[align=center][table1="width:100%;background-image:url('http://www.up.qatarw.com/get-11-2009-6e46b2st.jpg');"][cell="filter:;"][align=center]
لـــيــلـــــــة خــمــيــــــــــــــــــس ..
أمس الخميس كان يوم مثيييييير وعجيييييب من بدايتـه !!
طبعا شيء حلو لما تصحى على إبتسامه .. على كلمة حلوة , على مسج رقيق ,
ومو حلو بـالمره إنك تصحى على عتب , وملامه , وتشرّه من شخص غالي على قلبك حيييييل !!
والأغرب إن العتب يستمر معاك . الصبح , والظهر , والعصر , والـليل ..!!
ولكن الجميل في الموضوع إنه عتب من شخص يحاتيك ويهمه مصلحتك :smile: ,
يوم أمس كان عرس واحد من عيال عمي إسمـه صالـح الوسمـي ,
وعسى الله يوفقـه ويهنيه في زواجه ويرزقه الزوجة الصالحة و الذرية الصالحة ,
في صالة العرس الحضور ماشاءالله كان كبير , وكـ العادة .. نمشي ونسلـم ,
وكـ العادة أيضا .. شخص أعرف إسمه و 10 ما أعرف أساميهم !!
ولكني أعرف الوجيه , وأعرف إنهم من الجماعة ومن عيال عمي القريبيـن ,
وعيال عمي القريبيـن تختلف عن عيال عمي اللي يصير أبوي الله يرحمه عمهم ,
لما صار وقت العشـاء إنشغلت في مكالمة , والناس قاموا وتعشوا ,
خلصت مكالمتي ورحت للبوفيـه أبي أكل لأني كنت جوعان حيييييييل ,
قربت من الطاولة اللي عليها الصحون والقفشات (الملاعق) ,
وأدور لي صحن وإلا ما فيه صحن ..!!
أدور قفشه وإلا هم ما فيه قفشه ..!!
يا ليل الـليل , وش الدبرة الحين :71: !!
ما فيه الا المفاطيـح , والمفاطيـح علاقتي فيها مو قويه حيييل ,
وقلت أمري لله و.. ما تعشيت إلا لما طلعت من العرس .
بعد العرس رجعت البيـت وقعدت بالديوانية وتجمعنـا وسولفنـا وإستانسنـا ,
تناقشنـا في أمور كثيرة , والحمدلله ما كان بينها سيرة الحريم ,
لأن موضوع الحريم عند الشباب هوامش الإختلاف فيه بسيطة جدا جدا , هذا إن وجدت من الأساس :tongue: ,
جَمعَـة ليلة الخميس حلوة , والسهر أيضا حلو , خصوصا إذا كان اليوم الثاني يوم عطله ,
وعسى أيامكم كلها خميـس :smile: .