لكل المستجدات .. نبذة عن كلية الحاسب ..
 

[align=center]بسم الله الرحمن الرحيم

السلام عليكم و رحمة الله و بركاته ..

الهدف من هذا الموضوع .. الاجابة على العديد من استفسارات الخريجات ..

طبعا انا حبيت اكتب هذا الموضوع لاني عارفة انه اكثر المستجدات ما يلاقون ردود على اسئلتهم .. ولاني السنه الماضية كنت في نفس حالتكم .. فان شاء الله هالموضوع يفيدكم .. حتى لو اخذ من وقتي موب مشكلة اهم شي انها تعم الفائدة على جميع المستجدات الي حابين يدخلون قسم حاسب .. ويشرفونا السنه الجاية ..

اولا : شروط القبول في هذه الكلية وشروط التحويل اليها

- شروط القبول في كلية الحاسب للطالبات المستجدات خريجات نفس السنة :
نسبة الثانوية العامة لا تقل عن 95%
النسبة المركبة ( نسبة القدرات والتحصيل ) لا تقل عن 85%

* ملاحظة :
بالنسبة لخريجات السنوات الماضية نفس الشروط ولكن تكون الاولوية لخريجات نفس الدفعة ..

- شروط التحويل الى هذه الكلية :
- الدراسة لمدة فصلين دراسيين في الجامعة
- الحصول على درجة 500 في التوفل أو ما يعادله في الاختبارات الاخرى
- ان لا يقل المعدل التراكمي عن (2.75) من (5)
- الحصول على الرخصة الدولية لقيادة الحاسب الالي باللغة الانجليزية

ثانيا: بعطيكم نبذة عن اقسام كلية الحاسب ..

عدد سنوات الدراسة في هالكلية : 5 سنوات
..السنة تحضيرية .. طبعا ما تعتبر سنة اولى .. لانها تحضيرية
السنة الاولى والثانية .. دراسة عامة .. يعني مافي تخصص :119:
السنة الثالثة والرابعة .. تخصص

اقسام التخصص الموجودة في الكلية ..
- علوم الحاسب
- نظم المعلومات

اقسام تخصص مش موجودة بس في احتمال يفتحونها خلال السنة الجاية ..
- شبكات
- هندسة حاسب .

ثالثا : مواد السنة التحضيرية
( طبعا هذا المواد الي احنا درسناها هالسنة .. يمكن يصير تغير السنة الجاية .. الله اعلم )
- السمستر الاول ..
انجليزي
رياضيات
مهارات بحث علمي
تطبيقات الحاسب
مهارات الحاسب

- السمستر الثاني ..
انجليزي
رياضيات
فيزياء
تطبيقات الحاسب
التربية الصحية والبدنية
مهارات الاتصال و التعلم

ثالثا : طريقة الدراسة وساعات الدوام ..
( برضوا انا بكتب بناء على السنة الماضية مع احتمال التغير السنة الجاية .. والله اعلم )

- طريقة الدراسة ..
كل يوم محاضرتين انجليزي + محاضرة مادة ثانية
- محضرة الانجليزي الاولى (1) من الساعة 8 الى 10
- بريك من الساعة 10 الى 10.30
- محاضرة الانجليزي الثانية (2) من الساعة 10.30 الى 12
- بريك من الساعة 12 الى 1
- محاضرة لمادة ثانية من الساعة 1 الى 4

طبعا هذا موب يوميا .. بس هذه طريقة الدراسة ..

الدوام الي ممكن يتغير ..

- محاضرة المادة الثانية ..
ممكن تكون من الساعة ( 1 الى 3 ) او ( 1 الى 4 ) او ( 1 الى 5 ) او ( 2 الى 6 )
- يوم واحد في الاسبوع تكون محاضرة الانجليزي من الساعة ( 10.30 الى 12.30 )
- يوم واحد في الاسبوع ما في محاضرة لمادة ثانية فيكون نهاية الدوام الى الساعة 12

رابعا : الكتب المطلوبة ..

- كتب الانجليزي .. تتكفل الجامعة بتسليم كتب الانجليزي للطالبات ..
عدد الكتب : 13 كتاب + قاموس اكسفورد :s12: طبعا للسمسترين ..
- البحث العلمي .. لا يوجد كتب ..
- مهارات الحاسب .. كتاب واحد وبرضو الجامعة بتسلمه للطالبة .
- تطبيقات الحاسب .. نفس كتاب مهارات الحاسب
- الرياضيات .. كتاب اسمه college Algebra and Trigonometry
طبعا كتاب الرياضيات .. انتم رح تشترونه من مكتبة جرير .. بس طبعا احنا لما جينا بنشتري لقيناه انقرض .. فطلبنا كتب عن طريق الانترنت ..
- الفيزياء .. كتاب اسمه fundamentals of physics
برضو انتم رح تشترونه واذا مالقيتوه اطلبوه عن طريق الانترنت
- التربية البدنية والصحية .. مافي كتاب
- مهارات الاتصال والتعلم .. مافي كتاب
.. بس طبعا لاحد يشتري شي في العطلة لانه في احتمال يصير تغير السنه الجاية ..

* ملاحظة :
صحيح اننا اشترينا كتب .. لاكن في اكثر المواد .. الدكتورات ينزلوا ملازم ونوتات في الكوبي سنتر واحنا نصورها ونذاكر منها .. بس طبعا ما تغنينا عن الكتب ..

خامسا : الملابس و الممنوعات ..
- البلايز .. جميع الالوان مسموحة
- التنانير .. جميع الاوان مسموحة .. بس ما تكون قصيرة
( احنا هالسنة كتبوا البنات الي لابسين تنانير قصيرة تعهدات )
* ملاحظة :
اغلب السنة مافي تفتيش لدرجة انه في بنات يجوون بالبناطيل ولا احد يدري عنهم وكثير بنات يلبسون تنانير قصيرة .. بس طبعا اذا صار تفتيش .. العقاب تعهد :150:

سادسا : الجوالات
- معروف طبعا انه جوالات الكاميرا ممنوعة .. واذا مسكوا طالبة وعندها جوال كاميرا .. فان الجوال يصادر .. والبنت تكتب تعهد ولازم يجي ولي امرها عشان يستلم الجوال ويكتب تعهد .. وصارت هالسنة انهم صادروا جوالات بنات .. لكن .. للمعلومية وربي يشهد لو انهم فتشو بنات الجامعة بما فيهم كليتنا والله رح يفتحوا معرض جوالات كاميرا ونصها بلاك بيري :o3:
يعني بكل بساطة .. كل البنات يجيبوا جوالين .. في وقت التفتيش يطلعون الي بدون كاميرا

سابعا : الطعام ..
- كافتيريا .. تبيع شيبسات .. شوكلا .. ايس كريم ( ايام الصيف ) .. ساندويتشات .. عصيرات ..
بطاقات اعادة شحن الرصيد ( الي ب10 تصير ب 12 )
- جوفريز .. عصيرات .. ايس كريم ..ملك شيك .. الخ

ثامنا : اللوكرات ..
- طبعا نصيحة من مجربة .. انكم تروحون تاخذون اللوكرات وما تتاخرون .. لان اللوكرات تخلص بسرعة ومافي لوكرات كفاية لعدد الطالبات ..

- معلومات اضافية عن الجامعة :
- يتم تخريج البطاقة لجامعية للطالبات وبيعلمونكم الطريقة فلا تشيلون همها
- يتم اجراء اختبار تحديد المستوى في اللغة الانجليزية للطالبات لتحديد مستوى الطالبات ومن ثم يتم تقسيمهم بناء على المستوى ..
- تتم الدراسة في مبنى 65 مبنى طالبات الطب لطالبات السنة التحضيرية .. ولطالبة الحاسب سنة اولى تكون في مبنى المهيدب ..

** وهذه بعض من صور الجامعة **

[BIMG]http://dc08.arabsh.com/i/01687/9yjmzlcvh953.jpg[/BIMG]

[BIMG]http://arabsh.com/u0u70vqyve69.html[/BIMG]

[BIMG]http://dc04.arabsh.com/i/01687/rjsg3olg621v.jpg[/BIMG]



واخيرا .. الله يوفق الجميع و الي عندها اي سؤال احنا حاضرين وفي الخدمة :119: [/align]

رد: لكل المستجدات .. نبذة عن كلية الحاسب ..
 

ما شاء الله
كفيتي ووفيتي .. تقرير ولا أحلى

عندي كم سؤال بعد أذنك :

طلاب الدبلوم يقدرون يكملون دراسة البكالوريوس في الكلية ؟
الشي الثاني .. فيه مكافئات في الكلية او ؟

موفقة يارب
..

رد: لكل المستجدات .. نبذة عن كلية الحاسب ..
 

رد: لكل المستجدات .. نبذة عن كلية الحاسب ..
 

