رد: jubail university college || جميع إستفساراتكم هنا ..
 

السلام عليكم ...
كيفكم يالربع
المهم زبدة الموضوع انا انقبلت في جامعه الملك سعود وارسلت لهم اوراقي ...
والاسبوع اللي راح طلع قبولي في الجبيل الجامعيه ...
السؤال لو سحبت ملفي من سعود وارسلتها للجبيل وبعدين خلصت التحضيرية وفكرت ارجع لسعود هل اقدر احول لجامعه سعود ولالا ؟؟

رد: jubail university college || جميع إستفساراتكم هنا ..
 

بنات من طلبوها تجي تاريخ 19 :(
مابي اروح لحالي استحي من زيي بنفس التاريخ؟

رد: jubail university college || جميع إستفساراتكم هنا ..
 

ههههههه ياقلبي عليك مافي لحالك لاتخافين الجامعه فيها بنات + الموظفات بعد بتلاقين كثيييير زيك بالعكس بتقولين ياليتني لحالي هههههههههه :43:

رد: jubail university college || جميع إستفساراتكم هنا ..
 

مَ اعتقد في مجال نهائي اخوي !
لكن اذا ودك بالنصيحه فَ استخير والخيره فيما أختاره الله ،
ودام الجامعيّه قبلتك فَ على الاغلب بتنقبل السنه الجايه .. لكن سعود يمكن ماتتعوض والقرار لك الله يوفقك .

:16:

رد: jubail university college || جميع إستفساراتكم هنا ..
 

السنه الجايه بتكون اول سنه لي تخصص ولا اعرف كيف اسوي جدول
ماعندي اي معلومه كيف نضيف المواد هي تجي جاهزه ولا وكيف نحذف وكيف نختار المسات وكيف امنع التضارب

ياليت لو مشرفة القسم او اي احد حاب يساعد يعمل موضوع للأساسيات ويشرح لنا كيف نسوي الجدول من وإلى ويتثبت لأن هذا موضوع مهم يكون بالقسم وواجد بيستفيدون منه وان شاء الله يكون بميزان حسناته :15:

والله يجزاكم خير
:2:

رد: jubail university college || جميع إستفساراتكم هنا ..
 

رد: jubail university college || جميع إستفساراتكم هنا ..
 

كفيتي ووفيتي :1:
بس الجدول العام هذا متى يمديني اطلع عليه؟
اقدر اخذه من بنات التخصص ولا كل شوي ممكن يتغير؟
وتقريباً بعد كم من الوقت ممكن يمتلي السكشن؟ يعني يتسكر بنفس اللحظه يملونه البنات ولابعد ساعه ولاكم؟ من واقع تجربتك يعني
لأن ودي اول مايفتح التسجيل اكون عارفه اللي ابي وماتسكر السكشنات علي
شكلي بعد كل شعبه بسوي submit عشان الحق :41:
وكيف امنع التضارب؟ يعني بيعلمني وبيجيني السكشن اللي ممكن يكون فيه تضارب بخانه غير مفعله؟

رد: jubail university college || جميع إستفساراتكم هنا ..
 

رد: jubail university college || جميع إستفساراتكم هنا ..
 

مشكوووره كفيتي ووفيتي :34::16:

رد: سؤال عن الطالب المنسحب..
 

