اخواني واخواتي اللى خلصو مستوي رابع ياليت تقدمون لنا معلومات بسيطه عن المواد وتوجيهاتكم لنا مانستغني عنها,,,ودمتم سالمين معافين)