مشكووووووووووره حبييييبتي مااتقصرين
انا مره ودي بالحاسب لاني احبه
ونسبتي الحمدلله مره عاليه
بس خايفه من الوظايف بعدين
يعني مادري احس حرام نسبتي عاليه وادخل حاسب
بامكاني ادخل طب
بس مدري ما اميل له مره
مررررررررررررره محتاااره

رد: لكل المستجدات .. نبذة عن كلية الحاسب ..
 

جزاك الله خير كفيتي ووفيتي ما قصرتي
بس عندي كذا سؤال إذا ممكن :)

أنا تخرجت هالسنة ولله الحمد نسبتي حلوة ..
الفيزياء :( إنصدمت إنهم يعطون فيزياء انا إنسانة ما أطيق الفيزياء شلون كذا والله تحطمت !!!!
سؤالي : هل الفيزيا تكون بشكل مكثف ولا عناوين ؟؟ يعني للي مايحبها مثلي يقدر يعدي ؟؟

سؤال ثاني إن أمكن ، السنة التحضيرية هم يلي يتكفلون بتدريس الإنقلش لي ولا أنا يلي لازم أسجل ؟
و إن كنت ماخذه كورس قبل يحسبونة ولا ؟؟؟

ممم الحين المعدل التراكمي للقدرات و التحصيلي شلون 85% ؟؟
مافهمت لأن القدرات 30 و التحصيل 40 لو جمعناهم يجي 70 =؟
أو قصدك يحسبون النسب الثلاث مع بعض ؟؟

آخر سؤال و الله أدري مصختها بس لأن مالي أحد دارس بالكلية ذي =)
ممم إنتي وش تخصصك ؟ < لقافة خخخ
لا أقصد وش أحسن من وجهة نظرك من بين التخصصات الموجودة ؟!!

شكرا مره ربي يسعدك يارب و آسفة على الإطالة ..

رد: لكل المستجدات .. نبذة عن كلية الحاسب ..
 

بالنسبة للوظائف .. في وظائف واجد تقبل خريجات الحاسب .. مثل البنوك , المدارس , بالاضافة الى بعض الشركات ..
انا انصحك تدخلي التخصص الي انتي تحبينه بغض النظر عن نسبتك اذا كانت ممكن تدخلك تخصص يمكن يكون افضل في نظر الكثير من الناس .. لانه هذا مستقبلك وانت بتحديدين فين تكملينه في اي تخصص .. عارفة انه الموضوع محير .. انت فكري وا ستخيري ربك وان شاء الله ربك يختار الي فيه الخير .. والله يوفق الجميع :119:

رد: لكل المستجدات .. نبذة عن كلية الحاسب ..
 

محاضرة الفيزياء مرة وحدة بالسبوع و مدتها 3 ساعات ..
طبعا كل شي يعتمد على نفس الدكتورا الي بتدرسكم .. يعني ممكن تنزلكم ملازم تصورونها وتذاكرون منها وممكن تخليكم تذاكرون من الكتاب .. وغير كدا الدكتورا هي الي تحدد العلامات .. يعني تحدد كم درجة الاختبار النهائي وكم درجة الميد تيرم ... الخ
بس لو انت ذاكرتي المحاضرة اول باول ممكن تاخدين امتياز :119:
وبعدين لا قدر الله الي ترسب يسوون لها اختبار نهائي بديل و بس ^^
بالنسبة للانجليزي هو الي ممكن تقولين عنه مكثف والكلية تتكلف بتدرسيها لكل طالبات السنة التحضيرية .. يعني كل يوم من الساعة 8 الى 12 محاضرات انجليزي وطبعا في بريك نص ساعة الا يوم واحد الانجليزي من 10 الى 12.30 ... طبعا لو انتي ماخذة كورس ما يحسبونه .. الشي الوحيد الي يحسبونه اذا اختبرتي اختبار التوفل وتجاوزتيه من قبل .. تجيبين لهم شهادة التوفل ..
فيحسبونه لك .. وتصيرين ما تخذين انجليزي السمستر الاول .. بس السمستر الثاني تاخذين
بالنسبة للمعدل مثل ما قلتي يحسبون النسب الثلالثة مع بعض ( القدرات و التحصيل و الثانوية العامة )

انا حاسب خلصت السنه التحضيرية والسنه الجاي والي بعدها بتكون عامة يعني مافي تخصص اخر سنتين تتخصصين في احد الاقسام
- علوم الحاسب
- نظم المعلومات
- شبكات
- هندسة حاسب .

فلا تشيلين هم التخصص من الحين ..
بالتوفيق .. واي سؤال احنا حاضرين :119:

رد: لكل المستجدات .. نبذة عن كلية الحاسب ..
 

[align=center]
السلام عليكم ....


مشكووووووورهـ ياقلبي كفيتـي ووفيتي ...
من جد كنت محتاجـه هالموووضوووع ...

والله يعينك ع اسئلتـي ..

س1 / وووين مقر الكليه ( العنوان بالمختصر ) ؟؟؟
س2 / كم كانت نسبتك بالتحصيلي والقدرات ؟؟؟ ع المدرسه ( ثاني وثالث تطلع 98.49 ) >> تتوقعين يقبلوووني !!
س3 / لو بغيت احوول من كلية الحاسب بعد التحضيري إلى كلية التربيه ( يلزمني اشياء كثيرهـ ولا ) ؟؟؟
س4 / كيف حسيتي السنه التحضيري ( سهل . متوسط . صعب ) ؟؟؟ واهم شي اختبار تحديد المستوى سولفي عنه شووي !!!
س5 / في مقابله شخصيه . او طلبووا منكم سيره ذاتيه ؟؟؟

// .... شاكـرهـ لك حبيبتي ومقدرهـ تعبك $

ادري كثرت عليك بالاسئله ...
فديتـك .. مالنا غيركـ :love080:

::


[/align]

رد: لكل المستجدات .. نبذة عن كلية الحاسب ..
 

جامعة الدمام في الراكة

بالنسبة للنسبة .. تعتمد 30 % على القدرات و 40 % على التحصيل و 30 % على الثانوية العامة
فانتي ضمنتي 30 % للثانوية العامة .. بس باقي القدرات و التحصيل ,, اذا علامتك حلوة فيهم ان شاء الله يقبلونك

بالنسبة للتحويل .. ما عندي اي فكرة لانه اذا في شروط بتكون من كلية التربية وليس من كلية الحاسب .. وانا ما انصحك تحولين اذا قبلوك لانه كلية الحاسب من احسن الكليات و عدد البنات محدود فيها فلو قبلوك احسن استمري فيها ..
السنة التحضيرية من ناحية المواد .. ممكن تقولين سهلة الا مادة الفيزياء و الرياضيات السمستر الثاني مستواهم متوسط وليس صعب ..
من ناحية الدوام .. صعب نظام الدوام لانه من 8 الى 5 :000: .. لكن مع الايام بتتعودين و هي سنة و بتعدي ..
بالنسبة لاختبار تحديد المستوى .. اختبار انجليزي عادي .. تجي قطعتين و عليهم اسئلة بالاضافة الى اسئلة قرامر واسئلة تعتمد على معاني كلمات الانجليزي .. و طبعا كلها اختاري .. بالاضافة الى كتابة تعبير بيكون عن موضوع عام ..
يعني مثلا احنا هالسنة جابولنا نختار يا نكتب عن
- انسان مثال اعلى لنا
- فلم شاهدناه
وفي جزء استماع 3 قطع و عليها اسئلة و مثل ما قلتلك كله اختياري ..
اخر جزء يكون سبيكنغ .. بس طبعا مو نفس اليوم .. يسألونك كم سؤال و تجاوبين يعني مثلا
- يسألونك شنو سويتي في العطلة ؟ ...
بس هذا الاختبار ..
بعدين يقسمونكم على مستويات 5 .. بس لمعلوماتك ترا كل المستويات يدرسون نفس الكتب واسئلة الاختبارات موحدة الا المستوى 1 .. لانهم يعتبرون اضعف مستوى اسئلة اختباراتهم غير

- مافي مقابلة شخصية ولا طلبوا سيرة ذاتية ..
بالتوفيق :119:

رد: لكل المستجدات .. نبذة عن كلية الحاسب ..
 

طيب ممكن سؤال خخخ أدري نشبت بس تحمليني =)

إختبار تحديد المستوى ؟؟ متى يكون هذا أول ما أسجل و يقبلوني ولا وشو ؟
أو بعد ما أخلص السنة التحضيرية ؟؟
تحسين نفسك إستفدتي من الإنقلش يلي درسوك إيااه ؟ يعني صرتي متمكنة من اللغة ولا عادي =) ؟

الله يسعدك و يوفقك مره شكرا .

رد: لكل المستجدات .. نبذة عن كلية الحاسب ..
 

يعطيييييييك العااافيه

انا نسبتي حلوه في الثانوي والقدرات

لكن سؤالي انقبلتي على طول ولا بوااسطه ؟؟

رد: لكل المستجدات .. نبذة عن كلية الحاسب ..
 