أنا العام الماضي كنت بنفس حالتك تقريبا بس ما كنت أتابع منتديات ولا كنت راعيها ..
كنت ناوي البترول بس ما انقلبت لان المعدل كان عالي فوق المتوقع وكانت وجهتي الوحيدة وما فكرت بأي جامعة ثانية ..
قريت الفرصة المكتوبة للالتحاق بالجامعة بواسطة كلية المجتمع وهي أني أجيب c في الرياضيات والإنقليزي .. كانت في نظري سهلة جداً ومادتين وما كانت وقتها المنتديات ببالي أبدا ولا استفسرت ولا شئ وكنت واثق من نفسي أني بحول ..
دخلت المجتمع واختبرت تحديد مستوى ولا كان عندي أي خلفية عنه بس كان شبه سهل بالنسبة لي وحليت كويس ..
بعد ما اختبرت قالولي رح لمكتب استخراج بطاقات الطلاب عشان اطلع بطاقة طالب
رحت وأخذت رقم وانتظرت تقريبا 3 دقائق ما طولت ودخلت وصورني وأنا شكلي أبو كلب لأني كنت ماسك خط سفر من الفجر جاي من الرياض عشان اختبر تحديد المستوى اللي كان الساعة 11 .. الزبدة عطاني البطاقة وبعدين طلعت من عنده ما ادري وش أسوي .. ركبت السيارة بس قلت كيف !! كذا بس .. بطاقة طالب واختبار تحديد مستوى وأتوكل على الله ؟! .. نزلت من السيارة ورحت لمكتب شؤون الطلاب قلتلهم تبون شئ مني ولا كيف ! .. قالو طلعت بطاقة ؟ قلت إيه .. قالو الدراسة الأسبوع الجاي وموفق .. قلت طيب ما فيه سكن .. قال ما فيه لا سكن ولا مكافئة !! .. قلت له طيب ما فيه شئ اقدر اتواصل فيه مع أي احد مثل وضعي ما فيه لستة بأسماء الطلاب من خارج الشرقية ،. أي شئ تخدموني فيه !
قالو ما نقدر نفيدك بشي .. طلعت وقلت في نفسي تهون علشان البترول لازم نتعب .. رحت استأجرت غرفة ونمت وأول ما صحيت رحت أدور على العمائر أدور شئ نظيف ورخيص لين ما لقيت بعد 4 ساعات من اللف والدوران حول الراشد لقيت غرفة نظيفة وبعد شهر لقيت واحد اسكن أنا وياه تعرفت عليه من الكلاس لكن ما تيسرت وانتهى كورس 01 الانجليزي اللي تحدد لي من اختبار تحديد المستوى .. لكن جبت فيه d+ .. وأظن كان الفارق بسيط عن ال c .. رحت للجامعة أنا وواحد من الطلاب وقابلنا عميد القبول الدكتور السويلم .. كلمناه عن اللي صار لنا وكان وقتها في اختبار قرامر من 100 سؤال ( اختيارات طبعا ) لكن مدة الاختبار 60 دقيقة وعلى ذا الأساس رحنا نقوله قال لنا أن هذا ما يخصنا لكن عموما ما في شئ بتنظلم عليه لان اللي عندك مثل اللي عند غيرك ومن ذا الكلام وحاولنا معاه لكن للأسف قال لنا هاذي الأنظمة ومحد يقدر يساعدك .. طلعنا من عنده وأنا للحين مؤ مستوعب كيف اترك حلمي بذي السهولة !! فكرت وسالت وسمعت انه إذا جبت معدل عالي في الدبلوم فوق 3 اقدر أروح البترول .. قعدت لين نهاية الترم الأول وجبت الماث d مع أني كنت اقدر وبسهولة أني أجيب c وممكن b لكن تحطمت .. ونفس الشي الانقلش 02 جبت فيه d .. بديت الترم الثاني ونقصو طلاب الكلية .. اللي خلص إجراءات الابتعاث وتفاجات انه جاي يطقطق في الكلية وما همه ايش جاب .. واللي راح الجامعة الأقرب لديرته .. وسمعت عن كثير من الطلاب راحو الجبيل سواء الصناعية او الجامعية وأنا مثل الأطرش في الزفة قاعد أتفرج واسمع .. وما ادري وش أسوي .. وكان الشي الوحيد في بالي هو جامعة البترول .. مر شهر على الترم الثاني وحسيت أن أبوي يلمح أني ادرس في سعود او الإمام لكن كلما طرت في بالي زحمة الرياض في الصباح ابتسم ..
