|
:: نقاش :: افتقدنا اللمة بالأهل والأحباب !
بســم الله الرحمـن الرحيم .. صباح / مساء الخير اولاً وللأمانه الموضوع منقول حتى اللهجة الاماراتيه ^^ وهاذي فكره طرحتها كمشهد تمثيلي في مركز صيفي وقررو يعملونه وعمري كله مامثلت الا بالثانويه والآن اصرو اني امثل دور النصووحه لكن محتاره كيف ارتب كلامي وايش اقول لذلك قلت انزل الموضوع واتناقش معكم واستفيد من ثقافتكم واعرف كيف اقدم دوري بشكل جيد وخذو حساب طلاب الابتدائيه كيف اوصل لهم الرساله وبنفس الوقت الاهل ...... اليوم االله يسلمكم الجمعـة وكان في عزيمة بيت أهلي خالاتي وخوالي ويداتي ...الخ العايلة الكريمة كلها موجودة ... ومثل مانتوا شايفين التجمعات حلوة والواحد من يسمع تجمع يفرح .. لأنا نشتاق لأهلنا ولسواليفهم ومسلسلات كان يا مكان إلي يبثونه لنا من نقعد معهم ههههههههه كنت من أسمع إنهم متيمعين ومتولفين على طول ركض أزهب وأروح عدهم لكن الحين كل شي تغير .. صارت اليمعة واليلسة كلها على الفونات + آيباد ...الخ الهدوء صار يسيطر على اليمعة واللمة كل واحد مشغول بتلفونه يطقطق بهالأزرار ... نكلمه يا فلان اشحالك ... بيرد بعد ساعة ببرود ومختصر بخير وعينه ما شلها عن شاشة الفون .. بنسأله شو تسوي ؟؟ بيقول : قاعد على الواتس .. أو على الفايبر ...الخ غيرة الكثير من من البرامج المجانية العديدة ... حتى لا تكلموا بيكون الكلام كله عن هالبرامج ومميزاتها وسلبياتها وشو الجديد وشو القديم ... صارت اللمـة واليمعـة باردة حتى خالتي الكبيرة أذكرها قالت ماشاء الله الكل صار يسبح أخاف حد يحسدكم أنا رفعت عيني عن الفون أشوف من يسبح بعدين استوعبت قصد خالتي إنها الوحيدة يالسة تطالع علينا وكل وحدة يالسة على فونها تشبيها كان حلو ههههههههه قالت أبا أعرف شو تسون هالكثر !!! وللأسف هذا الشي مو بس في اللمـة والتجمعات بين الأهل صار في كل مكان أذكر مرة رحت مول رحلة من المدرسة كنا نمشي أنا وربعي وإلا أشوف واحد شوي وبيدعمنا طالعنا لقينا الحبيب موخي راسه ويطقطق بهالفون وما يشوف قدامـة شوي ويدعمنا ... يالله هالكثر صار مجتمعنا كذا !! أنا ما أقول الكل لا أنا ما أعمم لكن الأغلبية هذا حالهم وأنا طبعاً منهم ما بدافع عن نفسي لكن ما لهدرجـة إلي تخليهم في عالم ثاني ما فيه غير هو والفون ما يحس حوالينه بشي.. المشكلة صارت هالأجهزة وهالتطور منتشرة وااايد ووصلت لأيادي الأطفال .. أمس استغربت بنت خالتي عمرها 4 سنوات عدها آيباد .. ليش يوفورونه لها له مخاطر وايد ... يكفي إنه يرسل موجات اشعاعية تضرهم وايد مع مرور الوقت ... شوفوا الغرب هم إلي يكتشفون ويعطونا هالأجهزة وهم ما يستعملونه .. يستعملون القديمة مال بو ليزر ونحن جاسين علينا ونستعمل هالأشياء وصارت تلهينا عن أشاء وايد .. فالأخير حابـة أشوف آرائكم على هالظاهرة المنتشرة عدنا .. وشو الاسباب إلي تدفعنا على كذا .. وشو الحلول المناسبة للقضاء على هذه الظاهرة أتمنى ألاقي تفاعل .. ...... ماهو الحل الامثل لمنع حضور الاجهزة لمجالس الاهل وطاولات الطعام واوقات التسليه لأفراد العائلة ؟ والمجال مفتوح للنقاش غير محصور على السؤال ؟ تفضلو |
رد: :: نقاش :: افتقدنا اللمة بالأهل والأحباب !
ههههههههههههههههههههه والله انا ودي اجيب جدتي هي اللي بترد رد واااااااااافي :8: من كثر ماهي رافعه ضغطها هالاجهزه :5:
|
رد: :: نقاش :: افتقدنا اللمة بالأهل والأحباب !