اختبار تحديد المستوى يكون في اول اسبوع تفتح الكلية ..
والله استفدت بس ممكن اقلك يعتمد اكثر على جهدك الخاص .. بس طبعا السبيكنغ عندهم ميح يعني موب مركزين عليه ابد ^^

رد: لكل المستجدات .. نبذة عن كلية الحاسب ..
 

لا الحمدلله انقبلت على طول بدون واسطة :119:

رد: لكل المستجدات .. نبذة عن كلية الحاسب ..
 

السلام عليكم

بغيت اسالك اختي انا نسبتي الثانوية 93 في امل انقبل

وشكرا مقدما

رد: لكل المستجدات .. نبذة عن كلية الحاسب ..
 

و عليكم السلام ..

اكيد في امل .. بس يعتمد على القدرات و التحصيل

و بما انه نسبتك 93 يعني تصير 27,9 من 30 الثانوية العامة يعني نسبة حلوة

موفقة ^^

رد: لكل المستجدات .. نبذة عن كلية الحاسب ..
 

رد: لكل المستجدات .. نبذة عن كلية الحاسب ..
 

السـلآم عليـكم ..

جزآآآآك الله ألف خير على هالموضوع .. مآقصرتـي والله :)

أنا رشحوني للقبول .. في كلية علوم الحاسب بالدمام .. الحمـدلله :love080:

بس عندي سؤال ..

إختبار تحديد مستوى اللغه .. يعتمد عليه القبول والا لا ؟ .. يعنـي وش الفآيدهـ منه =)

ياليت توضحيـن لي

..

يعطيك العــــآفيه يـآلغـلآ :119:

رد: لكل المستجدات .. نبذة عن كلية الحاسب ..
 

[align=center]
يعطيـــــــك العـآفييه كفيتي ووفيتي بصصـرآحه
مـرآ رآئع التقرير وكل ششي حلووو = )
الله يجعله في ميزآن حسسناتك
والله يووفقك ويسسعدك يـآرب . .:love080::love080:

انا رششحوني للقبول عندكم ووالحمدلله داخله للقسسم عن رغبه مع ان الكل يقولي طب و و و
بس انا حطيت الرغبه الأولى لي حـآسسب ^_^

الحـين بسألكـ عن اختبار تحديد المسستوى وش طبيعته صعب و لآ سسهل ؟!
يعني اللي مو ذآك الزود فيه يقدر يمشي؟!
والمستويات في الأنجلش تستمر طول السنه ولا بس بالبدايه ؟!؟

طيب انا ابي الحين بعد مانقبلت اطور نفسسي شوي قبل ماادخل الجامعه
كيف اقدر اطور نفسي خلال هالشهرين؟!

اممممم وش بعد الحين يعني الدوام مرا متعب هذا بس في السنه التحضيريه ولا بعد كل السسنوات:000: ؟!

اممم انا خآيفه كثير من الأنجلش همي الوحيد هووو = (


وبسسس يعطيك العـآفيه مآقصصرتي مووفقه يالغلاا :g8:
[/align]

رد: لكل المستجدات .. نبذة عن كلية الحاسب ..
 

بالاذن من اخت فوفا انا بجاوب :119:

الصراحة اختي الأمل بالله موجود بكل وقت والي الله كاتبه بصير

انتي ادعي ربك والله أعلم بالخير لك وين

اذا ما حصل لك معناها مو خير لك ^^

رد: لكل المستجدات .. نبذة عن كلية الحاسب ..
 

وعليكم السلام والرحمة

مسموح لي اجاوب؟ :hahahahahah:

اختبار تحديد المستوى ماله دخل بالقبول .. اساساً بكون خلال الأسبوع الأول من الدراسة

كل الموضوع انو بكون له دخل بتقسيم جروبات الانجلش .. احنا كنا 5 ليفيلز

5 اعلى ليفيل و 1 اقل ليفيل

مع ان المناهج الي تدرس نفسها بس يختلف

يعني احنا حسينا بهالاختلاف لما دمجوا كل الليفلات مع بعض ع نهاية السنة

صراحة احنا الي كنا ليفيل 5 حسينا انو نضيع وقت كثير مو مثل قبل

عموماً .. ماتفرق بالقبول ولا شي .. وحتى لو انحطيتي ليفيل وماتطورتي ولا جبتي A ممكن ينزلوك لليفيل اقل .. او تكوني مثلا ليفيل 4 وتجيبي A+ تروحي ليفيل 5 على بداية الترم الثاني =)

احنا على بداية الترم الثاني نص البنات نزلوا ليفيلات اقل .. والي كانوا ليفيل 4 بجدهم صاروا معنا ليفيل 5

<------- كأن طولت السوالف خخخخ

اتمنى افدتك ^^

رد: لكل المستجدات .. نبذة عن كلية الحاسب ..
 

الله يعطيها العافية فوفا رجعت لي ذكريات بهالتقرير خخخخ

انا بعد الكل قال لي طب وحرام التعب والنسبة ومدري ايش بس ماسمعت لاحد

والحمد لله ما ندمت ولا حتى 1% على اختياري .. اهم شي الشغف والحب للكلية والتخصص عشان الابداع ^^

اختبار تحديد المستوى مااذكره بالضبط بس يعني فيه اسئلة سهلة متوسطة صعبه .. يعني تشمل جميع المستويات حسب رأيي .. الاختبار ما فيه رسوب .. ماحليتي اوك أبد بتكوني ليفيل 1 ببساطة :119:

تستمر الليفيلات تقريباً ترم كامل .. بعدها حسب أدائك في الفاينل يتم التوزيع يعني A ليفيل 5 .. B ليفيل 4 .. وهكذا

عدا ليفيل 1 هذول عالم خاص لحالهم .. وغير كذه على اخر شهر شهرين يصير الكل مع بعض لان بتكون الدراسة توفل وترمونولوجي <--- وبالنسبة لي هالشي غلط

كيف تقدري تطوري نفسك؟ .. في عدة أمور تطوري منها نفسك

اول شي اختي انتي شو نقاط قوتك بالانجلش وضعفك؟ يعني ريدينق لسننق رايتنق قرامر

وهل تبي تطوري نفسك بنفسك أو معاهد؟ مشان اقدر افيدك ^^


على حسب كلام عميدة الكلية انو بس السنة التحضيرية متعب وصدقوني مع الوقت تتعودوا .. ولو يوم رجعتوا 3 بتحسوا الوقت طويل ومو راضي يخلص :hahahahahah:

ان شاء الله الي بعد التحضيرية يكون الدوام الى 2 او 2 ونص

بهالحدود


لاتشيلي هم شي أختي ..

واي استفسارات ثانية احنا موجودين :119:

رد: لكل المستجدات .. نبذة عن كلية الحاسب ..
 

الله يعطيها العافية قلب انثى ردت على استفساراتكم
بس الي حابة اضيفه بالنسبة لك يا ديما اذا حابة تطوري نفسك عن طريق معاهد في معاهد واجد تدريسهم حلو
مثل معهد العالمية ..
واذا حابة تطوري نفسك عن طريق الانترنت في مواقع كثير ممكن تفيدك ..

هذا للسننق ..

http://www.esl-lab.com/

هذا الموقع بعد مره مفيد ..

http://www.english4arab.net/

ومبرووووووووك للكل المقبولين .. بالتوفيق ^^

رد: لكل المستجدات .. نبذة عن كلية الحاسب ..
 

يعطيكم آلعآآفيه ,,

ربي يعينآآ بس @@

رد: لكل المستجدات .. نبذة عن كلية الحاسب ..
 

ههههه لا عآدي قلبو :)

آهـآ الحين فهمت .. آحس نفس نظآم آرآمكـو ..

طيب بصرآحه آستفدتـوآ منهم من ناحية الللغه بـ السنه التحضيريه .. والا لازم ادخل معآهد الحين :) لإنـي ( مش ولآ بد بالانجلش :P ) :mh35: ؟

معليه ثقلت عليكـم :)

الله يوفقـك مآقصرتـي والله :) .. :love080:

رد: لكل المستجدات .. نبذة عن كلية الحاسب ..
 

يعني بصراحة استفدنا بس ما اقلك تعتمدين عليها .. احسن شي تطورين نفسك بنفسك ..
لانهم عندهم السبيكنق ميح موب مركزين عليه ابد .. انا انصحك اقل شي لو ما بتدخلين معهد هالاجازة حاولي تطورين لغتك عن طريق الانترنت .. حاولي تحفظين كلمات ...
غير كدا ترا رح تتعبين واجد اذا ما حسنتي لغتك و استغليتي هالاجازة خصوصا السمستر الثاني لانه الفيزياء بالانجليزي .. يضيع الوقت في الترجمة ..
الله يوفقك .. ولا ثقلتي علينا ولا شي .. الناس للناس و الكل بالله :119:

رد: لكل المستجدات .. نبذة عن كلية الحاسب ..
 