بعد ما مر شهر مريت بأزمة مالية لان أبوي كان ناوي يبني بيت وصعب يصرف علي .. قلت مالها إلا اني اشتغل .. رحت أدور في الشركات والأسواق والفنادق لين ما لقيت واحد طيب ساعدني في التوظيف في التميمي .. طبعا في البداية ما علمت إلا واحد من اعز الناس اللي قابلتهم في الكلية لأني ما احب احد يعرف اني اشتغل ومع الوقت عرفو للأسف لأن دوامي في السوق 9 ساعات وما اخلص إلا الساعة 1 في الليل وأقوم الصباح للكلية الساعة 8 وغالبا احضر للكلية وأنا شبه نائم واحيان أخلي صديق لي في الكلية ساكن فعمارة قريبة مني ويمرني إذا كنت خائف أسوق وأنا دايخ فيني نوم .. بعد شهرين تعودت والمدرس كان عارف اني اشتغل وباقي الطلاب ما يشتغلون .. عموما عديت 03 الحمد لله لكن 04 كان المدرس شبه نظامي وكان مؤ متعاون معي بالشكل اللي كنت أتوقعه لكن نهاية الترم أعطاني حقي وزيادة الله يجزاه كل خير لكن ما عديت 04 لان لازم تجيب في التوفل فوق الـ 500 وإذا كنت قريب منها يدفونك لكن جبت 413 وما عديت ..
خلص الترم بخيره وشره وأخذت إجازة من الشركة أسبوعين على اني بدرس صيفي وياليتني ما درست صيفي وتوبه ادرس في الصيف .. عذاب بمعنى الكلمة خصوصا في رمضان كل يوم متجحلط في مطعم لين ما لقيت محل آكلات رمضان بس بعد ما راح ثلث رمضان .. المهم بدا السمستر وقالو لنا أنهم كل سنة يتساهلون مع طلاب الصيفي لكن الغربة عذاب في الصيف .. جت أزمة في السوق زحمة غير طبيعية بسبب رمضان مع انه من اول ما اشتغلت وأنا يوميا أنكرف بس تعودت .. كنت ناوي عالجبيل الجامعية بعد ما شفت وضعي الزفت كرف ودراسة .. وقدمت عالجامعية وأنا عارف اني بانقبل بسهولة لان معدلي كويس جداً لكن ما قررت إلا بعد ما فكرت كثير وقعدت يومين في الشقة وأفكر بالمستقبل ووش بكون وكل شئ وطبعا أنا ما افكر في التخصصات بقدر ما افكر بسمعة الجامعة وقوة المواد خصوصا أن مواد التحضيري حسب ما سمعت أنها تقريبا مثل البترول والاختبارات أحيان تكون أصعب من البترول وهذا اللي شدني لها .. لان أي شئ صعب فوايدة أكثر من السهل وهاذي قاعدتي في الحياة اني ابحث عن الأصعب ..
انقلبت في الجامعية الحمد لله .. وسحبت شهادتي من الكلية بنظام الإعارة لمدة شهر لان ودي أكمل الكورس اللي باقي له أسبوعين لان حرام ادرس الترم كامل وعلى آخر أسبوعين اسحب .. وغير كذا إذا سحبت ما اقدر اختبر توفل اللي يكون نهاية كل ترم في السنة التحضيرية تقريبا .. وأرسلت أوراقي للجامعية .. وتأكدت أن ما فيه في الموقع شئ اسمه إخلاء طرف في حالة اني كنت ادرس في كلية .. كل اللي مكتوب عن السجل الأكاديمي فقط .. واستقلت من الشركة رغم محاولاتهم اني ما استقيل وما كان ودي لأني حبيت العمل لكن مستقبلي مو هذا مكانه ..
طبعا هاذي السنة كانت فيها أحداث كثيرة ممكن ما تحصل لي طوال حياتي واستفدت منها كثير وأنا غير نادم على السنة هاذي اللي ضيعتها من عمري .. وانا من رأيي انك تجرب الشي اللي ما تقدر تجربه في السنين الجاية .. البترول ما تقدر تتحول لها من المجتمع في سنة غير السنة اللي تخرجت فيها من الثانوي ونصيحتي لك لا تنقطع عن المنتديات سواء هذا المنتدى او غيره من اللي تنفعك في المكان اللي بيكون مستقبلك فيه لان كلما انقطعت كلما تلاشى أمل النجاح والتفوق لان المنتديات في الوقت الحاضر هي الوسيلة الوحيدة اللي تقدر تتواصل فيها مع بقية الطلاب سواء من دفعتك او الدفعات اللي كانت في مكانك ..

عموما اعرف اني طلعت عن النص وعلى قولتهم شطحت واجد لكن ممكن احد يستفيد من الكلام او بالأصح قصتي اللي قلتها لكم ..

اعذروني على الأخطاء إذا كانت في بعض الكلمات .. وآسف عالإطالة ..