:13::13: احنا بالجمعات جدتي تهددنا :32: الي تشوف الجهاز بيدها بتصادره منها طول اليوم :5: |
رد: :: نقاش :: افتقدنا اللمة بالأهل والأحباب !
صراحه كﻻم صحيح
انا ما انكر ما اقدر استغني عن الاجهزه لكن اذا طلعت او جمعه خصوصا اذا فيه حريم كبار وكذا احترم مجلسهم وجوالي صامت ومقطوط ﻻخر الجلسه واذا طلعت احاول قد ما اقدر ما اطلعه ﻻن انا طالعه انبسط واغير جو مش اطقط وبعدين عندي 3 اجهزه حتى منظري بايخ وانا بطلع كل شوي واحد :30: ولدي ما انكر خذيت له ايباد ولكن له اوقات معينه اضطريت لان يشغله وقت م اذاكر وخصوصا انه طفل وحيد واحاول قد ما اقدر ما اخليه يستخدمه كثير يعني اخذ له العاب تنمي مهاراته الجسديه والعقليه واهم شي وقت الطلعه ينسى ياخذه معاه الحين يقول ابي بيري:28: قصده بلاك بيري يا عمي فك الخط اول وبعدين :5: خلاصة الحكي انه الواحد يراقب نفسه ويحاول يضبط اموره شفت حركة باحدى الافلام الاجنبيه وقت الجمعه الموبايلات تتقفل وتجمع في سله الى وقت إنتهاء وجبتهم وبالامكان تطبيقها و اشوفها جميله جدا :21: |
رد: :: نقاش :: افتقدنا اللمة بالأهل والأحباب !
صراحة موضوع جميل جدا ولكن الحمدلله لاأعاني من هذه المشكلة أنا أحيانا ماأرد على مكالمة إذا عندي ضيوف فمابالك بالبلاك والوتس وأصلا معروفة إني من الأصنام في اللستة :29: وحتى في إجتماعاتنا مافي أحد يمسك الجهاز إحترام للموجودين وأنا أشوف المشكلة حلها يبدأ من البيت والتربية لازم نعود أولادنا على آداب المجلس وإكرام الضيف لأنه لو عملنا سلة وجمعنا الأجهزة حتلاقي الأغلب مقاطع لجمعات العائلة وشوية شوية يقل أعضاء العائلة المجتمعة :28: لازم نبدأ بالاقناع وممكن منع خروج الجهزة من البيت :27: أولادي لو نبغى نتمشى ماشاء الله كل واحد ماسك الجهاز يبغى ياخدو معاه طبعا أنا أشوف الأجهزة في اليد أبطل الخروج وأشيل العباية وأعلقها وهم ينجلطو :27: أقلهم اذا راح تاخدو الأجهزة ايش فايدة الخروج خلاص خليكم مع الجهاز طالما إنتو مبسوطين منه بمعنى آخر خليه ينفعكم :42: والحمد لله الآن حتى في البيت مايقعدو عليه كتير والإدمان خف بشكل كبير :21: علشان كدا أساس أي شئ التربية من داخل البيت والله يصلح الجميع وعذرا على الاطالة :34: وبالتوفيق :16: |
رد: :: نقاش :: افتقدنا اللمة بالأهل والأحباب !
انا بنسبه لي مو مقتنع فيها ومحاربها بعمري مامتلكتك بلاك بيري وعمري مادخلت الواتس اب مع العلم انها مفيده وجيده لكن مااحب ارتبط وعموما هي دوره زمنيه لازم نمر فيها ومالها حل غير الي ماعنده هالاجهزه نوفرها له يعني حتى الكبار في السن حيبوا لهم وراح تلاقينهم يلغون فكرة اللمه والتجمعات عموما فطوم الحاله صارت على مستوى الاسره بالبيت الواحد تلاقين الاب والام والاولاد جالسين مع بعض وكل واحد بيده جهازه وكل واحد طالب له وجبه وكويس ان جمعهم الغداء شعب خفافيش يداومون ويرجعون ينامون حتى العشاء يصحون وعلى المولات يرجعون بعد 11 يبقون على الاجهزه حتى قبل الفجر ينامون ساعه او انهم يداومون مواصلين فيه خلل كبير ماانكر لكن كل الي اقدر اقوله الله يستر من الجاي اخاف برضه ان نتبكى فيما بعد على زمنا هذا الله يعطيج العافيه على قولت اهل الامارات فطوم
|
رد: :: نقاش :: افتقدنا اللمة بالأهل والأحباب !