انا احس استفدت كثيييييييير

المس الي كانت تدرسنا كانت تعطينا اشياء خارجية مرة حلوة وممتعه واسلوبها حلو

وحتى لما تتكلمين تصحح لك النطق والجرامر وكل شي .. رح توحشني كثيييييييييييير :(

وكانت دايم تقول لا تظنوا انتوا ليفل 5 واحسن من الكل يعني تعرفون كل شي .. كانت تجيب لنا مقالات علمية وكتب علمية نقرأهم ونناقشهم .. تخلينا نكتب بوقت معين عن اي امور تخيليه ولازم نكتب لحد ماتقول ستوب وتختار عشوائي بنت تقرأ الي كتبته والكل يصحح لها

يعني كنا نسوي امور كثيييييييييرة برى المنهج .. لان المنهج بصراحة سخيف ع الاخر ولو عليه ماتطورنا ابد =)


انا تكلمت عن الليفل حقي ويختلف من تيتشر لثانية ومن ليفل لثاني .. يعني هي كانت تقول حرام اعطيكم طول الوقت امور انتوا اولريدي تعرفوها

وبس

رد: لكل المستجدات .. نبذة عن كلية الحاسب ..
 

أمول <--- اسمك على اسمي

انتي قولي لي في شنو ضعيفة في الانجلش اكثر شي وشنو اقوى شي عندك وانا بساعدك بشنو تسوي

^^

رد: لكل المستجدات .. نبذة عن كلية الحاسب ..
 

رد: لكل المستجدات .. نبذة عن كلية الحاسب ..
 

فوفآ ..

إي والله شكـلي ببدآ آحفظ كلمآت والله يعيـن .. ويعطيك العافيه على الموقع اللي حطيتيه مرهـ حبيته :)

مآقصرتـي يآقلبو .. الله يوفقك وييسر لك أموورك :love080:

~~~


قلب آنثى .. سميـتـي :love080: :mh35:

طريقة تدريس أبلتكم مررهـ آعجبتني :)

والله بالنسبة لي اضعف شي عندي بالانجلش القرامر وتكوين الجمـل :(

وأقوى شي .. تقريبآ الفوكاب .. يعني اعرف معآني كلمآت .. بس مو كثير بعد بس آمشي حالي هع .. بس مشكلتي ما اعرف شلون احطها بالجمله :000:

...

مـــآقصرتــي يآقلبوو :love080:

رد: لكل المستجدات .. نبذة عن كلية الحاسب ..
 

طيب انا بقول لكم وش كنت اسوي ايام ماكان عمري 7 و 8

خخخ انا هوايتي اتعلم لغات من صغري واعلم نفسي بنفسي

أول شي وأهم شي .. مشاهدة افلام او برامج باللغة الانجليزية تبدأوا مترجمة وبعدها بدون ترجمة

أفضل شي للتعلم بالنسبة لي أفلام الكارتون والبرامج التعليمية للاطفال <--- تتعود اذنكم تسمع لغة انجليزية سهلة مبسطة + الجرامر صحيح والكلمات المستخدمة كلمات فصحى مو سوقية

بعدها للأفلام والمسلسلات والبرامج الوثائقية

انا لما كنت صغيرة اجلس مقابل التلفزيون وبيدي دفتر و ورقة واكتب الكلمة الي اسمعها مع الكلمة المترجمة <-- الاثنين بالعربي وبعدين اشوف السبيلنق بالمترجم الالكتروني خخخ بس خلاص حركات قديمة هذي

اذا تعودتوا ع الليسننق بيسهل تركيب الجمل + الجرامر

نجي للجرامر .. في كتاب لونه اسود للمؤلفة بيتي أزار .. المس مرة مدحته لنا وقالت فيه كل قاعدات الانجلش وأسلوبه سهل ومبسط وعليه تمارين .. الكتاب عندي بس لسه ما فتحته خخخ

الفوكاب .. من الليسننق والريدينق بتتعلموا نيو فوكابز بس في اشياء انصح فيها مثل موقع language guide أو ديكشنري اكسفورد المصور .. يعني كل يوم ركزوا على كلمات شي معين مثل اعضاء جسم الانسان: الترجمة المعنى النطق والسبيلنق للكلمة وخلوا لكم دفتر تكتبوا فيه كل شي

الرايتنق يعتمد على كل المهارات الي فوق .. تعرفي جرامر وعندك فوكابز رح تكتبي اجمل مقالات + معرفة متى استخدام النقطة الفاصلة السيمي كولون ....الخ

السبيكنق تكلمي بأي مكان .. سافري لبلد اجنبي سجلي بمعهد .. وان مالقيتي كلمي نفسك بالانجلش <-- مثلي خخخ


وبالنسبة للمعاهد أنا ارشح البريتش كانسل .. ماجربته بس الكل يمدح فيه وشهادته عالمية .. كنت ناوية قبل الجامعة اروح محادثات مشان اكون اكثر جرأة بالتحدث بس كان مسكر بالصيف ينقلون لأبراج الراشد


دمدم توصلي بالسلامة يا رب وهالله هالله بالهدايا :p

واي ملاحظة او استفسار احنا موجودين

رد: لكل المستجدات .. نبذة عن كلية الحاسب ..
 

^^^

حـــلوو والله .. إن شاء الله ببدآ من جد .. :)

طيب سؤال وين معهد البرتش ؟ وهل هو مفتوح حـآليآ ..؟

..

ويعطيـك العآإفيـه ,’

رد: لكل المستجدات .. نبذة عن كلية الحاسب ..
 

الخبر - ابراج الراشد

مفتوح طوال العام بس مدري متى فترات التسجيل والاختبار

روحي وشوفي وخبريني خخخ

افكر اروح محادثات لانو اذا ظليت بدون مااسولف سوالف طويلة بالانجلش في الاجازة .. احس بفقد عنصر الثقة


بالتوفيق

رد: لكل المستجدات .. نبذة عن كلية الحاسب ..
 

http://www.britishcouncil.org/ar/me-...es-details.htm

فيه مواعيد التسجيل .. الجاي بكون على نهاية شعبان

يعني الدورة برمضان

تقدري تتصلي على فرع الخبر تتأكدي من المعلومات وتستفسري عن كيفية الدوام برمضان

اوقات الدوام الحالية ----> النساء: من 8:30 ص الى 14:30

بالتوفيق

رد: لكل المستجدات .. نبذة عن كلية الحاسب ..
 

والله موقعهم مرتب ..

ان شاء الله بدق عليهم بكرا واشوف اوقاتهم في رمضان واعطيكم خبر طبعـآآ :)

مع ان احس صعبه شوي برمضـآن .. بس خلآص مابقى وووقت :000:

::

مآقصرتي يالغـلآ ,

رد: لكل المستجدات .. نبذة عن كلية الحاسب ..
 

ما عملنا الا الواجب ^^

رد: لكل المستجدات .. نبذة عن كلية الحاسب ..
 

طيب بداية الدوام من متى ؟

7 ونص ؟؟

<< فجأأه السؤال خخخ

وسؤال ثآني .. عن البلايز .. لازم كم طويل ؟

:)

رد: لكل المستجدات .. نبذة عن كلية الحاسب ..
 

الدوام يبدأ من 8

عدا السبت ايام 9 ونص وأيام 10


البلايز يعني اكثر من ربع كم بشوي

احنا كنا نخالف وماعلينا من حد :p

مبنانا مافيه مراقبات ولا شي .. بس في احيانا يصيدون بنات بمباني ثانية او رايحين للكافتيريا

فالالتزام بالنظام افضل أحسن من كتابة تعهد على شي مايسوى

رد: لكل المستجدات .. نبذة عن كلية الحاسب ..
 

^^^

أهـآآ حلووو =)

...

طيب انتي رديتي على موضوع في قسم التصاميم .. وقلتي كل القسمين التصميم والحاسب حلوين وانك تشوفين شغلك ..


يعني :

بالتصميم اشوف شغلي بالرسم والتصميم

والحـآسب مثل أيش مثـلآ ؟؟

(( لأني من جد محتارة :(:( ))

..

وصح مبرووووووك ع اللون البينك :)

رد: لكل المستجدات .. نبذة عن كلية الحاسب ..
 

الله يبارك فيك

صرت بنوتية :hahahahahah:

التصاميم: تشوفين شغلك بالفوتوشوب .. مجسمات .. رسم .. مشاريع مثل تصميم منتجع أو شي

الحاسب: رح تتعاملين مع البرامج المشهورة "هذا في التحضيرية" نظم التشغيل مثل ويندوز .. وورد .. اكسل .. اكسس .. spss .. فوتوشوب .. html .. فرونت بيج <--- طبعا يختلف عن الي اخذناهم بالمدرسة :119:

كل برنامج تخلصينه لازم يكون معه اختبار نظري "على ورق" + مشروع

يعني قاعده بيانات كاملة " لمستشفى ، بنك ، مركز " .. تسوين بحث وتحللينه ببرنامج spss .. الفوتوشوب معروف شنو تطبيقه ^^ .. آخر شي عملناه كان عمل موقع متكامل عن اي شي ويكون كل شي من شغلك حتى الخلفيات وهالامور .. وكان شي حلو انو تشوفي الخربشات الي عملتيها والامور تحولت لموقع مثل الصحيح :cheese:

مستقبلاً .. راح نشتغل على برامج اعقد وامور أعمق .. ولما اتخصص كمبيوتر ساينس ان شاء الله .. احنا بنفسنا رح نصمم البرامج ونخترع برامج جديدة

يعني شغلِك كله تشوفيه قدام عينِك متجسد ومتكامل


اتمنى تكون وصلت الفكرة ^^

رد: لكل المستجدات .. نبذة عن كلية الحاسب ..
 

أهــآآآآ هيـك يعنــي .. والله حلـوو ..

مـآآآآقصرتـي والله .. جزاك الله ألف خير !

لأني زي ماقلت لك اقبلوني الحين تصميم .. فـ محتارة ابي اقرر قبل لا يروح ابوي للجامعه :(

أحس كلهم حلوين :( .. بس اللي كاتبه ربي بيصير :)

::

دمتـي متميزهـ (f)

رد: لكل المستجدات .. نبذة عن كلية الحاسب ..
 

استخيري ^^

والله يقدم لِك الي فيه الخير

واذا تبي معلومات عن القسمين أو الكليتين مشان تقارني او تشوفي انتي تميلي لأيش اكثر ممكن ادور لِك ..

دمتِ بخير ..~

رد: لكل المستجدات .. نبذة عن كلية الحاسب ..
 

يـآليت والله :(

تسوين فيني خير .. لأن مالقيت أي شي عن كلية التصاميم

إلا بنت ماقصرت اليوم وكلمتني عنها وقالت فيه قسمين مفتوحين يا تصميم داخلي او جرافيك

وحسيت ان الجرافيك حلـو .. ^^

رد: لكل المستجدات .. نبذة عن كلية الحاسب ..
 

الكليه هآآذي بس يدخلهآ الأدبي ولآ بس علمي
وهل فيه ممكن كليآآت حآآسب لللآدبي بنآآت

رد: لكل المستجدات .. نبذة عن كلية الحاسب ..
 

خلاص اختي أمول

رح ارسل لك ع الخاص كل المعلومات .. لأنو كثيرة وبنفس الوقت مالها اتصال مباشر بهالقسم

ان شاء الله مااتأخر كثير ^^

رد: لكل المستجدات .. نبذة عن كلية الحاسب ..
 

الكلية للعلمي بس

اعتقد كليات الحاسب "التابعه لجامعتنا" للأدبي كليات المجتمع

عندِك دائما خيار الجامعات الاهلية "مايدققون كثير"


بالتوفيق ..~

رد: لكل المستجدات .. نبذة عن كلية الحاسب ..
 

أووكـي آختي قلب أنثى ..

جزآك الله ألف خيـر ..

بإنتظآرك يالغـلآ ..

:
:

رد: لكل المستجدات .. نبذة عن كلية الحاسب ..
 

وصلت الرسـآله ..

مـآقصرتي والله يجعله بميزان حسنآتك يارب ..

(( للأسف ما اقدر أرسل رساله إلا لما تصير مشاركاتي فوق الـ 100 :p ))

..

مشكـوره مرهـ ثآنيه (f)

رد: لكل المستجدات .. نبذة عن كلية الحاسب ..
 

رد: لكل المستجدات .. نبذة عن كلية الحاسب ..
 

ما عملنا الا الواجب

اهم شي أفدتِك أختي ^^

بكرآ أحلى <---- مررة عآجبني نك نيمك :p