موظوع ونقل جميل ورائع
مما شدني للمشاركة فعلا ننحن نعاني من هل اجهزة وتداولها مع الكبير والصغير ولست ضد لكن انا ضد سوء استخدامها انا اشوف انها اجتماعيا مؤثرة خاصة في الاجتماعات العائلية وفعلا مثل ما تفضلو الخوات الحلول تبدأ من البيت والعائله وحسب ما يتعودون وايضا الاستمرار عليها لفترات طويله لها مضار صحية وخاصة على الاطفال عاد امس سحبت جميع الاجهزة من ابنائي المحمول والمسموع والمرئي :42: طبعا بعد عدة انذارات شفهية :27: وباذن الله سأصل الى حل وتسوية معهم :41: موضوع اكثر من رائع ومفيد الله يوفقك فاطمة في ما تنجزينة من عمل موفقين ،،،:16: |
رد: :: نقاش :: افتقدنا اللمة بالأهل والأحباب !
للاسف ثقافه الاستخدام لدينا تكاد تكون معدومه
بكل شي تقريبا حتئ ان وصلنا ان التكلونجيا اصبحت اهم من اولويات كثيره بحياتنا اصبح عالمنا محصور بجهاز متناسين الابعاد المفيده للتواصل الاجتماعي الحقيقي ليس( بما يسمي الوهمي) فلا عجب ظهور الامراض النفسيه وامراض التوحد وامراض العزله الجبريه النفسيه اعيد القول ليس العيب بالاجهزه والتكلونجيا فهي نعمه ولكن العيب في الاستخدام الصحيح -فليس من المعقول ان لا نواكب التطور الحاصل بالعالم لكن العيب ان نجعل هذا التطور والانفجار التكلونجي يسلب منا ابسط اولويات واهميات الحياه الحل تكثيف الوعي باستمرار فلا حل مع رغبات الناس الا الوعي والارشاد وتسليط الضوء علئ عظم خطورة هذه الظاهره اولا نفسيا وثانيا اجتماعيا فالاجهزه لن يتوقف تطورها ولكن من الممكن تغيير ثقافة الاستخدام موضوع مهم للغايه ونقل موفق |
رد: :: نقاش :: افتقدنا اللمة بالأهل والأحباب !
مساء الخير عزيزتي ..
الالكترونيات صارت شغلنا الشاغل .. ما أييد ان الالكترونيات تنسحب وقت الوجبة أو وقت الجلسة العائلية .. لأني وقتها انا اللي راح انسحب نبدأ نشغل انفسنا بنشاطات جماعية .. وقت الجلسة نرسل امور تستحق النقاش .. وقتها النقاش يكون كلاميا لا كتابياً .. امسك الاطفال واشاركهم اهتمامهم بالإلكترونيات سواء باللعب او الرسم اوالتلوين وبعدها انتقل معاهم للورق ^^ |
رد: :: نقاش :: افتقدنا اللمة بالأهل والأحباب !
مشكوره فاطمه موضوع مهم ........
في البيت مسيطره ع اولادي لساتهم صغار وما يخذونه برا البيت واحدد وقت للعب وعن نفسي قبل كمنت مدمنه واتس اب واللحين عااادي مشكله اللحين في الجمعات مع الاهل مره يضايقني لما اشوف وحده تطقطق بالجوال .. يعني شوله جايه ومجتمعه ....دايم اقولهم طفوا الجوالات لا شوفه بس محد يسمع او احيانا يطفونهاا وبعدين ياخذونهااا .......عقولهم مو معناااا ...... ............. من جد مشكله ماأدري شو الحل ,,,,,,,, |
رد: :: نقاش :: افتقدنا اللمة بالأهل والأحباب !
شكراً والف شكر لكل من شارك وادلى برأيه بصراحه وبدون مجامله استفدت من ردودكم وافعالكم في محاولة حل المشكلة يعطيكم العافيه .... |
رد: :: نقاش :: افتقدنا اللمة بالأهل والأحباب !
وما يشوف قدامـة شوي ويدعمنا ... يالله هالكثر صار مجتمعنا كذا !! هذآ اللي حاصل تشوف بعض الناس ماينتبه حتى يدعمك وعند الأشارات الأشاره تفتح والبعض واقف أمامك وكل شي ذو حدين أمآ يستخدم في الخير أو الشر يعطيكِ العافيه نقل هادف وبناء :16: |
رد: :: نقاش :: افتقدنا اللمة بالأهل والأحباب !
:13:
يالله المستعان والله ظاهره منتشرة وبكثرة وهذا الحاصل والله توني راجع من زواج قبل شوي .. يالله بس كل واحد يطقطق والهدوء والبرود انا حقيقة أخر همي الجوال لامانع وقت الفراغ ابو دقائق اما كل الوقت لا حشاء موضوع مميز :2: |
رد: :: نقاش :: افتقدنا اللمة بالأهل والأحباب !