العفو وتسلمي لي ع الوردة :$

رد: لكل المستجدات .. نبذة عن كلية الحاسب ..
 

السـلآم عليكـم ..

..

عندي سؤال خطر على بالي :$ بس احتاج لإجابته


1- وش الصعوبات اللي واجهتكم في الدراسه .. ؟

2- هل تأثرت حياتكم الاجتماعيه ؟ << :( ... أدري تختلف طبيعه الدراسه بين طالبه وأخرى .. بس كـكـل يعني :d



..

كل الشكر

رد: لكل المستجدات .. نبذة عن كلية الحاسب ..
 

أأأي صح < ياكثر هرجي

لو بندرس الفوتوشوب .. ندرس بعد تصاميم .. والا دراسه عامة .. :d

رد: لكل المستجدات .. نبذة عن كلية الحاسب ..
 

وعليكم السلام والرحمة

صباح الخيرات والليرات ^^

انا بجاوب من تجربتي الشخصية ويختلف من وحدة لوحدة :c8:

بالنسبة للصعوبات انا ماوجهتني أي صعوبات غير شي واحد: طول الدوام المهلك جداً .. بس مع الأيام تتعودين عليه ويصير عادي وترجعي تذاكري وتشبكي نت وتنامي 10 او 11 وكل شي تمام <--- مشكلتنا كانت كل ماتعودتنا طقونا اجازة ام اسبوع او شي ونرجع لموال التأقلم من جديد :cheese:


بالنسبة للحياة الاجتماعية اممم تأثرت صراحة .. يعني ماصرت أجلس مع اهلي أو أطلع أيام الأسبوع .. واذا عندي اختبار بعد انشغل الخميس وهيك .. بس بشكل عام مش تأثر كثير .. يعني مو لدرجة أنو اختفيت من ع وجه الكرة الأرضية :cheese:

رد: لكل المستجدات .. نبذة عن كلية الحاسب ..
 

ان شاء الله رح تدرسون الفوتوشوب بس مش بشكل متعمق "خفايف يعني" لأنو احنا مالنا خص بالتصميم وهيك بس يعني كتعرف عام ع البرنامج كونه برنامج حاسوبي .. أخذناه ككورس تقريباً شهر "4 محاضرات" وماكان فيه فاينل .. مجرد تطبيق بعد الدرس وعليه درجات .. مش مثل بنات الديزاين

:119:

رد: لكل المستجدات .. نبذة عن كلية الحاسب ..
 

هذا اللي كنت ابيييييييه وش ندرسس

نسسيت ااقوول السلام :no2:
السلآم عليكم :cheese:
اخبارك يـآحلوه ؟!
بدخل على طوول ههههه
انا متووولعه جدآ بالحـآسسب
يعني بالضضبط ابي اعرف شنوو درستوا بالتحضيري ؟!

اممممممممم وتكلمي اكثر يعني هل بتكون لنا انجازات بالتحضيري وكذا ؟!
تكلمي عن التحضيري بشكل موسع <<<احس غثيتك :t1:
وانا قريت ان سنتين بعد التحضيري مو تخصص بالضبط يعني وش ندرس فيها مواد عامه عن الحاسب ولا فيه مواد برا الحاسب؟!

بعد سؤال <<<< برآآآآ :cheese::cheese::cheese:

الحين اللبس هناك مسموح كل شي والعباه كتف ولا رآس ؟!
عشان بتقضى للجامعه :cheese:

يعطيك العافيه يالغلاا جد لم اقرا ردودك كل مالي احب التخصص اكثر واكثر :love080:
& فمآن الله :love080:

رد: لكل المستجدات .. نبذة عن كلية الحاسب ..
 

وعليكم السلام .. هههههه يعجبني الحماس :hahahahahah:

بالنسبة للسنتين العامتين بكون "IT" بس كمواد بالضبط والله ماعندي فكرة .. تعرفي لسه الكلية بقراطيسها فما عندنا معلومات كافية ..

بالنسبة للبس .. مسموح عبايات راس كتف بدون عباية <-- امزح

بس كثير يطلعوا بدون حجاب :hahahahahah:


بالنسبة للسؤال عن التحضيري راجعة لِك

ولا غثيتيني ولا شي :cheese:

رد: لكل المستجدات .. نبذة عن كلية الحاسب ..
 

بتكلم عن مواد الفصل الدراسي الأول

كانوا 5 مواد كالتالي:

1- لغة انجليزية: دوامها صبآحي من 8 الى 12 "مع بريك" ماعدا السبت من 9 ونص أو 10 الى 12 ونص .. رح تدرسوا كل المهارات "استماع محادثة قاعدات ...الخ"

2- رياضيات: محاضرة وحدة بالأسبوع من 1 الى 4 أو من 2 الى 5 .. حسب تفرغ الدكتورة أغلب المنهج كان اشياء اخذناها بالسابق بس صارت بالإنجلش ( العدد المركب مجموعات الاعداد معادلات رسم ) هالأمور

3- تطبيقات حاسب آلي:محاضرة بالأسبوع "4 ساعات" أخذنا امممم آوت لوك .. الانترنت .. الآكسس + عملنا مشروع ببرنامج الآكسس <--- ماادري اخذنا شي بعد او لا نسيت :hahahahahah:

4- مهارات حاسب آلي: محاضرة بالأسبوع "4 ساعات" يا ثقل هالمادة ثقلاه :hahahahahah: .. خاصة بالبداية .. كلام دج .. بالضبط مثل المنهج النظري بتاع ثانوي بس بالانجلش .. بعدها اخذنا الويندوز "نظم التشغيل" وورد .. اكسل .. فوتوشوب اممم هذا الي اذكره حالياً

5- البحث العلمي:محاضرة بالأسبوع "ساعتين" مادة العقدة كانت :000: .. يعلمونكم اسس البحث العلمي كيف تسوونه وهالامور .. وطبعا مطلوب منكم بحث متكامل ع نهاية السنة <--- اشتغلوا فيه من بدري تراه حوسة :bawling:


برررب + رآجعة مع الترم الثاني

رد: لكل المستجدات .. نبذة عن كلية الحاسب ..
 

بآكو مع الفصل الدراسي الثاني :cheese:

عدد المواد: 6

1- الانجلش مثل الفصل الدراسي الأول بس اخر شهر او شهرين تقريباً صرنا ندرس توفل + ترمونولوجي "مصطلحات التخصص = يعني مصطلحات الحاسب والتقنية وهالأمور" :cheese:

2- رياضيات (2) : عدد الساعات مثل الترم الأول .. اممم اخذنا القطوع النهايات التفاضل والتكامل الدوال المثلثية والمصفوفات .. وحاجات كثير جديدة مااخذناها من قبل

3- فيزياء: مافي شي بالدنيا مااخذناه :cheese:

4- مهارات الاتصال والتعلم: مادة مش اساسية بالعربي .. ساعتين بالأسبوع شي كذه جاي مثل علم النفس :cheese: ..

5- تربية بدنية وصحية: رياضة + أحياء + تدبير :hahahahahah: <------ هيك حسيته .. ساعتين بالأسبوع .. ساعة صحية وساعة بدنية .. المادة بالعربي

6- تطبيقات حاسب (2) : محاضرتين بالأسبوع .. كل محاضرة ساعتين .. اخذنا spss "برنامج تحليل بيانات البحوث" .. html "الاكواد الي منها تتسوى مواقع الانترنت" .. برنامج front page" اسهل برنامج يستخدم لتصميم مواقع الانترنت .. وع نهاية الترم قدمنا مشروع موقع متكامل من صنع ايديا وحياة عينيا :cheese:


هذا الي ببالي حالياً

واي استفسار انا حاضرة ^^

رد: لكل المستجدات .. نبذة عن كلية الحاسب ..
 

جد جد ششكرآآآ

حلوووووو مرا
اكثر شي تحمست له المهارات والتطبيقات للحاسب والإنجلش بس لأن ابي اتعلم انجلش واتكلم بطلآقه لأن ماعندي لغه كثير
والرياضيات مرا حلوو شكله يمكن لأني احبه ههههههههههههه

طيب اذا ماعندنا انجلش بنمشي فيهم و لا لأ .؟
طيب انتي استفدتي من الأنجلش وكعموم تشوفين البنات تحسنوا بالإنجلش ؟

طيب هناك بالكولج نلبس تنوره اي لون وبلايز اي لون ؟

وامممم والبطاقه الجامعية كم يبي لنا عشان تصير عندنا << مستعجله :cheese:

وبسسس
ثـآنكسس الووووت :love080::love080::love080:

رد: لكل المستجدات .. نبذة عن كلية الحاسب ..
 

امممم بصرآحة مدري


انتي حاولي تقوي نفسِك بالانجلش .. كل شي سهالات حبيبتي

انا احس استفدت من ناحية الجرأة بالكلام أكثر شي والتعامل بالانجلش .. واستفدت من الامور الخارج من المنهج أكثر شي .. بس ليفل 5 واعتقد بعد 4 التيتشر كانت تعطينا امور اضافية "حسب علمي" ..


بالنسبة للبس مسموح اي لون بس تكون التنورة طويلة .. والبلايز اول شي مش فتحة واسعة "عن الفضايح خخ" و اكثر من ربع كم بشويات <------ القوانين المنصوصة خخخ

رد: لكل المستجدات .. نبذة عن كلية الحاسب ..
 

توني أنتبه للبطاقة الجامعية :$

سوري ..

والله مااذكر متى عطونا .. بس وجودها مثل عدمه

بس اول ماعطونا عملوا حالهم ويطلبوا يشوفوها <-- مرة مدري مرتين وخلص

بس نوديها احتياطاً

هم اول مايخلصوا من بطاقات كلية معينة يعلنوا ^^

رد: لكل المستجدات .. نبذة عن كلية الحاسب ..
 

قلب انثى ، fofa

مرررررررررررررررره شكررررررن على كل شي كتبتووه :love080:

استفدت كثير وخفت اكثر << :D

ان شاء الله اذا ربي كتب ويرقون رغبتي للحاسب لانه اقرب شي لنسبتي :rolleyes:

بس المشكله مااحب الحآآآسب :011: وخايفه هالشي يأثررعلي بدراسته خصوصا انه مو سهل بأيش تنصحووني :011:

وووو بالنسبه للـ IT اسمع عنه بس ايش هووو


الله يعطيكم الف الف عاافيه ويجعلها موازين حسناتكم يآآرب :106:

رد: لكل المستجدات .. نبذة عن كلية الحاسب ..
 

ممم حلوو .. ثآنكس قلب أنثى ..

دمتي متميزهـ بعطآئك :)

::

وعندي سؤال .. وبصراحه اللي سألتني ايآهـ صديقتي لأنها آنقبلت بهالكلية .. تقول هل آستفدتوا بحياتكم العادية من دراستكم للحـآسب ؟

رد: لكل المستجدات .. نبذة عن كلية الحاسب ..
 

العفو حبيبتي ماعملنا شي ^^

مع الايام رح تحبيه صدقيني .. بالمرة ممتع وحلو


تقنية المعلومات اختصارا (ت م - IT)[1] اختصاص واسع يهتم بالتقنية و نواحيها المتعلقة بمعالجة و إدارة المعلومات ، خاصة في المنظمات الكبيرة .
بشكل خاص ، تقنية المعلومات يتعامل مع الحواسب الإلكترونية و برمجيات الحاسوب لتحويل و تخزين و حماية و معالجة المعلومات و أيضا نقل و استعادة المعلومات .لهذا السبب ، يدعى غالبا اخصائيو الحواسيب و الحوسبة بإخصائية تقنية المعلومات . القسم الذي يهتم بتقنيات التشبيك و البرمجيات في شركة معينة يدعى قسم تقنية المعلومات . من الأسماء التي تطلق هذا القسم أيضا . أسماء مثل : قسم خدمات المعلومات (IS) أو نظم المعلومات الإدارية (MIS), مزود الخدمة المنظمة managed service provider او (MSP) .


طبعا مارح تفهمي الكلام بس هذا تعريف ال IT :000:

رح ندرس آي تي سنتين بعد التحضيرية عقبها التخصص ان شاء الله

ان شاء الله اختي تنقبلين .. :love080:

رد: لكل المستجدات .. نبذة عن كلية الحاسب ..
 

امممم تختلف الاستفادة من شخص لآخر وعلى حسب الاهتمام .. انا عن نفسي احس استفدت وصرت افهم الحاسب اكثر " واتفلسف بعد " وانا كنت تحضيرية خخخ :c8:

رد: لكل المستجدات .. نبذة عن كلية الحاسب ..
 

يـآآربي مدري شقولك بسس من جد يعطييييييك العااافيه ماقصصرتي عطيتيني معلومات عن كل شي :love080::love080:

افدتيني كثير
جزاك الله خير وتعبتك معاي :love080::love080:


لبيـــــتكم :m22asmilies-com:

نلتقي بالجامعه :g11:

C u :love080:

رد: لكل المستجدات .. نبذة عن كلية الحاسب ..
 

حلوو ..

قلب أنثــى .. مدري وش أقولك والله (f)

جـزآك الله ألللف خيـرـر :)

رد: لكل المستجدات .. نبذة عن كلية الحاسب ..
 

السلام عليكم ورحمة الله وبركاته
اخت قلب انثى مشكووورة على المعلوومات
يعطيكي العافية
انا قبلووني تصااميم وابي احول حااسب
واحتمال التحويل ضعيف بالمررة
ياريت بس لو تعطيني معلوومات عن التصاميم اكوون لك شاكرة

رد: لكل المستجدات .. نبذة عن كلية الحاسب ..
 

تهيئ كلية التصاميم بيئة علمية وعملية متعددة التخصصات تضم في جنباتها تطبيقات وخبرات مهنية وأنظمة علمية ومعرفية متداخلة الأهداف لإعداد مصممات قادرات على التعامل مع مفردات البيئة المشيدة وترجمة متطلبات الحداثة والمعاصرة مع الالتزام بالإطار الاجتماعي والثقافي للمجتمع العربي والإسلامي, مع الأخذ في الاعتبار مختلف المعطيات المؤثرة في عملية التصميم بما في ذلك المناخ والعوامل النفسية الفردية والمجتمعية.

وتضم كلية التصاميم في جنباتها أربعة أقسام أكاديمية تنطوي تحتها مجموعة من التخصصات الدقيقة: (1) قسم هندسة التصميم الداخلي, (2) قسم المطبوعات والوسائط المتعددة, (3) قسم تصميم المنتجات, (4) قسم الفنون التطبيقية, بحيث تكون مدة الدراسة بكلية التصاميم عدد خمس سنوات, متضمنة عدد 10 مراسم استوديو تصميم بكل قسم من الأقسام الأربعة, لتحصل الطالبة فى نهاية الخمس سنوات على بكالوريوس فى هندسة التصميم (Bachelor of Science). وقد تم اختيار الأقسام وأبعادها الأكاديمية المتعددة بما يحقق متطلبات سوق العمل بالمملكة العربية السعودية و ذلك بعد دراسة وافية لمجالات العمل التصميمي المطلوبة بالمملكة .

كما يلتزم الأساتذة والمعاونين بإدماج الطالبات في مجال البحث العلمي والتجريبي وذلك على المستوى الدولي والمحلى من خلال إعداد المناهج المتخصصة التي تتوافق مع معايير الإعداد الأكاديمي العالمي وتحقق أقصى قدر من معايير جودة التعليم الجامعي.
وفى هذا الإطار فإن مرحلة البكالوريوس تهيئ منظومة تعليمية بحثية متكاملة, تربط مابين المعرفة والتقنية لمختلف التخصصات الخاصة بالتصميم حتى يتم إعداد الطالبة لتخصص دقيق في مجال معين مع إلمامها ببعض مفردات التخصصات الأخرى من خلال الربط بين المقررات المختلفة.


منقول من موقع الجامعة .. لأنو للأسف ماعندي معلومات كافية

اعذريني :$

رد: لكل المستجدات .. نبذة عن كلية الحاسب ..
 

يعطيكي العافية
وبالتوفيق للجميع ^_^

رد: لكل المستجدات .. نبذة عن كلية الحاسب ..
 

الله ينور طريقك يا اختـــ !..قلب أنثى..! & fofa
موضوعك جاء في وقته .. كانك حاسه فينا :D


الحمد الله انقبلت بكليه الحاسب
بس والله خايفه من اختبار تحديد المستوى :000:
الانجليزي عندي زيرو
فيه مجال يطردوني اذا كان مستواي ضعيف في اختبار تحديد المستوى ؟ :mh3535:

رد: لكل المستجدات .. نبذة عن كلية الحاسب ..
 

لآ مافي طرد ^^

بحطونِك مستوى أول وبس ^^

رد: لكل المستجدات .. نبذة عن كلية الحاسب ..
 

كلية علوم الحآسب فيـها سنـه تطبيقيه

يعني يرسلونك لأي مكان لفتره معينه تطبيق ؟؟؟

رد: لكل المستجدات .. نبذة عن كلية الحاسب ..
 

خيتو .. قلب أنثى

.. مم إذا لاااا سمح الله مآ عدينا التحضيريه بالمعدل المطلوب ×_× ... وين بيحذفوننـآ :P ؟؟

وسؤال ثاني .. الدوام يومين بس لين 5 ؟ والا كل الاسبوع =S ؟ وفيه يوم Off والا :) << مصختهـآ


:::


كـــــــــــــــــــــــل الشكــــــــــــــــــــــــــر

رد: لكل المستجدات .. نبذة عن كلية الحاسب ..
 

صراحة لسه ماعندي الخبر الأكيد .. بس سمعت انو احتمال يكون في تطبيق <--- لاحظوا سمعت لحد يقول قلب أنثى قالت خخخ

رد: لكل المستجدات .. نبذة عن كلية الحاسب ..
 

بالنسبة انك ماتجيبي المعدل المطلوب صعبة بالحييييل <--- حتى الي كان عندهم رسوب بمادة كانوا فوق المعدل..

عموماً يكون فيه دراسة صيفي لازم تجتازين المواد كلها مافي شي اسمه حمل مادة .. بعد الصيفي اذا ما عديتي يا بيرسلونك لكلية شروطها اقل ( مثل كلية العلوم أو المجتمع ) أو انو يقضبونك الباب !

عموماً ان شاء الله الكل يعدي ..


بالنسبة للدوام .. الترم الأول كان يوم لـ 3 يوم لـ 4 ويومين لـ 5 ( بعدها صار يوم لـ 6 ) ويوم لـ 12 <--- والله نسيت يومكن هيك :hahahahahah:


الترم الثاني: يومين لـ 4 ويومين لـ 5 ويوم لـ 12 <--- ان شاء الله مااكون خربطت الدنيا :bawling:

رد: لكل المستجدات .. نبذة عن كلية الحاسب ..
 

^^

لآلآ مآ تئوليش :( !!! .. وش بنسوي طول هالوقت :d ؟ << بتتصفق

الله يعين .. والله يكتب لنآآ اللي فيه خيررر

:::
::
:
.

مــــآقصرتي والله ..

رد: لكل المستجدات .. نبذة عن كلية الحاسب ..
 

السلام عليكم اخواني انآ حطيت موضوع بس ماحس ان استفدت بالردود وشفت ان الكل يتناقش في هالموضوع بالنسبة للبنات اللي عندهم خبرة بحط لهم تسآؤلآتي
..آنا طالبة في كلية ينبع الجامعية سنه تحضيريه
السؤال الموجه - هل بآمكاني التحويل الى كلية علوم الحآسب وتقنية المعلومات بعد انهائي للسنه التحضيرية مبآشرة - تخصصي آدبي ودراستي في السنه التحضيريه باللغه الانجليزيه
انآ آعلم ان الشهادة المطلوبة علمي .. لكني سوف انهي السنه التحضيريه بنفس الشروط المطلوبة
آو اذا بآمكآنكم ان تضعو رقم للكلية او بريد الكتروني ..سآكون شاكرة لكم .. اتمنى الرد يآخوأتي مع كثير الرجآء

رد: لكل المستجدات .. نبذة عن كلية الحاسب ..
 

رد: لكل المستجدات .. نبذة عن كلية الحاسب ..
 

- أول يوم وين ندآومـ بـآلجـآمعه ووين نروح بالضبط والساعه كم الحضور ؟

تداومون بالجامعة .. "المكان الي فيه مباني الطب والعلوم الطبية ...الخ" انتوا اول ماتدخلون بتلاقون الامن بيعرفوكم مستجدات وبدلونكم القاعه الي رح تكون فيها كل المستجدات .. اممم كأني رحت ع الساعه 7 ونص مااذكر :hahahahahah:


- بالنسبة لنا احنا طلاب السنة التحضيرية هل لنا بطاقة جامعية والا نحصل عليها بعد دخول السنة الاولى ؟

رح يطلعون لكم البطاقة الجامعية .. تقريبا استلمناها بعد شهر من بدينا دوام


- بالنسبة للمكأفأة متى نستلمها وهل احنا نفتح لنا حسااب ببنك تحدده الجامعه والا مثل ما سمعت الجامعه بس تعطينا البطايق واحنا نفعلها بالبنك ونحط لها رقم سري ؟