خلاص صارت جزئ منا ! م صرنا نقدر نتركها ولا ل دقايق !!!!!
وإن تركناها بيبقى بالنا مشغول عليها :9: الله يصلح الحال موضوع وايد حلو فطوم , تسلمي :37: |
رد: :: نقاش :: افتقدنا اللمة بالأهل والأحباب !
مريح نفسي ولله الحمد لا واتس اب ولا شي اللهم البي بي لاوعدد قليل باللسته.
|
رد: :: نقاش :: افتقدنا اللمة بالأهل والأحباب !
المشكلة في ثقافتنا وطريقة تثقيفنا للجيل القادم
اذا ولدك او بنتك يشوفك ماسك بيدك الجهاز وقت الجمعة العائلية فـلا تلومونهم اذا ادمنوا استخدامه بكل وقت كبار السن اكثر المتضررين لأن الجمعه ولمة الأبناء والبنات والأحفاد هي متنفسهم الوحيد فيصيبهم الإحباط والضيقه اذا شافوا أجساد بدون ارواح ,, الجميع منزل راسه بجهازه وتارك الجلسه والسوالف وإذا جاوب أو رد تحس انه مغصوب وياويلك لو تكرر السؤال لأنك بكذا قطعت حبل أفكار ( إنشتاين ) زمانه الأجهزه وسيلة للتواصل وليست غاية فيه مثل مصري ( الحي أبقى من الميت ) يعني تواصلك مع اللي قدامك أولى من اللي بالقروب :20: في فترة الإختبارات أو حتى في السفر نقدر نستغني عن الواتس اب والتويتر بشكل واضح وكبير يعني المسألة ليست ادمان ,, فقط ترويض للنفس واشغالها لا أقل ولا أكثر اتذكر ايام النغمات الموسيقية في النوكيا وكثرة استخدامها اشتكت المساجد منها فتم تركيب أجهزة تقطع شبكة الجوال داخل المسجد عند تشغيل مكبرات الصوت وبالفعل انقطعت تلك الأصوات النشاز المتداخلة مع خشوع المصلين لتلاواة آيات القرآن لكن تم الإستغناء عنها لثبوت تأثيرها الصحي وخصوصاً على الأجهزة المنظمة للقلب احس لو درت عنه أمي راح تشتريه لو بمليون وتشغله بالبيت 24 ساعة ,,,, والمقبرة وسيعة :17::13: |
رد: :: نقاش :: افتقدنا اللمة بالأهل والأحباب !
سلآااام
حنا الحمدلله الامور طيبه عندنا ومافيها العادة ذي لان الي يمسك جوال بجلسة وبينا ينكسر هو وجواله >>عائله ديموقراطيه هههه :mh35: حقيقه مانمسك الجوال الا للضوروره انا واخواني خاصة انا انا بوادي وهو بوادي أكثر وحه يتشرهون عليها ماترد والواتس حتى لو انضفت للقروب احذفه الي يبيني يكلمني شخصياً:(204): ماهو غرور لكن مالي بالسوالف وغيرها ماأحب .. غير انها تاخذ وقت اكثر من اللازم وفي عزايم بيتنا او عندنا ضيوف وجمعه محد يلتفت للجوال او يطلعه الحمدلله .. محد مدمن غير اخوي الصغير وجاري السيطرة ع وضعه انا اشوف انها ثقافه تربيه لا أكثر.. شاكره طرحك |
رد: :: نقاش :: افتقدنا اللمة بالأهل والأحباب !
طرح جميل
للامانه ماقريت القصه بالنسبه لسؤال منع الاجهزه احنا في زمن مانقدر نعيش بدون هالاجهزه بالمقابل الى الان فينا الخير تجتمع العائلة بدون شغف الاجهزه وفي حل اتوقع بيساعد لما تكون اللمه وناسه وضحك وسوالف تشد الكل بيترك الاجهزه وبيلتهي مع السوالف يعني لو احد افراد العائله فطين ويعرف يدير الحوار بيعرف يشد الانتباه ويطرح السوالف ويشد الشغوفين بالاجهزه معه عاد اللي مايقدر يترك جهازه هذا حاله مستعصيه عموما والله جمعة الاهل تسوى الدنيا ومافيها |
رد: :: نقاش :: افتقدنا اللمة بالأهل والأحباب !
شكراً والف شكر جميعاً على هذا الحضور اقتباس:
+1 ..... |
| All times are GMT +3. الوقت الآن حسب توقيت السعودية: 04:56 AM. |
Powered by vBulletin® Version 3.8.7, Copyright ©2000 - 2025, Jelsoft Enterprises Ltd. جامعة الملك الفيصل,جامعة الدمام