المكافئات تنزل بداية السنة لكم شوي متأخرة شهر تقريبا مااذكر .. الي سمعتيه صحيح علينا التفعيل فقط


- بالنسبة لنظام البانر وشلون نحط الجدول وهيك هم بيعلمونـآ صح << إنشـآء الله ما غلطت بالاسم ..؟! ^.^

رح يعلمونكم كل شي .. نظامه المعلومات الي فيه تسجيل الجداول "كل شي" .. بكون تسجيلكم للمواد مو معنا شوي متأخر وبيعطوكم اوقات فتح التسجيل و...الخ

رد: لكل المستجدات .. نبذة عن كلية الحاسب ..
 

مبروك عليكـم اللوك الجديد :p

وكـل عآم وانتم بخير .. وعسآكم من عوآدهـ يـآرب :)

:::

قلب أنثى .. أول اسبوع .. له داعي نداومه كله :d ؟ والا بس اول يوم وو يوم اختبار تحديد اللغه ؟

<< :g2:

رد: لكل المستجدات .. نبذة عن كلية الحاسب ..
 

انا عن نفسي ما رحت غير اول يوم ويوم الاختبار حق تحديد المستوى

فما ادري له داعي او لا :mh19:

رد: لكل المستجدات .. نبذة عن كلية الحاسب ..
 

^
^

خلاص بسوي زيك :g8:

خخخ

::

ألف شكر :)

رد: لكل المستجدات .. نبذة عن كلية الحاسب ..
 

السلآم والرحمه ..

كيفكم بنــآت ؟!

مبرووك القبووول ... اشوفكم متحمسين ومبسوطين .. عكسسي >_< !

بناات انا مرره مرره خايفه ومكتأبه :Cry111: ..

خايفه من الدوآم الطويل ومن البنــآت هنــآك .. يعني حتى ما أعرف ولا بنت هنــآك

وانا من النوع اللي ما احب اتعرف كثير .... واسمع انو بنات الجــآمعه بعضهم مش ولآبد >_< !

وانا انسانه ملووووووووله لأبعد حد .. كيف أصبر الى الساعه 5 >_< تراها مصيبه بالنسبه لي

وكيف الدراسه صعبه ولا سهله ؟! يعني لآزم اشد حيلي .. ولا وسط يمشي ؟!!

آآآآآآآآآآآآخ حدييي متأزمه .. كان أملي علوم طبيه :Cry111::Cry111:

ان شاء الله خيره :Cry111: ..

رد: لكل المستجدات .. نبذة عن كلية الحاسب ..
 

يؤيؤيؤ يا قلبي ليه كذه !!

أول شي حبيبتي هدي والخيرة فيما اختاره الله

قولي الحمد لله والله اعرف بنات حلم حياتهم يدخلون هالكلية وماحصلت لهم

احمدي الله انو انقبلتي !!

ثاني شي: كل مكان فيه الشين وفيه الزين والشاطر الي يعرف يختار يا قلبو

الدراسة في التحضيرية مصعبها طول الدوام .. بس بشكل عام ما في تحضيرية بالدنيا صعبه ويبي لها شدة حيل بقوووة !!


كلنا ماكنا نعرف احد والحمد لله تعرفنا على بنات مثل الاخوات صاروا .. وكلنا لما عرفنا بالدوام سوينا مناحة وبكي وحالة ومع الوقت تعودنا وصاير شي طبيعي

اهم شي تبدأي الدراسة بنفسية حلوة وربي بيوفقك وبيسهل عليك كل أمورك

وترى والله قسمنا حلو .. لو عرضوا علي كل تخصصات العالم ماقبلت فيها <--- متحيزة من متوسط لهالكلية :hahahahahah:

رد: لكل المستجدات .. نبذة عن كلية الحاسب ..
 

رد: لكل المستجدات .. نبذة عن كلية الحاسب ..
 

ونعم بالله ... والله احمد ربي وأشكره .. غيري ما أنقبل في شئ

بسس قلبي موو مرتــآح لهــآلكليه .. إن شاء الله تتغير نفسيتي اذ1 رحت

ومشكووره يــآ قلبي أخذتي بخــآطري :love080:

الله يوفقك ..

رد: لكل المستجدات .. نبذة عن كلية الحاسب ..
 

نو نو .. هم رح يفتحوا لك حساب ويعطوك البطاقة وعليك تفعيلها بس

انا بعد كنت ابي نفس حسابي مع انو ماكان بالرياض قالوا لي ما في :hahahahahah:

رد: لكل المستجدات .. نبذة عن كلية الحاسب ..
 

على نياتكم ترزقون

انتي صفي النية وكل شي بصير تمام ان شاء الله أو رح تعملي من الحبة وقبة وماترتاحي بحياتك الجامعية :119:


العفو قلبي

ان شاء الله بعد الدوام تجي تبشرينا بحبك للكلية و للمجال :love080:

رد: لكل المستجدات .. نبذة عن كلية الحاسب ..
 

لآلآ مايصير ابي نفسس الحسساب :bawling:

طيب انا حسسسابي بالبريطاني ينفع لهم :mh19:؟؟

رد: لكل المستجدات .. نبذة عن كلية الحاسب ..
 

حتى لو كان بالرياض <--- نفس البنك مو ممكن

لانو الحساب اسمه حساب الطالب

بطاقة الطالب هذي بس غرضها انو تنزل المكافأة فيها ويتم السحب فقط لا غير !

^^

رد: لكل المستجدات .. نبذة عن كلية الحاسب ..
 

اهـآ .. فهمت

= طيب عندي سسؤال
وانا اقرا في البدايه قريت ان اخر شهرين تصير الدراسه ترمنولوجي وتوفل

يعني نمتحن توفل بعد ماندرسسه ؟!
وشنو الترمنولوجي ماعمري سسمعت فيه ؟!

رد: لكل المستجدات .. نبذة عن كلية الحاسب ..
 

^^
أنـآ بعد نفس السؤال وعندي سؤال زياده
اخر شهرين في شنو في السنة التحضيرية والا في الـ 5 سنين دراسه
مباارك عليكم الشهر وموفقين

رد: لكل المستجدات .. نبذة عن كلية الحاسب ..
 

يب رح تمتحنون توفل ع نهاية السنة <--- بعد الفاينلز بكم يوم

قبلها بتختبرون اختبار الجامعة .. التوفل يقولون انه فرصة ثانية للطالبات يجيبون درجة حلوة او يعدون :cheese:

الترمنولوجي: عبارة عن دراسة مصطلحات لتخصص ما .. بحالتنا رح تدرسون عن اجهزة الحاسب تركيبه وظائف كل جزء منه السوفت وير وهالأمور بالانجلش .. يعني مصطلحات حاسوبية عشان لاتضيعون بالطوشششة مع الايام :hahahahahah:

رد: لكل المستجدات .. نبذة عن كلية الحاسب ..
 

حبيبتي "تحبيني :p "


بالتحضيرية ^^

رد: لكل المستجدات .. نبذة عن كلية الحاسب ..
 

تسسلمين مـرآآ ..
الله يووفقكـ يـآرب :love080:

رد: لكل المستجدات .. نبذة عن كلية الحاسب ..
 

[align=center]
اولا يعطيك العافيه ع الموضوع من جد كنت محتاجه لموضوع هيك

ثانيا انا عندي كم سؤال وياريت تجاوبيني عليهم

س/ الجدول من وين آخذه هل من النت او الإداره بتعطيني اياه ؟
س/هل في محاضرات من اول يوم ولا بس تعريف بالأنظمه ؟
س/في مواصلات (باصات) من والى الكليه ولا ادبر عمري؟
س/وهل في مكافئه ؟ واذا فيه كم قيمتها ؟


أدري ثقلت عليك بالأسئله <<<لا زين حسيتي
بس وربي من الخرعه احس اني ضااايعه ولا احد اعرفه بالكليه هذي

وكل ما اذكر الدوام يعورني بطني كأني مستجده اول ابتدائي <<<<ههههههههههههه

وسوري اذا كانت الأسئله غبيه بس وربي ما اعرف شي ابد <<<<من فلاحتك خخخخ
وبس يعطيك الف الف عافيه
[/align]

رد: لكل المستجدات .. نبذة عن كلية الحاسب ..
 

الله يعافيك حبيبتي

1- الجدول رح تاخذونه من الجامعة باول يوم تقريباً
2- أول اسبوع مافيه محاضرات مجرد تعريف ع الجامعة والكلية ومدري ايش. انا عن نفسي رحت اول يوم ويوم الثلاثاء بس - يوم اختبار تحديد مستوى الانجلش -
3- فيه مواصلات تبع الجامعة - باص صغنون - بس مااعرف احد يركب فيه أبد فمااقدر افيدك بهالنقطة اعذريني
4- فيه مكافئة عبارة عن 990 .. سمعت بيزيدون المكافأة لـ1000 وشوي "300 ريال" بس مدري هالكلام صج او لا

شدعوة حبيبتي لا ثقلتي ولا اي شي .. كلنا مرينا بهالحالة لا تخافين ^^
والاسئلة ابد مب غبية .. واذا عندش استفسار هنا او هناك لا يهمك واسدحيه هونا :cheese:

رد: لكل المستجدات .. نبذة عن كلية الحاسب ..
 

[align=center]
مشكووووووره أختي (قلب انثى )

الله يعطيك العافيه

لاخلا ولا عدم منك انشالله
[/align]

رد: لكل المستجدات .. نبذة عن كلية الحاسب ..
 

السلام عليكم ورحمة الله
انا متابعة الموضوع من البداية ,,وشكرا شكرا شكرا
ما قصرتوا ابدااا يا بنات ثاني

عندي سؤالين اذا ممكن تجاوبون >>
1- كم لازم اجيب بالتوفل عشان اسوي سكيب للانجلش لكتشرز؟
2- كم عدد طالبات الدفعة؟
3- سمعت اننا بنقسم ل3 قروبات في الدراسة بشكل عام, صحيح هالكلام؟ وهل اقدر اختار قروبي؟

وجزاكم الله الف خير

رد: لكل المستجدات .. نبذة عن كلية الحاسب ..
 

وعليكم السلام والرحمة

<--- ماعرفت روحي لما قلتي بنات ثاني :hahahahahah:

1- بالنسبة للتوفل فهو يعتبر فرصة ثانية للي ماعدوا انهم يعدوا "يعني مثلا وحدة كان عندها ظروف بفاينل الانجلش او شي" عموماً للنجاح في الانجلش لازم c+ أو c فما فوق ^^

2- مادري والله كم عددنا بالضبط .. بس تقريبا 90 او 100 :g2:

3- انتوا بتروحوا اول يوم ويتكونوا مقسمين لثلاث شعب وجاهزين .. بس اتوقع اذا تبي تحولي او تبدلي مع وحدة مافي مشكلة ^^